Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Is 60. 1-6
Bơta gơklŏ Yàng dê gơlĭk hơ đăng mê.
Đăl tam sră Isaia, cau ala-bơr dê.
Ñă-ntào tĕ, pơnđàng àng tĕ, ơ Jerusalem! Bơh bơta àng mê dê neh tŭs, bơh bơta gơklŏ Kơnràñ dê neh phul-guh hơ đăng mê. Ne bơta klăm-jơngo găm gòm plai ù, mơ mhoal jù jơm ndơ̆p ală làng-bol, mơya hơ đăng mê Kơnràñ ñă-ntào, bơh bơta gơklŏ Khai dê gơlĭk hơ đăng mê. Ală làng-bol rơ̆p cơnđoà ràn jòi hơ bơta àng mê dê, mơ ală bơtau wèt hơ bơta àng drim mê dê. Tơngờ măt tĕ gùt-dăr mơ rơmê-sền tĕ: Jơh ală cau hơ̆ găm pơrjum, găm jòi tŭs mơ mê, ală kòn klau mê dê lòt tŭs bơh tiah ngài, mơ ală kòn ùr mê dê ñă-ntào bơh tơl đah wĕ. Tŭ hơ̆ mê rơ̆p rơmê-sền, mơ mê gơjềng hàng-bơnĕ, plai nùs mê rơ̆p hừh-hơh mơ rơ̆p gơprồ. Kơyoa bơh ală đăm-màng dà-lềng gơ ràn tŭs hơ mê, tô păs-gơsê ală làng-bol dê rơ̆p tŭs tam tê mê. Ală làk-đà gal ngăn ơm gùt-dăr mê, ală làk-đà dùl krium bơh lơgăr Mađian mơ Epha. Jơh ală cau bơh Saba lòt tŭs, bol khai rơpê pơnrơ bơr jờngrơ Kơnràñ.
Hơ̆ jơnau đơ̆s Kơnràñ dê.
Nrĭ-nrềng: 71. 1-2, 7-8, 10-11, 12-13
Hw: Ơ Kơnràñ, ală bol-lơgăr rơ̆p duh-khoai Đi.
Ơ Kơnràñ, dăn pà gơnoăr cahrơña ngăc-ngăr bơtau in, mơ pà bơta song-ring kòn bơtau dê in, làng khai cahrơña làng-bol Đi dê tam bơta song-ring mơ cahrơña cau rơbah-rơbừp tam bơta song-dơpă. Hw
Bơta song-dơpă mơ bơta ring-lơngai wil-tơl rơ̆p gơrề tam rơnàng khai dê jơl tŭs tŭ plai-bơnăng ờ gơsòl tai, mơ Khai rơ̆p ơm-ăt bơh dà-lềng do tŭs dà-lềng ne, bơh dà dờng tŭs lồi-dŭt plai ù. Hw
Bơh Khai rơ̆p tơngklàs cau rơbah-rơbừp bơ tê cau gơnoăr, mơ rơ̆p klàs cau kòl-yăn ờ geh cau dong-kờl. Khai rơ̆p nđàc-sơngĭt cau lơbơn-lơnhơ mơ cau siơ̆u-siăr, mơ tơngklàs să kĭs cau rơbah-dồn. Hw
Yălniăm sơnđăn khai jơl ală rài, sơnđăn khai găm wơl jŏ-jòng be măt-tơngai. Bơh khai, ală jơi-bơtiàn ù pơrgon rơ̆p geh yălniăm, mơ ală bol-lơgăr rơ̆p jờngrơ khai. Hw
Bơta đăl bàr: Ep 3. 2-3a, 5-6
Tŭ do geh gơlĭk lah ală làng-bol bơdìh geh pơdờn dùl bal bơr pơrgon.
Đăl tam sră Paulo, cau Dờp-pơyoa bơtoăh, pơyoa bol Epheso in.
Ơ oh mi, oh mi neh kơno gĭt be do: Yàng neh ai añ in broă tam pà bơta hàng goh oh mi in, lah jăt bơta pờ-tơlĭk, añ neh geh wă-wờng bơta ndơ̆p-ndơr, mơ kòn sau kòn-bơnŭs ală rơnàng ndai ờ geh gĭt, mơya tŭ do neh pờ-tơlĭk ală cau Dờp-pơyoa niămgoh Khai dê in, mơ ală cau ala-bơr in, kơnờm bơh Yàng Nhơm. Mơ kơnờm bơh Jơnau Yalniăm, ală làng-bol bơdìh geh pơdờn dùl bal, dùl bal să- jăn, mơ dùl bal geh bơnah mơ bơr pơrgon Khai dê, tam Kơnràñ Jesu Kristo.
Hơ̆ jơnau đơ̆s Kơnràñ dê.
ALLELUIA: Mt 2. 2
Alleluia, Alleluia. Bol hi neh gŏ sơrmañ Khai dê đah măt-tơngai lĭk, mơ bol hi tŭs duh-khoai Khai. Alleluia.
Jơnau Yălniăm:Mt 2. 1-12
Bơh đah măt-tơngai lĭk, bol hi tŭs duh-khoai Khai.
Đăl tam Jơnau Yălniăm niămgoh jăt Mattheo.
Tŭ neh deh rau Kơnràñ Jesu tam Bethlehem, lơgăr Juđea, tam rài bơtau Herođe, gen do bol Jăk-chài, bơh đah măt-tơngai lĭk, tŭs tam Jerusalem mơ đơ̆s: “Ntềng đah Bơtau bol Juđe pa deh ơm ? Bơh bol hi neh gŏ sơrmañ Khai dê đah măt-tơngai lĭk, mơ bol hi tŭs duh-khoai Khai.”
Kơno be hơ̆, bơtau Herođe ờ sŭk ơm, mơ jơh Jerusalem bal mơ khai; khai tơrgùm jơh ală cau ăt-bồ bol lơh-yàng dê mơ ală cau gơnoăr-cĭh làng-bol dê, lùp bol khai làng gĭt ntềng đah deh Kơnràñ Kristo. Bol khai đơ̆s mơ khai: “Tam Bethlehem, lơgăr Juđea. Bơh neh geh cau ala-bơr cĭh be do: “Mơ mê, ơ Bethlehem, tiah Juđa, ngăn mê ờ di dêt rơlau jơh tam ală bòn dờng Juđa dê; kơyoa bơh dơ mê rơ̆p lĭk cau lăm-bồ làng-bol Israel Añ dê.”
Tŭ hơ̆, Herođe hòi ờm bol Jăk-chài, lùp nền bol khai làng gĭt tŭ lơi sơrmañ neh lĭk bol khai in; mơ pơyoa bol khai tŭs tam Bethlehem mơ đơ̆s: “Bol mê lòt tĕ lùp nền gơrềng bơh oh-nga; mơ tŭ bol mê neh bàn rau, gen yăl wơl tĕ añ in, làng añ krung tŭs duh-khoai Khai.” Kơno bơtau đơ̆s be hơ̆, bol khai lĭk-lòt.
Mơ do sơrmañ bol khai neh gŏ đah măt-tơngai lĭk, lòt lài mơ bol khai, jơl tŭs tŭ gơ tŭs ơm hơ đăng anih oh-nga ơm. Gŏ sơrmañ, bol khai chờhờp-chờchờr oă ngăn. Mŭt tam hìu, bol khai gŏ oh-nga bal mơ Maria mè Khai, bol khai kun să duh-khoai Khai; mơ pờ ală kiăt bol khai dê, bol khai pơdơng Khai in ală phan, lah màh-biàng, cài trŭ mơ kơlhô. Mơ geh tờs mpau bañ wơl tai mơ Herođe, gen bol khai neh jăt gùng ndai rê wơl hơ lơgăr bol khai dê.
Hơ̆ jơnau đơ̆s Kơnràñ dê.
