Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Lk 1, 57-66
Đăl tam Jơnau Yălniăm niămgoh jăt Luka
Joan Baptista lik-deh
57 Tus tơngai deh, Elisabeth deh kòn klau. 58 Gơp-bòn mơ jơi-bơtiàn khai dê kơno lah, Kơnràñ neh sơnđio-tơlik nùs nđàc-sơngit Kơnràñ dê dơ khai, gen hờn-chờ bal mơ khai. 59 Gơlik gơs lah, tam ngai dơ̆ phàm, bol khai tus siăt gơltau oh-nga, mơ hòi oh-nga jăt be sơnđăn bàp khai dê lah Zakaria. 60 Hơ wơl, mè khai đơs : ‘‘Ờ di, mơya khai rơp geh hòi lah Joan.” 61 Bol khai đơs mơ khai: ‘‘Ờ geh cau lơi tam jơi-bơtiàn ai dê geh hòi mơ sơnđăn hơ̆.” 62 Bol khai lơh tềl bàp oh-nga in, mbe khai kờñ hòi oh-nga. 63 Khai dăn ai mpàn dêt mơ cih lah: ‘‘Sơnđăn khai lah Joan.” Mơ jơh tơl nă ai lơh krơi. 64 Tŭ hơ̆ mơ, bơr khai mơ mpiăt khai geh pờ, mơ khai đơs yalniăm Yàng. 65 Jơh ală cau gơp-bòn bol khai dê rơngòt, mơ jơh ală jơnau hơ̆ geh pơnrơ làm jơh ală tiah bơnơm Judea. 66 Jơh ală cau lơi kơno, gen prăp tam nùs mơ đơs: ‘‘Kòn dêt do rơp mbe lơi ?” Kơyoa tê Kơnràñ dê ơm bal mơ khai.
Hơ̆ jơnau đơ̆s Kơnràñ dê.
