Lèh Plai Nùs Kơnràñ Jesu

Bơta đăl dùl: Os 11. 1, 3-4, 5c, 8ac-9

Plai nùs Añ ờ sŭk ơm.

Đăl tam sră Ose, cau ala-bơr dê.

Do Yàng đơ̆s: Tŭ Israel găm kơnòm, Añ neh gơboh mơ khai, mơ Añ neh hòi kòn Añ lĭk bơh lơgăr Ejypto. Añ neh siăm-ròng Ephraim, Añ neh kơnđu bol khai tam tê Añ mơ bol khai ờ gĭt Añ căm-gàr bol khai. Añ neh ngui che lơbơn mơ nùs gơboh làng bơto bol khai lòt, Añ wèt lơh mơ bol khai be cau siăm-ròng oh nga, Añ neh mă-ơsơh bol khai dơ trơmồ. Añ sơrkềng să hơ đăng bol khai mơ tơmăm bol khai in sa. Ơ Ephraim, mbe lơh mơ Añ rơgơi săng mê wơl ? Ơ Israel, mbe lơh mơ Añ rơgơi jào mê wơl ? Mbe lơh mơ Añ rơgơi wèt lơh mơ mê balĕ bal mơ Adma ? Mbe lơh mơ Añ lơh mê in be Seboim in taih ? Plai nùs Añ ờ sŭk ơm tam Añ, mơ pròc-klờm Añ gơ êt-sơềl. Añ rơ̆p ờ lời dò jăt nùs gơjrañ Añ dê. Añ rơ̆p ờ tơnroh Ephraim, bơh Añ gơ̆s Yàng ờ di lah cau dunia wơl. Añ gơ̆s Bơtau Niămgoh ơm tam gùl mê, Añ ờ kờñ tơnchơ̆t.

Hơ̆ jơnau đơ̆s Kơnràñ dê.

 

Nrĭ-nrềng: Is 12. 2-3, 4bcd, 5-6

Hw: Bol mê rơ̆p chờhờp bơ̆ dà tam croh Bơtau Tơngklàs dê.

Do Yàng gơ̆s Bơtau Tơngklàs añ, añ rơ̆p pindờn làng lơh-lòt mơ ờ nrơ̆t ngòt, bơh Kơnràñ gơ̆s bơta pràn, gơ̆s Bơtau añ jờngrơ, Khai rơ̆p gơjềng bơta tơngklàs añ in. Hw

Yălniăm tĕ Kơnràñ mơ hòi-dăn sơnđăn Khai, yăl-tơnggĭt tĕ ală làng-bol in gĭt broă krơi-sơrbơi Kơnràñ dê, kah wơl tĕ sơnđăn Khai màng-rơyŭ ngăn. Hw

Jờngrơ tĕ, bơh Khai neh lơh gơ̆s ală broă krơi-sơrbơi, yăl-pơnrơ tĕ broă hơ̆ làm khŏp ù-tiah. Ơ cau ơm kĭs tam Sion, sơnđoh-ñchừn mơ đơ̆scrĭh tĕ, bơh Bơtau Dờng Rơlau Jơh gơ̆s Bơtau Niămgoh Israel dê ơm tam gùl mê. Hw

 

Bơta đăl bàr: Ep 3. 8-12, 14-19

Gĭt nùs gơboh Kristo dê lèt-găn rơlau mơ bồ-tồr gĭt-wă kòn-bơnŭs dê.

Đăl tam sră Paulo, cau Dờp-pơyoa bơtoăh, pơyoa bol Epheso in.

Ơ oh mi kờñ-gơboh, añ gơ̆s cau ờdiă-ờdiơng rơlau jơh tam bol niămgoh, mơya neh geh bơta niăm do, lah yăl-bơto làng-bol bơdìh in ală bơta păs-gơ̆s ờ rơgơi wă wơl, mơ sòl-pơnđàng ală cau in gĭt gùng tam pà bơta ndơ̆p-ndơr neh geh pồn-ndơ̆p bơh rài rài tam Yàng, Bơtau tờm crơnggơ̆s ală phan jơi, tiăn ală huềng-ăt-bồ mơ huềng-gơnoăr lơgăr trồ pal kơnờm lơm dơ Pơrjum-niăm, gen rơgơi gĭt wơl bơta ngăc-ngăr tơl srăp tơl gùng Yàng dê, khăt gơ jăt bơta rơndăpkơlôi bơh lài ală rài, mơ Khai neh lơh gơ̆s tam Jesu Kristo, Kơnràñ he. Tam Khai he geh gơn-kơnờm, mơ bơh nùs pindờn dơ Khai, he chăm-cha tŭs mơ Khai. Bơh bơta hơ̆, añ cùn-kơltăng dơ đăp măt Bàp Jesu Kristo, Kơnràñ he. Khai gơ̆s tơnggu-me ală sơnđăn-să gơ̆s bàp tam trồ mơ tam tiah. Dăn Khai khăt jăt bơta păs-gơ̆s gơklŏ Khai dê, mơ kơnờm bơh Yàng Nhơm Khai dê, tơmpràn tai oh mi in geh gơjềng cau đah huềng, mơ kơnờm bơh bơta pindờn, oh mi geh Kơnràñ Kristo ơm tam nùs oh mi, lơh oh mi in sro jrô rơyăs, mơ bơtào kơnhăp tam bơta gơboh, làng oh mi geh tam klăc bal mơ bol niămgoh mơ gĭt-wă đah anàng, jòng, jơnhoa, jrô, mơ krung gĭt nùs gơboh Kristo dê lèt găn rơlau mơ bồ-tồr gĭt-wă kònbơnŭs dê, làng oh mi geh păs-gơ̆s tam ală bơta niăm wil-tơl Yàng dê.

Hơ̆ jơnau đơ̆s Kơnràñ dê.

 

ALLELUIA: Mt 11. 29ab

Alleluia, Alleluia. Bol mê tui tĕ yô Añ dê, bơsrăm tĕ mơ Añ, kơyoa Añ niăm-lơnhơn mơ pơndêt să. Alleluia.

Jơnau Yălniăm: Jn 19. 31-37

Dùl nă cau ling ai tà srơ̆p dơ wĕ Khai dê, gen gơlĭk mơ mhàm mơ dà.

Đăl tam Jơnau Yălniăm niămgoh jăt Joan.

Bơh lah ngai Rơcăng Lài, làng ală bồc ờ găm tai dơ chikal tam ngai sabbat, kơyoa ngai sabbat hơ̆ lah ngai dờng, tàng bol Juđe dăn mơ Pilato ai pờng pă ală ntìng kơrgòs bol kong tơ̆s mơ tơmù bol khai. Be hơ̆, bol ling tŭs mơ pờng pă ală ntìng kơrgòs cau sơnrờp mơ cau ne kong tơ̆s dơ chikal bal mơ Kơnràñ; tŭ bol khai tŭs hơ Kơnràñ Jesu, gŏ Khai neh chơ̆t rau, gen bol khai ờ pờng pă ală ntìng kơrgòs Khai dê, mơya dùl nă tam bol ling ai tà srơ̆p dơ wĕ Khai dê, gen gơlĭk mơ mhàm mơ dà. Cau sền gŏ, neh lơh cơng, mơ cơng khai dê ngăn-ngồn, mơ khai gĭt lah khai đơ̆s ngăn-ngồn, làng bol mê krung pindờn. Ală bơta do neh gơlĭk gơ̆s, làng Sră Goh gơlĭk gơ̆s wil-tơl: “Ờ dùl nơm ntìng lơi Khai dê rơ̆p kong pă”, mơ jơnau ndai tam Sră Goh đơ̆s: “Bol khai rơ̆p sền dơ cau bol khai neh srơ̆p blŭh.”

Hơ̆ jơnau đơ̆s Kơnràñ dê