Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Lk 13, 22-3
Đăl tam Jơnau Yălniăm niămgoh jăt Luka
Yàng săng-lời cau Israel ờ kơ̆-mềr, mơ hòi-jà làng-bol bơdìh.
22 Kơnràñ Jesu lòt găn ală bòn dờng mơ bòn dêt, bơto mơ guh hơ Jerusalem. 23 Geh cau đơs mơ Kơnràñ: ‘‘Ơ Kơnràñ, dŭt cau lơm geh tơngklàs ơ ?” Kơnràñ đơs mơ bol khai: 24 ‘‘Pơnđơl tĕ mut găn mpồng wêt, kơyoa Añ đơs mơ bol mê, geh gal cau rơp jòi gung mut mơ ờ rơgơi. 25 Tŭ cau tờm hìu neh ñă mơ neh til mpồng rau, gen bol mê sơntờm ntào hơ bơdìh, teh mpồng mơ đơs: ‘‘Ơ ồng, dăn pờ bol hi in”; mơ hơ wơl, khai đơs mơ bol mê: ‘‘Añ ờ git bol mê mbơh đah tus.” 26 Tŭ hơ̆, bol mê sơntờm đơs: ‘‘Bol hi neh ñô-sa dơđăp đi, mơ đi neh bơto tam ală gùng bol hi dê”; * 27 mơ khai rơp đơs mơ bol mê: ‘‘Añ ờ git bol mê mbơh đah tus; pleh ngài tĕ bơh añ, ơ jơh ală cau lơh bơta iơh-rơmơh.” 28 Tam hơ̆ rơp geh bơta ñìm-răc mơ rơkiăt sề, tŭ bol mê rơp gŏ Abraham, Isaak mơ Jakop mơ jơh ală cau ala-bơr tam lơgar Yàng, ai bol mê gen kong bơtrơh hơ bơdìh. 29 Bol khai rơp tus bơh đah măt tơngai lik mơ đah măt tơngai mut, bơh tô mơ jum, mơ ơm dơ cơnờng sào tam lơgar Yàng. 30 Mơ do, geh bol lồi-dut rơp gơs bol lài-jơh, mơ geh bol lài-jơh rơp gơs bol lồi-dut.”
Hơ̆ jơnau đơ̆s Kơnràñ dê.
