Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Jo 5, 17-30
Đăl tam Jơnau Yălniăm niămgoh jăt Joan
17 Mơya Kơnràñ Jesu hơ wơl mơ bol khai: ‘‘Jơl tus tŭ do, Bàp Añ lơh broă, gen Añ krung lơh broă.” 18 Bơh hơ̆, bol Jude sơlơ jòi gùng gơsơt Kơnràñ, tài bơh Khai ờ di mìng lơh tìs mơ ngai sabbat lơm, mơya găm đơs Yàng lah Bàp Khai, lơh să Khai ndrờm mơ Yàng.
Jơnau đơs gơrềng bơh broă Yàng Kòn dê
19 Be hơ̆, Kơnràñ Jesu hơ wơl mơ đơs mơ bol khai: ‘‘Di ngăn, di ngăn, Añ đơs mơ bol mê: Kòn ờ rơgơi lơh bơta lơi bơh să tờm, dilah ờ gŏ Bàp lơh bơta hơ̆; tài bơh ală bơta lơi Bàp lơh, gen Kòn krung lơh ndrờm be hơ̆ sơl. 20 Kơyoa Bàp gơboh mơ Kòn, mơ sơnđio Kòn in jơh ală bơta Khai lơh, mơ rơp sơnđio Kòn in ală bơta dờng rơlau mơ ală bơta hơ̆, làng bol mê in ai lơh krơi. 21 Kơyoa Bàp tơngguh bol cau chơt mơ tơngkis be lơi, gen Kòn krung tơngkis bol cau lơi Khai kờñ be hơ̆ sơl. 22 Kơyoa Bàp ờ cah-rơña cau lơi, mơya neh ai Kòn in jơh bơta cah-rơña, 23 làng jơh ală cau duh-adăt Kòn be duh-adăt Bàp. Cau lơi ờ duh-adăt Kòn, gen ờ duh-adăt Bàp, lah Bơtau neh pơyoa Kòn tus. 24 Di ngăn, di ngăn, Añ đơs mơ bol mê: Cau lơi iăt jơnau Añ mơ pindờn dơ Bơtau neh pơyoa Añ tus, gen geh bơta kis rài rài mơ ờ tus tam bơta cah-rơña, mơya lòt găn bơh bơta chơt tus tam bơta kis. 25 Di ngăn, di ngăn, Añ đơs mơ bol mê: Jiờ neh tus, mơ lah tŭ do, tŭ bol cau chơt kơno săp Kòn Yàng dê, mơ bol cau lơi kơno, gen rơp kis. 26 Kơyoa Bàp geh bơta kis tam să tờm Khai be lơi, gen krung neh ai Kòn in geh bơta kis tam să tờm Khai be hơ̆ sơl; 27 mơ neh ai Khai in gơnoar cah-rơña, tài bơh Khai lah Kòn kòn-bơnus. 28 Bol mê bañ ai lơh krơi gơrềng bơh jơnau do, tài bơh neh tus jiờ, jiờ jơh ală cau ơm tam bơtô bồc, rơp kơno săp Khai; 29 mơ tŭ lik, bol cau lơi neh lơh bơta niăm, gen kis wơl làng kis, ai bol cau lơi neh lơh bơta iơh, gen kis wơl làng kong cah-rơña. 30 Añ ờ rơgơi lơh bơta lơi bơh să tờm Añ ; Añ cah-rơña jăt be Añ kơno, mơ bơta cah-rơña Añ dê lah song-ring, tài bơh Añ ờ jòi nùs-kờñ Añ dê, mơya lah nùs-kờñ Bơtau neh pơyoa Añ tus.
Hơ̆ jơnau đơ̆s Kơnràñ dê.
