Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Is 62. 11-12
Ndo Bơtau Tơngklàs ai tŭs.
Đăl tam sră Isaia, cau ala-bơr dê.
Do, Kơnràñ tơngklo làm khŏp plai ù be do: Đơ̆s tĕ mơ ùr-ruh Sion, ndo Bơtau Tơngklàs ai tŭs. Khai ià phan-jờng bal mơ Khai, mơ cồng-nha broă hơ đăp măt Khai. Ală cau geh Kơnràñ tơwài, cau rơ̆p hòi bol khai lah làng-bol niămgoh. Găm ai, ai rơ̆p geh hòi lah bòn dờng-màng, bòn ờ kong săng lời.
Hơ̆ jơnau đơ̆s Kơnràñ dê.
Nrĭ-nrềng: 96. 1 mơ 6, 11-12
Hw: Ngai do, bơta àng sòl-pơnđàng hơ đăng he, mơ Kơnràñ neh lĭk-lìng he in.
Kơnràñ ơm-ăt, plai ù sơnđoh-ñchừn tĕ, ală bồt, rơhờn tĕ. Ală tăp trồ yal-pơnrơ bơta song-dơpă Kơnràñ dê, mơ ală làng-bol rơ̆p gŏ bơta gơklŏ Khai. Hw
Bơta àng neh gơlĭk cau song-dơpă in, mơ bơta rơhờn rơ̆p tŭs mơ cau nùs niăm. Ơ bol cau song-dơpă, rơhờn tĕ tam Kơnràñ, mơ yalniăm sơnđăn niămgoh Khai. Hw
Bơta đăl bàr: Tt 3. 4-7
Kơnràñ neh tơngklàs he jăt nùs tơpă-tơpài Khai dê.
Đăl tam sră Paulo, cau Dờp-pơyoa bơtoăh, pơyoa Tito in.
Tŭ Bơtau Tơngklàs, Kơnràñ he, neh sơnđio nùs tơpă-tơpài mơ niămlơnhơn Khai, gen ờ di bơh ală broă song-dơpă mơ he lơh gơ̆s, mơya bơh nùs tơpă-tơpài Khai dê, mơ Khai neh tơngklàs he, bơh tềl pơnđum deh wơl, mơ bơta tơnpa wơl Yàng Nhơm dê, Bơtau mơ Khai neh tŭh bềng-lìu hơ đăng he, tam Jesu Kristo, Bơtau Tơngklàs he, làng dơ̆ tŭ geh pơnsong-dơpă bơh bơta hànggoh Khai dê, tam bơta kơnờm, he geh pơdờn bơta kĭs rài rài, tam Jesu Kristo, Kơnràñ he.
Hơ̆ jơnau đơ̆s Kơnràñ dê.
ALLELUIA: Lk 2.14
Alleluia, Alleluia. Gơklŏ Yàng tam kơloàng trồ, mơ tam tiah ring-lơngai bol cau di nùs Yàng. Alleluia.
Jơnau Yălniăm: Lk 2. 15-20
Bol ê belàt neh bàn gŏ Maria, Joseph mơ oh-nga.
Đăl tam Jơnau Yălniăm niămgoh jăt Luka.
Gơlĭk gơ̆s lah, tŭ bol huềng-duh lời bol ê belàt rê hơ trồ, gen bol ê belàt đơ̆s bal: “Bol he lòt lă tŭs hơ Bethlehem mơ sền bơta neh gơlĭk gơ̆s, mơ Kơnràñ neh ai bol he in gĭt.” Bol khai sơrbăc-sơrbăng lòt tŭs mơ bàn gŏ Maria, Joseph mơ oh-nga tơmbĭc tam bòng ñhơ̆t. Gŏ be hơ̆, bol khai yal wơl bơta neh yal bol khai in bơh oh dêt do. Jơh ală cau lơi kơno, gen ai lơh krơi bơh ală bơta bol ê belàt neh yal mơ bol khai. Ai Maria gen prăp jơh ală jơnau hơ̆ mơ kơlôi-sơnơng tam nùs. Bol ê belàt rê wơl, tơngklŏ mơ jơngrơ Yàng bơh jơh ală bơta bol khai neh kơno mơ neh gŏ, jăt be neh yal mơ bol khai.
Hơ̆ jơnau đơ̆s Kơnràñ dê.
