Ngai poh tăm Poh Niămgoh

Bơta đăl dùl: Crơnggơ̆s 1. 1 – 2. 2

Yàng gŏ ală bơta Khai lơh lah hàng-bơnĕ ngăn.

Đăl tam Sră Crơnggơ̆s.

Bơh sơnrờp, Yàng neh crơnggơ̆s trồ tiah. Ù-tiah găm wah-wời ngềt-ngơ̆t, klăm-jơngo jơm-gòm thòng hŭt-hung, mơ Nhơm Yàng dê păr jăt bồ dà.

Yàng yăl: “Gơ̆s tĕ bơta àng.” Mơ gơ̆s bơta àng. Yàng gŏ bơta àng hàng-bơnĕ, Khai căh ĭs bơta àng lĭk bơh bơta klăm-jơngo. Yàng hòi bơta àng lah ngai, bơta klăm-jơngo lah măng. Găn dùl mho mơ dùl drim: hơ̆ lah ngai dơ̆ dùl.

Yàng yăl: “Gơ̆s tĕ dùl kơloàng trồ tam gùl dà, căh ĭs dà mơ dà.” Yàng lơh gơ̆s kơloàng trồ, mơ căh ĭs dà đah đơm kơloàng trồ. Mơ gơlĭk gơ̆s be hơ̆. Yàng hòi kơloàng hơ̆ lah trồ. Găn dùl mho mơ dùl drim: hơ̆ lah ngai dơ̆ bàr.

Yàng yăl: “Dà đah đơm trờ, rơgùm wơl tĕ dùl anih, làng lơh gơlĭk tiah rañ- rơsơ̆h.” Mơ neh gơlĭk gơ̆s be hơ̆. Yàng hòi tiah rañ-rơsơ̆h lah ù, mơ Khai hòi tiah dà lah dà-lềng. Yàng gŏ gơ hàng-bơnĕ. Mơ Yàng yăl: “Ù hòn tĕ chi-che tơlir ià gărsơntìl, mơ chi-che geh plai sa, gơlĭk plai jăt jơi gơ, mơ tam plai geh găr sơntìl, hơ đăng măt ù. Mơ neh gơlĭk gơ̆s be hơ̆. Gen mơ ù gơlĭk chi-che tơlir ià găr jăt jơi gơ, mơ chiche gơlĭk plai, tam gơ geh găr khăt gơ jăt jơi gơ. Yàng gŏ gơ hàng-bơnĕ. Găn dùl mho mơ dùl drim. Hơ̆ lah ngai dơ̆ pe.

Yàng yăl: “ Gơ̆s tĕ ală phan àng hơ đăng kơloàng trồ mơ căh ĭs tĕ ngai mơ măng, mơ gơjềng tềl-sơnđio tơngai, kơnhai mơ sơnăm, làng sòl-pơnđàng hơ đăng kơloàng trồ mơ gơcrà-àng măt ù.” Mơ neh gơlĭk gơ̆s be hơ̆. Yàng neh lơh gơ̆s bàr plai àng dờng; plai àng dờng rơlau ăt-bồ ngai, mơ plai àng dêt rơlau ăt-bồ măng; mơ Khai krung lơh gơ̆s ală sơrmañ. Yàng tơnơn gơ hơ đăng kơloàng trồ làng sòlpơnđàng hơ đăng măt ù, mơ ăt-bồ măng ngai, mơ căh ĭs bơta àng mơ bơta klămjơngo. Yàng gŏ gơ hàng-bơnĕ. Găn dùl mho mơ dùl drim: hơ̆ lah ngai dơ̆ poăn.

Yàng yăl tai: “Dà lơh gơlĭk tĕ ală jơi kĭs wìn mơ jơi sềm păr hơ đăng măt ù, hơ đơm kơloàng trồ. Gen Yàng crơnggơ̆s ală ka dờng, ală jơi-phan kĭs-gơ̆s mơ dà lơh gơlĭk jăt jơi gơ, mơ ală sềm păr jăt jơi gơ. Yàng gŏ bol gơ hàng-bơnĕ. Yàng yălniăm bol gơ in mơ đơ̆s be do: “Deh oh deh kòn hòn sơnoăn tĕ oă-rà, bềng dà-lềng; jơi sềm deh-dùh tĕ oă-rà hơ đăng măt ù. Găn dùl mho mơ dùl drim: hơ̆ lah ngai dơ̆ prăm.

Yàng yăl tai: “Ù gơlĭk tĕ ală jơi kĭs jăt jơi gơ: phan ròng, jơi wìn mơ jơi phơr tam tiah jăt jơi gơ.” Mơ neh gơlĭk gơ̆s be hơ̆. Yàng neh crơnggơ̆s jơi phơr tam tiah jăt jơi gơ, phan ròng, mơ ală jơi wìn tam ù jăt jơi gơ. Yàng gŏ bol gơ hàng-bơnĕ mơ Yàng đơ̆s: “He pơjềng lă kòn-bơnŭs jăt rùp-rài ndrờm be He, làng bol khai ăt-bồ ka dà-lềng, sềm trồ, jơi phơr làm khŏp măt ù mơ jơh ală jơi wìn hơ đăng măt ù.

Gen Yàng neh klăc-mòn kòn-bơnŭs ndrờm be rùp-rài Khai, Khai pơjềng kòn-bơnŭs ndrơm be rùp-rài Yàng. Khai klăc-mòn bol khai geh klau geh ùr.

Yàng yălniăm bol khai in mơ đơ̆s be do: “Deh oh deh kòn hòn sơnoăn tĕ oă-rà, bềng măt ù, mơ ơm-ăt gơ, ăt-bồ tĕ ka dà-lềng, sềm trồ mơ jơh ală jơi kĭs ntrờn hơ đăng măt ù.” Yàng yăl: “Do, Añ pà bol mê in lơh phan sa ală chi-che ià sơntìl hơ đăng măt ù, mơ jơh ală chi-che gơlĭk plai geh găr jăt jơi gơ. Añ pà ală chi-che tơlir lơh phan sa ală jơi phơr in hơ đăng măt ù, sềm trồ mơ jơh ală jơi kĭs ntrờn hơ đăng măt ù.” Mơ neh gơlĭk gơ̆s be hơ̆ Yàng gŏ ală bơta Khai neh lơh hàngbơnĕ ngăn. Găn dùl mho mơ dùl drim: hơ̆ lah ngai dơ̆ prau.

Be hơ̆ lah trồ tiah mơ ală phan bơka gơ dê neh sir-tơl. Ngai dơ̆ poh Yàng neh bơsir ală broă Khai neh lơh. Mơ tơnơ̆ mơ tŭ bơsir broă Khai neh lơh, gen ngai dơ̆ poh Khai ơm rơlô.

Hơ̆ jơnau đơ̆s Kơnràñ dê.

 

Nrĭ-nrềng:  32. 4-5, 6-7, 12-13, 20 mơ 22

Hw: Ù-tiah bềng bơta hàng-goh Kơnràñ dê.

Bơh bơr Kơnràñ gơ̆s bơr song-ring, ală broă Khai lơh lah pal pin-kơnờm lơm. Khai gơboh mơ bơta song-dơpă, ù-tiah bềng bơta hàng-goh Kơnràñ dê. Hw

Bơh bơr Yàng mơ trồ tơlir geh crơnggơ̆s, mơ ală mpồl-pràn gơ dê bơh nhơm bơr Khai dê lơm. Kơnràñ tơrgùm wơl dà dà-lềng be ơn tam nhồng, Khai tơnơn ală nsừc dà tam đăm. Hw

Bơtoăh ngăn lơgăr mơ Kơnràñ gơ̆s Bơtau ăt-bồ, làng-bol mơ Kơnràñ rơwăh gơ̆s jơtài ĭs he dê. Bơh trồ jơnhoa Kơnràñ sền hơ đơm, Khai sền gŏ jơh ală oh kòn kòn-bơnŭs. Hw

Sồp-soàn hi kơ̆p-càng Kơnràñ, Khai tờm gơ̆s Bơtau dong-kờl mơ gràng-gàr hi. Ơ Kơnràñ, dăn tuh nùs tơpă-tơpài hơ đăng hi, Khăt gơ jăt be hi pin-kơnờm dơ Đi. Hw

 

Bơta đăl bàr: Crơnggơ̆s 22. 1-18

Phan gơsơ̆t pơdơng Abraham dê, pàng-yau he.

Đăl tam Sră Crơnggơ̆s.

Tam ală ngai hơ,ê Kơnràñ tơlòng Abraham mơ đơ̆s mơ khai be do: “Abraham! Abraham!” Khai hơ wơl: “Ơi, añ do.” Kơnràñ đơ̆s: “Mê cèng tĕ Isaac, cau kòn dùl gơboh mê dê, mơ lòt tŭs hơ ù Moria, tềng hơ̆, mê rơ̆p pơdơng khai gơ̆s phan chu lơhyàng hơ đăng bơnơm mơ Añ rơ̆p sơnđio mê in.” Drim hìng, Abraham guh bĭc gờñ, răk alàng, ià jăt bàr nă cau duh-broă mơ kòn khai lah Isaac, khai cŏ lòng làng ngui chu phan lơh-yàng, lồc gen lòt gùng tŭs hơ tiah Yàng sồr.

Tŭs ngai dơ̆ pe, Abraham tơngờ măt, gŏ tiah hơ̆ bơh ngài. Abraham sồr bol duh-broă: “Bol mê ơm wơl ndo bal mơ alàng, găm añ mơ kòn añ guh tŭs hơ ne; hi lơh broă duh-khoai, mơ rơ̆p rê wơl mơ bol mê.” Abraham ai lòng ngui làng chu phan lơh-yàng, tơnơn hơ đăng pơnì Isaac, kòn khai. Khai ăt ồs mơ đào tam tê, mơ jơh bàr lòt bal. Isaac đơ̆s mơ bàp lah Abraham: “Bàp lơi!” Abraham hơ: “Bàp do, ơ kòn!” Isaac đơ̆s: “Geh ồs, geh lòng do, găm belàt làng lơh phan chu lơh-yàng ntềng đah taih ?” Abraham hơ: “Belàt lơh phan chu lơh-yàng, Yàng tờm rơ̆p răk-rơcăng, ơ kòn!” Lồc gen jơh bàr lòt bal.146 Tŭ bàr nă tŭs dơ tiah Kơnràñ neh sơnđio, Abraham lơh dùl nơm cơnờng duhkhoai mơ rơndăp lòng hơ đăng, lồc gen căp Isaac wơl, tơnơn đăng cơnờng duh-khoai hơ đăng lòng. Abraham ai tê tă đào làng gơsơ̆t lơh-yàng kòn he. Tŭ hơ̆ huềng-duh Kơnràñ bơh trồ hòi be do: “Abraham! Abraham!.” Khai hơ wơl: “Ơi , añ do.” Huềngduh đơ̆s: “Bañ gơsơ̆t oh dêt mơ bañ bư dơ khai, bơh tŭ do, Añ gĭt mê duh-ngòt Kơnràñ, tiăn tŭs mê ờ pơndăng pơdơng cau kòn dùl lơm Añ in.” Abraham tơngờ măt, gŏ bơh ngkời dùl nơm belàt dăm găm kòl ngke tam rơlau, gen Abraham kŭp mơ gơ, lơh phan lơh-yàng ala să kòn tờm khai dê. Huềng-duh Kơnràñ dê hòi Abraham dơ̆ bàr mơ đơ̆s be do: “Kơnràñ đơ̆s: bơh mê neh lơh bơta hơ̆, mê ờ pơndăng pơdơng cau kòn dùl lơm mê dê Añ in, gen Añ yălniăm mê in, Añ ai mê in deh oh deh kòn hòn sơnoăn rơ̆-rà be sơrmañ tam trồ, be bràs tam dà-lềng, jơi-bơtiàn mê rơ̆p sơmbăt mpồng bòn bol sò-tơ̆m dê, mơ ală làng-bol hơ đăng măt ù. Ală làng-bol hơ đăng măt ù rơ̆p geh yălniăm tam jơi-bơtiàn mê, bơh mê neh dờn bơr Añ.”

Hơ̆ jơnau đơ̆s Kơnràñ dê.

 

Nrĭ-nrềng: 15. 5 mơ 8, 9-10, 11

Hw: Ơ Kơnràñ, dăn gràng-gàr kòn, bơh kòn jòi sơnđìng dơ Đi.

Kơnràñ gơ̆s jơtài mơ coàn kòn dê, Khai tờm ăt-prăp să kĭs kòn dê. Kòn sùm tơnơn Kơnràñ tơđăp măt kòn, bơh Kơnràñ nggui đah ma kòn, kòn rơ̆p ờ gơplơ̆ nùs. Hw

Bơh hơ̆, nùs kòn chờhờp mơ sồp-soàn kòn rơhờn, jơh sơl poăc-să kòn dê krung bĭc rơlô-bòl lơngai, bơh Kơnràñ ờ săng-lời sồp-soàn kòn tam làng-bồc, krung ờ lời cau niămgoh Khai dê gŏ bơta ồm-lề. Hw

Kơnràñ rơ̆p sơnđio kòn in gĭt gùng-dà kĭs sùm, bơta bềng hờm rơhờn ơm dơ đăp măt Kơnràñ, bơta hừh-hơh đah tê ma Kơnràñ jơl jơh ală rài. Hw

 

Bơta đăl pe: Ll 14. 15 – 15. 1a

Oh kòn Israel mŭt tam gùl dà-lềng rañ-rơsơh.

Đăl tam Sră Lĭk-lòt.

Tam ală ngai hơ̆, tŭ oh kòn Israel gŏ cau Ejypto ràn tŭs bơh ngkời, gen ngòt-rơngơ̆t, tơnggà lơ̆s săp mơ hòi-dăn mơ Kơnràñ. Kơnràñ đơ̆s mơ Moise be do: “Geh chi lơi mơ hòi Añ taih ? Sồr tĕ oh kòn Israel lòt gùng. Ai mê, pờ gai jra, mơ pờ tê hơ đăng dà-lềng, căh ĭs tĕ dà-lềng, làng oh kòn Israel lòt tam gùl dà- lềng rañ-rơsơh. Ai Añ, Añ rơ̆p lơh nùs bol cau Ejypto gơlĭk kră be lŭ, bol khai rơ̆p ting jăt tơnơ̆ bol mê. Tŭ hơ̆, Añ rơ̆p tơlĭk bơta gơklŏ Pharaon in, jơh mơ mpồl pràn, rơndeh tam lơh mơ ling aseh bơtau hơ̆ dê in gĭt. Cau Ejypto rơ̆p gĭt Añ lah Kơnràñ, tŭ Añ tơlĭk bơta gơklŏ Pharaon in, rơndeh tam lơh mơ ling aseh bơtau hơ̆ dê in gĭt.” Huềng-duh Yàng dê ờs lòt lài mpồl làng-bol Israel, wơl lòt mơ bơh tơnơ̆ bol khai. Jrong mhoal ờs lòt lài đah đăp, krung jăt huềng-duh wơl lòt bơh tơnơ̆, ntào dơ gùl mpồl pràn Ejypto mơ mpồl pràn Israel. Mơ mhoal ờs sòl-pơnđàng tŭ trồ măng gơjềng gơ̆s klăm-jơngo wơl, tiăn tŭs jơl măng, bàr đah ờ rơgơi tŭs rềp bal. Moise yờ tê hơ đăng dà-lềng, gen mơ dùl dơ̆ càl Đăng khồm pràn jơl măng, Kơnràñ drờl dà-lềng rŭc wơl mơ lơh dà-lềng rañ-rơsơh. Dà gơ căh ĭs mơ oh kòn Israel mŭt tam gùl dà-lềng rañ-rơsơh, dà gơ bơtào be tơrñăng bàr đah ma kiau. Cau Ejypto ting jăt, jơh mơ mpồl pràn Pharaon dê, rơndeh tam lơh mơ ling aseh lòt jăt tơnơ̆ Israel mŭt tam gùl dà-lềng. Tŭ mờr àng drim, găn jrong ồs mơ mhoal, Kơnràñ sền mpồl pràn Ejypto, lơh nggồr-nggàc tam gùl bol khai. Kơnràñ tơlơ kong rơndeh, tàng rơndeh glăr ngăn lòt. Cau Ejypto đơ̆s: “He ntoăt dô ĭh bơh cau Israel, kơyoa Yàng tam lơh dong bol khai, tam dră mơ he.”

Kơnràñ đơ̆s mơ Moise: “Yờ tĕ tê hơ đăng dà-lềng làng dà gơ rê wơl tơnbŭ cau Ejypto, rơndeh tam lơh mơ ling aseh bol khai dê.” Moise yờ tê hơ đăng dà-lềng, mơ tŭ prŭ drim, dà-lềng gơ rê wơl be yau. Cau Ejypto ntoăt dô, tìp mơ dà-lềng gơ rê wơl. Kơnràñ tơlơ bol khai gơplơ̆-gơplừ tam dà-lềng. Dà gơ rê wơl bồr tơ̆p rơndeh tam lơh mơ ling aseh. Jơh mơ mpồl pràn Pharaon dê neh jăt làng-bol Israel mù tam dà-lềng, ờ găm cau lơi kĭs. Ai oh kòn Israel neh lòt tam gùl dà-lềng rañ-rơsơh, dà gơ bơtào be tơrñăng bàr đah ma mơ kiau. Ngai hơ̆ Kơnràñ klàs Israel bơh tê Ejypto. Mơ bol khai gŏ bồc cau Ejypto gơ pơrdô pơrđồng bềng gah dà, mơ gŏ tê pràn gơnrơh Yàng dê klơn-klềt bol Ejypto. Jơh mơ làng-bol duh-ngòt Kơnràñ, pindờn dơ Kơnràñ mơ dơ Moise cau duh-broă Khai. Tŭ hơ̆, Moise bal mơ oh kòn Israel đơ̆scrĭh gờm Kơnràñ jơnau đơ̆scrĭh do:

 

Nrĭ-nrềng: Ll 15. 1b-2, 3-4, 5-6, 17-18

Hw: Añ rơ̆p yălniăm Kơnràñ, bơh Khai pràn-dờng rơyŭ-rơyùm.

Añ rơ̆p yălniăm Kơnràñ, bơh Khai pràn-dờng rơyŭ-rơyùm, Khai neh cơm aseh mơ bơnŭs tam dà-lềng. Kơnràñ gơ̆s bơta pràn mơ jơnau đơ̆scrĭh añ dê, Khai tờm neh ai añ in geh tơngklàs. Khai gơ̆s Yàng añ, añ rơ̆p tơngklŏ Khai, Khai gơ̆s Kơnràñ pàng-yau añ, añ rơ̆p đơ̆scrĭh gờm Khai. Hw

Kơnràñ be cau ling, sơnđăn niămgoh Khai dê tờm gơnrơh ngăn. Khai neh cơm rơndeh-rơndồ mơ mpồl-pràn Pharaon dê tam dà-lềng, mơ tơmbŭ tam Dà Prơhê ală cau kuăng ăt-bồ khai dê. Hw

Ală thòng hŭt-hung neh tơ̆p rĭs bol khai, bol khai rung tam dà-lềng be pơnai lŭ dờng. Ơ Kơnràñ, tê ma Đi tơlĭk bơta pràn-kơldăng, ơ Kơnràñ, tê ma Đi tơnlề bol sò-tơ̆m. Hw

Kơnràñ cèng oh kòn Israel tăm hơ đăng bơnơm jơtài Khai dê, tiah kơ̆-kơljăt, Kơnràñ lơh anih ơm kĭs, ơ Kơnràñ, lah anih niămgoh tê Đi neh bơtào gơ̆s. Đi rơ̆p ơm-ăt bơh rài tòm rài. Hw

 

Bơta đăl poăn:Is 54. 5-14

Tam nùs gơboh gơ̆s sùm, Kơnràñ Tơwài neh nđàc-sơngĭt mê.

Đăl tam sră Isaia, cau ala-bơr dê.

Bơtau neh klăc-mòn mê ăt-bồ mê, sơnđăn Khai gơ̆s Kơnràñ ală mpồl-pràn, Bơtau Tơwài mê gơ̆s Bơtau niămgoh Israel, Khai rơ̆p geh yăl-tơlĭk gơ̆s Yàng làm khŏp plai ù.

Yàng mê dê neh yăl: “Kơnràñ hòi mê be hòi cau ùr kong săng-lời mơ moăt-jrùng, mơ be cau pơùr kong săng-lời tŭ găm kơnòm. Tam dùl tơngai dŭt lơm, Añ neh săng-lời mê, mơya Añ rơ̆p ai nùs tơpă-tơpài dờng-rơyŭ mơ tơrgùm mê wơl. Tam tŭ hào gơjrañ, Añ pồn ing măt Añ, mơya tài bơh nùs niămlơnhơn lùng-làng, Añ nđàc-sơngĭt mê. Kơnràñ gơ̆s Bơtau Tơwài mê neh yăl be hơ̆.

Krung be tam rơnàng Noe, Añ neh sơntơ̆m be do: Dà lĭ dà li rơ̆p ờ băm-lìu măt ù tai, gen Añ krung neh sơntơ̆m be do: Añ rơ̆p ờ gơjrañ mê, ờ lah-pơrhơng mê tai. Bŭlah bơnơm gơ ntrờn, dòr gơwăñ, gen nùs gơboh Añ dê bal mơ mê ờ gŏ tŭ lơi tam gơl, mơ bơta tam bơrkoăt ring-lơngai Añ dê krung rơ̆p ờ gơwăñ. Yàng niăm-lơnhơn mê dê neh yăl be hơ̆. Ơ bòn dờng dồn-sa, kong càl-rơbŭt druh-khồm tơnlề mơ ờ geh cau pơndờm-pơnđiăng, ndo Añ rơ̆p rơndăp ală pơnai lŭ mê dê làng geh abă, rơ̆p ơn bơnàng mê dê hơ đăng lŭ màng, rơ̆p ai lŭ prơhê băc mpồng gơlăng mê, rơ̆p ai krơ àng lơh mpồng bòn dờng mê, rơ̆p ai lŭ kràng màng băc tơrñăng bòn dờng mê. Jơh ală oh kòn mê rơ̆p geh Kơnràñ bơtê-bơto, bol khai rơ̆p chờ dờp dùl bơta ring-lơngai jŏ-jòng. Mê rơ̆p ntào kơ̆ tam bơta song-dơpă, mơ ngài bơh ală bơta rồn-bơklơn, mê rơ̆p ờ găm ngòt-rơngơ̆t tai, mơ ơm kĭs ngài bơh ală bơta cù-kìr, bơh rơ̆p ờ geh cau lơi rơgơi lơh ơniai mê tai.”

Hơ̆ jơnau đơ̆s Kơnràñ dê.

 

Nrĭ-nrềng: 29. 2 mơ 4, 5-6, 11 mơ 12a mơ 13b150

Hw: Ơ Kơnràñ, añ jờngrơ Đi bơh Đi neh tơngklàs añ.

Ơ Kơnràñ, añ jờngrơ Đi bơh Đi neh tơngklàs añ, mơ ờ lời bol sò-tơ̆m chờhờp bơh añ. Ơ Kơnràñ, Đi neh lăm sồp-soàn añ klàs ngài bơh làng-bồc, Đi neh klàs añ bơh mpồl cau mù tam làng-bồc. Hw

Ơ ală cau pindờn Kơnràñ dê, pĕ kơlñi đơ̆scrĭh gờm Kơnràñ, mơ ưn-ngài tĕ sơnđăn niămgoh Khai. Bơh bơta gơjrañ Khai dê mìng dŭt lơm, mơya nùs niăm-lơnhơn Khai dê găm gŏ jơl sùm. Mho tìp bơta moăt-yăn, mơya drim hìng geh wơl chờhờp-chờchờr. Hw

Ơ Kơnràñ, dăn dờp bơr mơ nđàc-sơngĭt añ, ơ Kơnràñ, dăn ai tai bơta dong-kờl añ. Đi neh tam gơl bơr ñìm-răc gơlĭk gơ̆s bơta đơ̆s-chờ añ in. Ơ Kơnràñ gơ̆s Yàng añ, añ rơ̆p yălniăm Đi jơl jơh ală rài. Hw

 

Bơta đăl prăm: Is 55. 1-11

Tŭs tĕ mơ Añ, mơ sồp-soàn bol mê rơ̆p geh kĭs. Añ rơ̆p cĭh mơ bol mê dùl bơta tam bơrkoăt gơ̆s sùm.

Đăl tam sră Isaia, cau ala-bơr dê.

Do, Kơnràñ yăl: “Ơ jơh ală cau tơhìr dà, tŭs tĕ hùc dà; ơ cau ờ geh priă- jền, tŭs tĕ blơi kòi làng sa; tŭs tĕ làng blơi tơrnờm mơ dà toh, ờ duh tơ̆m priă, ờ duh pơl mơ phan lơi. Ñchi gơlơh bol mê ờ ngui priă làng blơi bañ, ñchi gơlơh ờ ngui jền-tơngai làng blơi phan ròng să taih ? Gen sơrkềng tĕ tồr iăt, tŭs tĕ sa phan bơkah, mơ bolmê rơ̆p geh tiăm-gĭt phan sa bơkah-bơnga. Sơrkềng tĕ tồr mơ tŭs mơ Añ, iăt tĕ, gen bol mê rơ̆p geh kĭs. Añ rơ̆p cĭh mơ bol mê dùl bơta tam bơrkoăt gơ̆s sùm, gen gơ̆s ală bơta hàng-goh neh hơ pà Đavit in: Do Añ bơtào mê gơ̆s cau cơng ală làng-bol in, lơh kuăng ăt-bồ, cau pôgru ală làng-bol in. Do mê rơ̆p hòi-jà làng-bol mơ lài òr mê ờ gĭt, mơ ală làng-bol lài òr ờ hềt gĭt mê, rơ̆p ntoăt tŭs mơ mê, bơh Kơnràñ gơ̆s Yàng mê, gơ̆s Bơtau niămgoh Israel dê, kơyoa Kơnràñ lơh mê in geh gơklŏ. Jòi tĕ Kơnràñ tŭ lơi găm rơgơi bàn, hòi-dăn tĕ Khai tŭ Khai găm ơm rềp. Ơ cau iơ̆h-blơ̆, săng-lời tĕ gùng-dà he dê; mơ cau ờ dờn-song, săng-lời tĕ ală jơnau he kơlôi; rê wơl tĕ mơ Kơnràñ, gen Khai rơ̆p nđàc-sơngĭt, rê wơl tĕ mơ Yàng he, bơh Khai pơha nùs hồ-lời. Kơyoa bơh jơnau Añ kơlôi ờ di be jơnau bol mê dê, mơ gùng-dà bol mê dê ờ di gùng-dà Añ dê, Kơnràñ yăl be hơ̆. Be trồ jơnhoa rơlau mơ ù be lơi, gen gùng-dà Añ lèt rơlau gùng-dà bol mê, mơ jơnau kơlôi Añ dê krung lèt rơlau jơnau kơlôi bol mê dê be hơ̆ sơl.

Be mìu piăr dùh bơh trồ mơ ờ guh wơl hơ trồ tai, mơya gơ jồm tam ù, lơh ù in gơjềng bơkah, chi-che gơ căt bồ-măt, làng cau sĭh in geh găr sơntìl, kòn-bơnŭs in geh piăng sào, krung be hơ̆ sơl, jơnau bơh bơr Añ yăl-tơlĭk rơ̆p ờ rê wơl mơ Añ mơ gơ ờ gơlĭk plai, mơya gơlơh gơ̆s nùs-kờñ Añ dê, mơ bơsir broă Añ jào.”

Hơ̆ jơnau đơ̆s Kơnràñ dê.

 

Nrĭ-nrềng: Is 12. 2-3, 4bcd, 5-6

Hw: Bol mê rơ̆p rơhờn bơ̆ dà tam croh dà Bơtau Tơngklàs dê.

Do Yàng gơ̆s Bơtau Tơwài añ, añ rơ̆p pin-kơnờm làng lơh-lòt mơ ờ bìr-ngòt, bơh Kơnràñ gơ̆s bơta pràn, gơ̆s Bơtau añ jờngrơ, Khai rơ̆p gơjềng bơta tơngklàs añ in. Hw

Yălniăm tĕ Kơnràñ mơ hòi dăn sơnđăn Khai, yăl-tơlĭk tĕ ală làng-bol in gĭt broă gơnrơh Khai dê, kah wơl tĕ sơnđăn Khai dờng-rơyŭ ngăn. Hw

Yălniăm tĕ, bơh Khai lơh gơ̆s ală broă krơi-sơrbơi, yăl-pơnrơ tĕ broă hơ̆ làm khŏp trồ tiah. Ơ cau ơm kĭs tam Sion, sơnđoh-ñchừn đơ̆scrĭh tĕ, bơh Bơtau dờng-rơyŭ gơ̆s Bơtau niămgoh Israel ơm tam gùl mê. Hw

 

Bơta đăl prau: Br 3. 9-15, 32 – 4. 4

Mê lòt tĕ tam gùng àng-gơcrà Kơnràñ dê.

Đăl tam sră Baruk, cau ala-bơr dê.

Ơ Israel, iăt tĕ ală jơnau-sồr pà bơta kĭs, sơrkềng tĕ tồr iăt làng gĭt-wă jơnau ngăc-ngăr. Ơ Israel, mbơh lơi mơ mê ơm tam ù dà bol sò-tơ̆m dê, mê huờihoăr hơ đăng ù năc, gơtờp jơnau bơ̆-bơl bol cau chơ̆t dê, kong kờp tam mpồl cau di mù tam ồs-yăn-sùm taih ? Mê neh săng-lời tô bơta ngăc-ngăr. Kơyoa dilah mê jăt gùng-dà Kơnràñ, gen mê neh ơm kĭs sùm tam bơta ring-lơngai. Mê bơsrăm tĕ ntềng lơi lah bơta ngăc-ngăr, ntềng lơi lah bơta pràn-kơldăng, ntềng lơi lah bơta wă-wờng, làng mê krung gĭt-wă, ntềng lơi lah bơta jŏ-jòng mơ bơta kĭs, ntềng lơi lah bơta àng măt mơ bơta ring-lơngai taih ? Ñcau gơ̆s cau rơ̆p jòi bàn tiah ơm kĭs bơta ngăc-ngăr dê, ñcau rơgơi mŭt tam đăm màng gơ dê taih ? Bơtau tờm gĭt jơh ală bơta, Khai gĭt gơ, Khai jơh gĭt gơ bơh bơta ngăc-ngăr Khai dê, Khai gơ̆s Bơtau neh ơn rơndăp trồ tiah jơl jơh ală rài, mơ ai ală phan ròng in mơ ală phan poăn nơm jơng kĭs bềng măt ù. Khai sồr bơta àng lòt gen gơ lòt, hòi gơ rê wơl gen gơ rơm-ngòt mơ dờn bơr Khai. Ală sơrmañ ơm hơ tiah gơ làng sòl-pơnđàng mơ gơ chờhờp lơm, Khai hòi bol gơ gen bol gơ hơ bedo: gŏ măt. Bol gơ chờhờp sòl-pơnđàng dơ đăp măt Bơtau crơnggơ̆s gơ.

Khai gơ̆s Yàng he mơ ờ geh Yàng lơi ndai tai rơgơi pơndrờm mơ Khai wơl. Khai neh gĭt ală gùng-dà ngăc-ngăr, neh pà gơ Jakop, cau duh-broă Khai dê in, mơ Israel cau Khai gơboh in. Lồc gen, Khai tơlĭk măt hơ đăng măt ù mơ ơm kĭs tam gùl kòn-bơnŭs. Gen lah sră cĭh ală jơnau-sồr Kơnràñ dê mơ gùng-boh-lăm găm wơl ală rài, jơh ală cau lơi dờn prăp gùng-boh-lăm gen geh kĭs, găm cau lơi săng-lời gen di chơ̆t. Ơ Jakop, rê wơl tĕ mơ ăt-prăp gùng-boh-lăm; kơnờm tĕ dơ bơta àng Khai dê mơ cơnđoà tŭs hơ bơta rơyŭ-rơyùm Khai dê. Bañ jào bơta gơklŏ mê dê cau ndai in, krung bañ jào bơta niăm-ĭs mê dê làng-bol bơdìh in. Ơ Israel, he bơtoăh ngăn, bơh he neh geh gĭt ală chi lơi lơh niăm nùs Kơnràñ.

Hơ̆ jơnau đơ̆s Kơnràñ dê.

 

Nrĭ-nrềng: 18. 8, 9, 10, 11

Hw: Ơ Kơnràñ, Đi geh bơr pà bơta kĭs sùm.

Gùng-boh-lăm Kơnràñ dê niăm wil-tơl, crò pràn nùs-nhơm, jơnau-sồr Kơnràñ dê kơ̆-nhăp, tơnlề bơta bơrngơl. Hw

Jơnau-sồr Kơnràñ dê song-dơpă, tơnchờ nùs-tồr, gùng bơtăn Kơnràñ dê sàng-goh, pơnđàng muh-măt. Hw

Nùs duh-ngòt Kơnràñ niăm ngăn, găm sùm ală rài, jơnau-yăl Kơnràñ dê ngăn-ngồn, song-dơpă jơh tơn. Hw

Ală bơta hơ̆ pal gơboh rơlau mơ màh, rơlau mơ màh ngăn sơl, lơngồt rơlau mơ dà sŭt, mơ rơlau mơ mpờng dà kròt sơl. Hw

 

Bơta đăl poh: Ez 36. 16-17a, 18-28

Añ rơ̆p tuh hơ đăng bol mê dà sàng-goh, mơ rơ̆p pà bol mê in plai nùs pa.

Đăl tam sră Ezekiel, cau ala-bơr dê.

Do bơr Kơnràñ đơ̆s mơ añ be do: Ơ kòn-bơnŭs, tŭ làng-bol Israel ơm kĭs hơ đăng ù-tiah he, bol khai neh tơnbơ̆ ù-tiah hơ̆, bơh rài kĭs mơ broă lơh bol khai dê, rài kĭs bol khai dơ đăp măt Añ bơ̆-bơl be cau ùr cèng-să. Mơ Añ neh hào gơjrañ mơ bol khai, bơh bol khai neh tuh mhàm hơ đăng bơnah ù hơ̆, mơ bơh ală rùp-ràk bol khai duh-khoai tơnbơ̆ bơnah ù hơ̆. Añ neh pơnrah bol khai lòt làm ală làng-bol, mơ ai bol khai ơm kĭs nrah-nring tam ală lơgăr. Añ neh cahrơña jăt rài kĭs mơ broă lơh bol khai dê. Bol khai neh lòt tŭs hơ ală làng-bol, mơ tềng hơ̆, bol khai tơn-tŭp sơnđăn niămgoh Añ dê, bơh làng-bol đơ̆s gơrềng bơh bol khai be do: “Do lah làng-bol Kơnràñ dê, bol khai kong bơtrơh-tơlĭk bơh ù Khai dê.” Mơ Añ neh nđàc-sơngĭt sơnđăn niămgoh Añ dê, mơ hìu Israel neh tơn-tŭp tam ală làng-bol mơ bol khai tŭs ơm kĭs.

Gen tàng, mê đơ̆s tĕ mơ hìu Israel be do: Do Kơnràñ gơ̆s Yàng đơ̆s: Ơ hìu Israel, ờ di tài bơh bol mê mơ Añ lơh-lòt, mơya tài bơh sơnđăn niămgoh Añ dê neh kong bol mê tơn-tŭp tam ală làng-bol mơ bol mê tŭs ơm kĭs. Añ rơ̆p pơnniăm-goh sơnđăn dờng-rơyŭ Añ dê neh kong tơn-tŭp tam gùl ală làng-bol, tiah mơ bol mê neh tơn-tŭp sơnđăn niămgoh Añ, làng ală làng-bol gĭt Añ gơ̆s Kơnràñ, Yàng ală mpồl pràn dê đơ̆s, tŭ Añ pơnniăm-goh ĭs Añ dê tam bol mê dơ đăp măt bol khai. Añ rơ̆p kŭp bol mê bơh dơ gùl ală làng-bol, rơ̆p trơgùm bol mê bơh ală lơgăr, mơ tề-lăm bol mê tam ù-tiah bol mê dê. Añ rơ̆p ngui dà sàng-goh làng prih hơ đăng bol mê, mơ bol mê rơ̆p geh rào goh ală tềl bơ̆. Añ rơ̆p tơngkloh bol mê bơh ală tềl bơ̆ ală rùp-ràk dê. Añ rơ̆p ai bol mê in plai nùs pa, tơnơn dơ gùl bol mê dùl nhơm-nùs pa, tă-tơlĭk bơh săjăn bol mê plai nùs lŭ, mơ pà bol mê in plai nùs poăc. Añ tơnơn Nhơm Añ tam gùl bol mê, lơh bol mê in lơh jăt ală jơnau-sồr Añ dê, lơh bol mê in dờn prăp mơ lơh gơ̆s ală gùng dà Añ dê. Bol mê rơ̆p ơm kĭs tam lơgăr Añ neh ai pàng yau bol mê in, bol mê rơ̆p gơ̆s làng-bol Añ dê, ai Añ, Añ rơ̆p gơ̆s Yàng bol mê dê.

Hơ̆ jơnau đơ̆s Kơnràñ dê.

 

Nrĭ-nrềng: 50. 12-13, 14-15, 18-19

Hw: Ơ Kơnràñ, dăn mòn añ in plai nùs sàng-goh.

Ơ Kơnràñ, dăn mòn añ in plai nùs sàng-goh, mơ tơnpa wơl nhơm-nùs pràn-kơldăng tam să añ. Dăn bañ tơlĭk añ bơh măt Đi, Bañ ai wơl Yàng Nhơm Đi lĭk bơh Añ. Hw

Dăn Đi pà wơl añ in nùs chờ tam bơta tơngklàs, bal mơ nùs pơha, Kơnràñ đơng-dong añ. Añ rơ̆p bơto cau tìs-glài in gùng-dà Đi dê, mơ cau lơi nrah gùng rơ̆p rê wơl mơ Đi. Hw

Kơyoa bơh Đi ờ gŏ kờñ phan pơdơng, dilah añ tampồ phan chu lơh-yàng, Đi rơ̆p ờ gơbài. Phan añ pơdơng, ơ Kơnràñ, lah nhơm-nùs lề-trĕk, ơ Kơnràñ dăn bañ lơh ờ bài nùs-tồr bơcăh-lề, pơndêt. Hw

 

Bơta đăl: Rm 6. 3-11

Kơnràñ Kristo dơ̆ tŭ kĭs wơl bơh bơta chơ̆t, Khai ờ chơ̆t tai.

Đăl tam sră Paulo, cau Dờp-pơyoa bơtoăh, pơyoa bol Roma in.

Ơ oh mi kờñ-gơboh, jơh ală he neh dờp pơđum tam Jesu Kristo, gen lah neh dờp pơđum tam bơta chơ̆t Khai dê. Mơ he neh kong tơ̆p bal mơ Khai, bơh geh tơngkloh tam bơta chơ̆t Khai dê, làng be Kristo kơnờm dơ bơta gơklŏ Yàng Bàp dê mơ kĭs wơl bơh bơta chơ̆t be lơi, gen jơh he krung di kĭs rài kĭs pa be hơ̆ sơl. Bơh dilah he geh tam klăc bal mơ Khai tam dùl bal bơta chơ̆t, ndrờm be bơta chơ̆t Khai dê, gen he krung geh tam klăc dùl bal mơ Khai, tam bơta kĭs wơl ndrờm be hơ̆ sơl. Di gĭt bơta do: Să-bơnŭs yau he dê geh bal kong tơ̆s tơrnơ̆s dơ chikal, làng poăc-să tìs-glài kong tơnroh, làng he in ờ găm lơh dĭ-gơna tìs-glài tai, bơh să- bơnŭs neh chơ̆t, gen lah geh tơngklàs bơh bơta tìs-glài.

Mơ dilah he neh chơ̆t bal mơ Kristo, he pindờn lah he krung rơ̆p kĭs bal mơ Khai, bơh gĭt lah Kristo, dơ̆ tŭ kĭs wơl bơh bơta chơ̆t, Khai ờ chơ̆t tai, bơta chơ̆t ờ găm ăt-bồ Khai wơl tai. Khai neh chơ̆t, gen lah chơ̆t dùl dơ̆ lơm làng tơntăc bal mơ tìs-glài, mơ tŭ Khai kĭs lah kĭs Yàng in. Jơh mơ oh mi krung be hơ̆ sơl, oh mi kờp ĭs tĕ he be neh chơ̆t bal mơ tìs-glài, mơya kĭs Yàng in, tam Jesu Kristo, Kơnràñ he.

Hơ̆ jơnau đơ̆s Kơnràñ dê.

 

Nrĭ-nrềng: 117. 1-2, 16ab mơ 17, 22-23

Hw: Alleluia, Alleluia, Alleluia.

Ưn-ngài tĕ Kơnràñ, bơh Khai sơrmah nùs, bơh bơta tơpă-tơpài Khai dê gơ̆s sùm. Ơ hìu Israel, yăl-tơlĭk tĕ, bơh bơta tơpă-tơpài Khai dê gơ̆s sùm. Hw

Tê ma Kơnràñ dê neh lơh-lòt pràn-kơldăng, tê ma Khai neh yờ-tơngguh añ. Añ ờ chơ̆t, mơya añ rơ̆p kĭs, mơ añ rơ̆p yăl-pơnrơ broă-lơh Khai dê. Hw

Pơnai lŭ mơ ală cau băc săng-sơrbì, neh gơjềng gơ̆s pơnai lŭ mum tơrñăng. Broă hơ̆ neh bơh tê Kơnràñ lơh gơlĭk, broă hơ̆ krơi-sơrbơi dơ đăp măt hi. Hw

 

 Jơnau Yălniăm: B. Mk 16. 1-8

Jesu Nazareth kong tơ̆s tơrnơ̆s, neh kĭs wơl.

Đăl tam Jơnau Yălniăm niămgoh jăt Marko.

Tŭ ngai sabbat neh gơ găn, Maria Magdala, Maria mè Jakobe dê, mơ Salome, blơi bơñà làng tŭs bong bồc Kơnràñ. Bơh prŭ drim, tŭ măt-tơngai rơ̆p lĭk, ngai sơnrờp tam poh, bol khai tŭs hơ bơtô bồc. Bol khai đơ̆s ndring gơ̆p: “Ñcau rơ̆p pơrlă bol he in pơnai lŭ bơh mpồng bơtô bồc taih ?” Dơ̆ tơnggờr sền, bol khai gŏ pơnai lŭ neh pơrlă rau; mơ pơnai lŭ hơ̆ dờng ngăn. Mŭt tam bơtô bồc, bol khai gŏ cau pơnu nggui đah ma, soh ào bò, mơ bol khai nrơ̆t-ngòt. Cau hơ̆ đơ̆s mơ bol khai: “Bañ rơm-ngòt! bol ai jòi Jesu Nazareth neh kong tơ̆s dơ chikal. Khai neh guh wơl, Khai ờ tai tềng do; do tiah cau neh ơn Khai. Mơya bol ai lòt tĕ, yăl bol jăt-dờn Khai dê mơ Petro in: “Khai tŭs tam Galilea lài mơ bol mê. Tềng hơ̆, bol mê rơ̆p gŏ Khai be Khai neh đơ̆s mơ bol mê.” Lĭk bơh bơtô bồc, bol khai dô; tài bơh bơta rơm să mơ rơngòt lơh gơyơh bol khai, mơ bol khai ờ đơ̆s chi lơi mơ cau, tài bơh bol khai rơngòt.

Hơ̆ jơnau đơ̆s Kơnràñ dê.