Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Lk 1, 5-25
Đăl tam Jơnau Yălniăm niămgoh jăt Luka
Yal jơnau Zakaria in
5 Tam ală ngai Herode gơs bơtau Judea, geh cau lơh-yàng sơnđăn lah Zakaria tam ntum Abia, bao ùr khai lah dùl nă tam bol kòn ùr Aaron dê, mơ sơnđăn lah Elisabeth. 6 Jơh bàr nă lah bol song-dơpă dơđăp Yàng, cơnđoà lòt tam jơh ală jơnau sồr mơ ală broă song-dơpă Kơnràñ dê, ờ geh chi lơi pal lah-pơrhơng. 7 Bol khai ờ geh kòn, bơh Elisabeth lah cau kơnền, mơ jơh bàr nă neh jòng sơnăm rau.
8 Gơlik gơs lah, tam tŭ khai lơh-yàng dơđăp Yàng jăt bơta săp-rơndăp ntum khai dê, 9 jăt be jơnau ờs-mờng bol lơh-yàng dê mơ khai neh di khà, làng mut chu kơlhô tam hìu duh-khoai Kơnràñ dê; 10 mơ tam tŭ chu kơlhô, gen jơh mpồl làng-bol ơm răc dăn đah bơdìh. 11 Huềng-duh Kơnràñ dê tơnggŏ măt mơ khai, ntào đah ma cơnờng chu kơlhô; 12 Zakaria gŏ, gen ờ suk ơm, mơ bơta rơngòt gơgòm khai. * 13 Mơya huềng-duh đơs mơ khai: ‘‘Bañ rơngòt, ơ Zakaria, tài bơh jơnau răc dăn mê dê neh geh dờp rau, Elisabeth, bao ùr mê dê, rơp deh mê in kòn klau, mơ mê rơp hòi sơnđăn khai lah Joan. 14 Mê rơp geh chờhờp mơ hừh-hơh, mơ gal cau rơp geh chờhờp tam ngai deh khai dê: 15 kơyoa khai rơp gơs dờng dơđăp Kơnràñ, khai rơp ờ ñô tơrnờm mơ alăk, khai rơp geh bềng Yàng Nhơm bơh tam kơndul mè, 16 mơ khai rơp lăm gal kòn sau Israel rê wơl mơ Kơnràñ lah Yàng bol khai dê. * 17 Tờm khai rơp lòt lài dơđăp Kơnràñ tam Huềng Nhơm mơ pràn-gơnoar Elia dê, làng lăm nùs cau bàp rê wơl mơ oh kòn, bol ờ pindờn tus hơ bơta jăk-chài bol song-dơpă dê, rơcăng Kơnràñ in làng-bol niăm wil-tơl.” 18 Zakaria đơs mơ huềng-duh: ‘‘Mbơh añ git jơnau hơ̆ taih ? Kơyoa añ neh kra, mơ bao ùr añ neh jòng sơnăm rau.” 19 Hơ wơl, huềng-duh đơs mơ khai: ‘‘Añ lah Gabriel, ntào dơđăp Yàng, añ geh pơyoa tus đơs mơ mê, mơ yal jơnau yal niăm hơ̆ mê in. 20 Do mê rơp kloat, mơ rơp ờ rơgơi đơs, jơl tus ngai ală bơta hơ̆ gơlik gơs, tài bơh mê neh ờ pindờn ală jơnau đơs añ dê, lah ală jơnau rơp geh lơh wil-tơl tŭ tơngai gơ dê.”
21 Làng-bol ơm kơp Zakaria, mơ ai lơh krơi bơh bơta khai ơm jŏ tam hìu duh-khoai. 22 Tŭ lik, khai ờ rơgơi đơs mơ làng-bol, mơ bol khai git lah khai neh gŏ bơta gơtơnggŏ tam hìu duh-khoai; khai lơh tềl bol khai in mơ găm kloat.
23 Gơlik gơs lah, tŭ ală tơngai duh-broă khai dê neh sir-tơl, khai rê hìu. 24 Tơnơ̆ mơ ală ngai hơ̆, Elisabeth, bao ùr khai neh bun, mơ pồn să prăm kơnhai, mơ đơs: 25 ‘‘Kơnràñ neh lơh añ in be hơ̆, tam ală ngai Khai wèt sền tă-tơlik bơta bàssìl añ dê tam gùl ală cau.”
Hơ̆ jơnau đơ̆s Kơnràñ dê.
