Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Jo 15, 9-17
Đăl tam Jơnau Yălniăm niămgoh jăt Joan
* 9 Be Bàp neh gơboh mơ Añ, Añ neh gơboh mơ bol kòn; bol kòn ơm tĕ tam bơta gơboh Añ dê. 10 Dilah bol kòn prăp ală jơnau sồr Añ dê, gen bol kòn ơm tam bơta gơboh Añ dê, be Añ neh prăp ală jơnau sồr Bàp Añ dê, mơ Añ ơm tam bơta gơboh Khai dê. 11 Añ đơs ală jơnau do bol kòn in, làng bơta chờhờp Añ dê ơm tam bol kòn, mơ bơta chờhờp bol kòn geh bềng lìu.
12 Do lah jơnau sồr Añ dê, lah bol kòn tam gơboh bal be Añ neh gơboh mơ bol kòn; 13 ờ geh cau lơi geh bơta gơboh dờng rơlau mơ cau phi màng kis he dê bơh bơyô he. 14 Bol kòn lah bơyô Añ dê, dilah bol kòn lơh jơnau Añ sồr bol kòn. 15 Añ neh ờ hòi bol kòn lah cau duh-broă, bơh cau duh-broă ờ git bơta cau tờm khai dê lơh; mơya Añ neh hòi bol kòn lah cau bơyô, bơh jơh ală bơta Añ neh kơno bơh Bàp Añ, gen Añ neh ai bol kòn in git. 16 Ờ di bol kòn neh rơwah Añ, mơya Añ neh rơwah bol kòn mơ neh bơtào bol kòn, làng bol kòn lòt mơ gơlik plai, mơ plai bol kòn dê gơ găm, làng bơta lơi bol kòn dăn mơ Bàp bơh sơnđăn Añ, gen Khai rơp pà bol kòn in. 17 Añ sồr bol kòn ală bơta hơ̆ làng bol kòn tam gơboh bal.
Hơ̆ jơnau đơ̆s Kơnràñ dê.
