Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Mk 6, 45-52
Đăl tam Jơnau Yălniăm niămgoh jăt Marko
45 Tŭ hơ̆ mơ, Kơnràñ bơklơn bol jăt-dờn Khai dê hào ahò, tiă lài đah bơtĭ ne, hơ Bethsaida, tam tŭ Kơnràñ ai làng-bol in rê. 46 Neh ai làng-bol in rê, Kơnràñ guh hơđăng bơnơm răc dăn. 47 Mho tus, ahò neh ơm tam gùl dà-lềng, mơ dùl nă Kơnràñ lơm ơm hơđăng ù. 48 Gŏ bol jăt-dờn bòl-glar was, bơh geh càl drờl sơlơ̆ mơ bol khai, pơgăp dơ jiờ drơng măng dơ̆ poan, Kơnràñ lòt hơđăng dà-lềng tus mơ bol khai mơ kờñ lòt lài mơ bol khai. 49 Tŭ bol khai gŏ Kơnràñ lòt hơđăng dà-lềng, gen bol khai tồn lah cà tàng nggà; 50 kơyoa jơh ală cau neh gŏ Kơnràñ mơ nrơt-nre. Tŭ hơ̆ mơ, Kơnràñ đơs mơ bol khai: ‘‘Kơ̆ tĕ nùs, Añ do; bañ ngòt !” 51 Kơnràñ hào ahò mơ bol khai, mơ càl ơm ngềt. Bol khai ai lơh crih-crài oă ngăn; 52 kơyoa bol khai neh ờ wă gơrềng bơh bañ, mơya nùs bol khai găm kră-kơldăng.
Hơ̆ jơnau đơ̆s Kơnràñ dê.
