Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Jo 17, 11b-19
Đăl tam Jơnau Yălniăm niămgoh jăt Joan
Tŭ hơ̆, Kơnràñ Jesu đơs: “Ơ Bàp niăm-goh, dăn Đi prăp-gàr bol khai tam sơnđăn Đi mơ Đi neh ai Kòn in, làng bol khai gơs dùl be Bol He. 12 Tŭ Kòn ơm bal mơ bol khai, Kòn neh prăp-gàr bol khai tam sơnđăn Đi mơ Đi neh ai Kòn in, mơ Kòn neh sền-gàr, mơ ờ geh cau lơi tam bol khai roh-rui, mìng cau kòn bơta roh-rui dê lơm, làng Sră Goh geh lơh gơs wil-tơl. 13 Tŭ do, Kòn tus mơ Đi, mơ Kòn đơs ală bơta do tam dunia, làng bol khai geh wil-tơl bơta chơhờp Kòn dê tam bol khai. 14 Kòn neh ai bol khai in jơnau đơs Đi dê, mơ dunia neh kơuềng dơ bol khai, bơh bol khai ờ gơrê mơ dunia, be Kòn ờ gơrê mơ dunia.
15 Kòn ờ răc dăn Đi tơlik bol khai bơh dunia, mơya dăn Đi prăp-gàr bol khai bơh bơta iơh. 16 Bol khai ờ gơrê mơ dunia, be Kòn ờ gơrê mơ dunia. * 17 Dăn Đi pơniăm-goh bol khai tam bơta ngăn; jơnau đơs Đi dê lah bơta ngăn. 18 Be Bàp neh pơyoa Kòn tus tam dunia, Kòn krung neh pơyoa bol khai tus tam dunia; 19 mơ bơh bol khai in, Kòn pơniăm-goh să tờm Kòn, làng bol khai krung geh pơniăm-goh tam bơta ngăn.”
Hơ̆ jơnau đơ̆s Kơnràñ dê.
