Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Is 52. 7-10
Làm khŏp plai ù rơ̆p sền gŏ bơta tơngklàs Yàng he dê.
Đăl tam sră Isaia, cau ala-bơr dê.
Hàng ngăn jơng cau lòt yal jơnau hơ đăng bơnơm, cau yal jơnau ring-lơngai, cau yal jơnau yălniăm, cau yal jơnau tơngklàs, dơ̆s mơ Sion be do: Yàng mê dê rơ̆p ơm-ăt! Săp cau drơng-gàr mê dê neh gơlĭk. Bol khai rơ̆p bal bal jơngrơ be do: Tờm măt bol khai rơ̆p sền gŏ, tŭ Kơnràñ cèng Sion rê wơl. Ơ Jerusalem ngềt-srau, chờhờp tĕ, bal bal jơngrơ tĕ, bơh Kơnràñ neh pơndờm-pơnđiăng làngbol Khai, neh tơwài Jerusalem. Kơnràñ neh răk tơlĭk tê niămgoh Khai dê dơ đăp măt ală làng-bol, mơ làm khŏp plai ù rơ̆p sền gŏ bơta tơngklàs Yàng he dê.
Hơ̆ jơnau đơ̆s Kơnràñ dê.
Nrĭ-nrềng: 97. 1, 2-3ab, 3cd-4, 5-6
Hw: Làm khŏp plai ù neh sền gŏ bơta tơngklàs Yàng he dê.
Đơ̆scrĭh jơng tĕ Kơnràñ dùl jơnau đơ̆scrĭh pa, bơh Khai neh lơh gơ̆s ală broă krơi-sơrbơi. Tê ma Khai neh cèng wơl bơta phalin, bal mơ đăh tê niămgoh Khai dê. Hw
Kơnràñ neh yal-tơlĭk bơta tơngklàs, neh sơnđio bơta song-dơpă Khai dê dơ đăp măt ală làng-bol.33 Khai neh kah wơl nùs sơrmah-sơrmài mơ dờn-song bal mơ hìu Israel. Hw
Ală làng-bol làm khŏp plai ù neh sền gŏ bơta tơngklàs Yàng he dê. Jơh mơ plai ù driau-gờm tĕ Kơnràñ, Chờhờp-chờchờr tĕ mơ tĕh kơlñi. Hw
Đơ̆scrĭh gờ tĕ Kơnràñ mơ kơlñi, bal mơ kơlñi, mơ ală săp ntăs rơwăc-rơwờl. Uh tĕ kơwào mơ kơluờk, rơhờn dơ đăp măt niămgoh Kơnràñ gơ̆s Bơtau. Hw
Bơta đăl bàr: Juđea 1. 1-6
Kơnràñ neh yal-bơto he tam cau Kòn.
Sơntờm sră Paulo, cau Dờp-pơyoa bơtoăh, pơyoa bol Juđea in.
Yau òr, rà dơ̆ mơ rà gùng, Yàng neh yal-bơto ồng pàng he găn bol ala-bơr. Tam ală ngai lồi-dŭt do, Khai neh yal-bơto he găn cau Kòn, mơ Khai neh bơtào gơ̆s cau pơdờn jơh ală jơi phan, mơ krung bơh cau Kòn mơ Khai neh crơnggơ̆s trồ tiah. Kòn do ờs sòl wơl bơta gơklŏ mơ gơ̆s rùp-rài bơta ĭs Khai dê, cau Kòn hơ̆ đơng-kừh ală phan jơi mơ bơr gơnoăr he dê, pơ̆s kloh tìs-glài he dê, mơ nggui đah ma Bơtau Dờng Rơlau Jơh hơ đăng trồ jơnhoa. Sơnđăn Khai dờng-màng rơlau mơ bol huềng-duh be lơi, gen Khai krung lèt rơlau mơ bol huềng-duh be hơ̆ sơl. Ngăn, bơh geh tŭ lơi Yàng neh đơ̆s mơ dùl tam bol huềng-duh be do: “Kòn gơ̆s Kòn Bàp dê, ngai do Bàp neh deh-dùh Kòn.” Lồc gen Yàng đơ̆s tai: “Añ rơ̆p gơ̆s Bàp Khai, mơ Khai rơ̆p gơ̆s Kòn Añ.” Mơ tŭ jào Kòn Dùl he dunia in, Yàng đơ̆s tai be do: “Jơh ală bol huềng-duh Yàng dê duh-khoai tĕ Khai.”
Hơ̆ jơnau đơ̆s Kơnràñ dê.
ALLELUIA: Alleluia, Alleluia. Ngai niămgoh neh pơnđàng àng hơ đăng he, ơ ală làng-bol, tŭs tĕ duh-khoai Kơnràñ, bơh ngai do, àng rừng-ràng neh pơnđàng hơ đăng plai ù. Alleluia.
Jơnau Yălniăm: Jo 1. 1-18.
Jơnau Đơ̆s neh gơ̆ poăc-să mơ neh ơm tam gùl bol he.
Sơntờm Jơnau Yălniăm niămgoh jăt Joan.
Bơh sơnrờp neh geh Jơnau Đơ̆s, mơ Jơnau Đơ̆s ơm dơ Yàng, mơ Jơnau Đơ̆s lah Yàng. Khai neh geh bơh sơnrờp dơ Yàng. Jơh ală bơta bơh Khai mơ neh geh lơh gơ̆s, mơ ờ geh Khai gen ờ chi lơi neh geh lơh gơ̆s, geh lơh gơ̆s; tam Khai geh bơta kĭs, mơ bơta kĭs lah bơta àng kòn-bơnŭs dê, mơ bơta àng pơnđàng tam bơta jơngo, mơ bơta jơngo ờ wă-dờp bơta àng. Geh dùl nă cau Yàng pơyoa tŭs, sơnđăn lah Joan; khai neh tŭs gơ̆s cơng, làng lơh cơng gơrềng bơh bơta àng, làng jơh ală cau bơh khai mơ pindờn. khai ờ di lah bơta àng, mơya làng lơh cơng gơrềng bơh bơta àng. Hơ̆ lah bơta àng ngăn, tŭs tam dunia pơnđàng tơl nă cau in. Bơta àng neh ơm tam dunia, mơ dunia bơh Khai mơ neh geh lơh gơ̆s, mơ dunia neh ờ gĭt Khai. Khai neh tŭs tam hìu Khai dê, mơ ală cau Khai dê neh ờ wă-rò Khai. Ai bol cau lơi neh dờp Khai, gen Khai pà bol khai in gơnoăr gơ̆s kòn Yàng dê, hơ̆ lah bol cau pindờn dơ sơnđăn Khai dê, bol hơ̆ deh ờ di bơh mhàm, krung ờ di bơh nùs-kờñ poăc-să dê, krung ờ di bơh nùs-kờñ cau klau dê, mơya bơh Yàng. Jơnau Đơ̆s neh gơ̆s poăc-să mơ neh ơm tam gùl bol he; mơ bol hi neh gŏ bơta gơklŏ Khai dê, bơta gơklŏ be Kòn Dùl dê bơh dơ Bàp, bềng bơta hànggoh mơ bơta ngăn-ngồn. Joan lơh cơng gơrềng bơh Khai mơ nggà đơ̆s: “Do lah Bơtau mơ añ neh đơ̆s: Cau rơ̆p tŭs tơnơ̆ añ, lèt rơlau mơ añ, tài bơh neh geh lài mơ añ.” Bơh bơta bềng-lìu Khai dê, jơh ală bol he neh dờp bơta hànggoh do tŭs bơta hànggoh ne; tài bơh Gùng-boh-lăm neh geh pà bơh Moise, ai bơta hànggoh mơ bơta ngăn-ngồn geh lơh gơ̆s bơh Kơnràñ Jesu Kristo. Yàng, ờ tŭ lơi cau lơi neh gŏ; Kòn Dùl lah Yàng, lah Bơtau ơm tam nùs Bàp, tờm Khai neh yaltơnggĭt.
Hơ̆ jơnau đơ̆s Kơnràñ dê.
