Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: 9. 1-6
Kơnràñ pà Kòn Khai dê he in.
Đăl tam sră Isaia, cau ala-bơr dê.
Làng-bol lòt tam klăm-jơngo, neh sền gŏ bơta àng rừng-ràng. Bơta àng neh phul gơcrà hơ đăng bol cau ơm kĭs tam tiah mbur jơngo bơta chơ̆t. Kơnràñ neh lơh làng-bol in gơsê dờn g ngăn, mơ ờ lơh dờng bơta chơhø ờp sơl ơ. Bol khai rơ̆p chờhờp dơ đăp măt Kơnràñ, be cau chờhơpø tam kàl tơwès kòi, be bol cau phalin chờhờp bơh phan geh bơh tam lơh, tŭ cèng phan hơ̆ rê tam pà bal. Bơh yô kơnjơ̆ hơ đăng să khai, gơnsàng ơm hơ đăng pơnì khai, gai kuềt gơnoăr cau rồn-bơklơn dê … Kơnràñ rơpê tơnlề, be tam ngai phalin Madian.
Kơyoa ală khŏ jă-ntrơm cau phalin dê, ală ào iŭ sùh mhàm, rơ̆p kong chu tơn mơ gơjềng phan ròng ồs. Bơh dùl nă oh nga neh deh-dùh hi in, mơ dùl nă cau kòn neh geh pà hi in. Khai neh dờn-dờp gơnoăr bơtau hơ đăng pơnì, mơ cau rơ̆p hòi sơnđăn Khai lah “Cau Đơs ê-dong krơi-sơrbơi, Yàng rơyŭ-rơyùm, cau Bàp gơ̆s sùm, cau Bơtau lơngai”. Khai rơ̆p pờ anàng gơnoăr Bơtau, mơ bơta ring-lơngai rơ̆p ờ lồi; Khai rơ̆p ơm-ăt hơ đăng sơbàn bơtau Đavit dê, mơ tam lơgăr bơtau Khai, làng tơngkơ̆ mơ tơmpràn, tam bơta song-dơpă, tờm bơh tŭ do mơ jơl tŭs ală rài. Nùs boăhgơboh Kơnràñ mpồl pràn dê rơ̆p lơh gơ̆s bơta hơ̆.
Hơ̆ jơnau đơ̆s Kơnràñ dê.
Nrĭ-nrềng: 95. 1-2a,2b-3, 11-12a, 12b-13
Hw: Ngai do, neh deh bol mê in Bơtau Tơngklàs, lah Kristo Kơnràñ.
Jờngrơ tĕ Kơnràñ mơ dùl jơnau đơ̆scrĭh pa, ơ trồ-tiah, jờngrơ tĕ Kơnràñ, jờngrơ tĕ Kơnràñ, tơngklŏ sơnđăn niămgoh Khai. Hw
Ngai pah ngai, yal-pơnrơ tĕ bơta tơngklàs Khai dê, yal-pơnrơ tĕ bơta gơklŏ Khai tam gùl ală lơgăr, mơ ală broă krơi-sơrbơi Khai tam gùl ală làng-bol. Hw
Ală tăp trồ rơhờn tĕ, mơ plai ù sơnđoh-ñchừn tĕ, dà-lềng mơ ală jơi kĭs tam hơ̆ gơ ntrờn tĕ, mìr sre mơ ală chi-che tam hơ̆ chờhờp tĕ. Hw
Ơ ală chi-che brê-dơr, driau-gờm tĕ dơ đăp măt Kơnràñ, bơh Khai tŭs cahrơña dunia, Khai rơ̆p cahrơña trồ-tiah tam bơta song-ring, mơ cahrơña ală làng-bol jăt jơnau-ngăn Khai dê. Hw
Bơta đăl bàr: Tt 2. 11-15
Bơta hànggoh Kơnràñ dê neh tŭs mơ jơh ală cau.
Đăl tam sră Paulo, cau Dờp-pơyoa bơtoăh, pơyoa ồng Tito in.
Bơta hànggoh Yàng dê, Bơtau Tơngklàs he, neh gơlĭk ală cau in, bơto he săng-lời bơta thừ-blơ̆ mơ nùs hàm-hà dunia, làng kĭs kơrhia, song-ring mơ duhmềr tam dunia do, tŭ kơ̆p-càng bơta kơnờm bơtoăh, mơ broă tơlĭk bơta gơklŏ Jesu Kristo dê, gơ̆s Yàng dờng-rơyŭ mơ gơ̆s Bơtau Tơngklàs he. Khai neh jào să30 he in, làng tơngklàs he bơh ală bơta iơ̆h-blơ̆, tơngkloh he gơjềng dùl làng-bol di pal Khai dê, dùl làng-bol mềr-nùs lơh broă niăm.
Hơ̆ jơnau đơ̆s Kơnràñ dê.
ALLELUIA: Lk 2. 10-11
Alleluia, Alleluia. Añ yal bol mê in bơta chờhờp dờng: Ngai do neh deh bol mê in Bơtau tơngklàs, lah Kristo Kơnràñ. Alleluia.
Jơnau Yălniăm: Lk 2. 1-14
Ngai do, Bơtau Tơngklàs, neh deh-dùh oh mi in.
Đăl tam Jơnau Yălniăm niămgoh jăt Luka.
Gơlĭk gơ̆s lah, tam ală ngai hơ̆, Sesare Augusto tơlĭk sră, sồr jơh lơgăr dunia pal cĭh sơnđăn măt. Bơta cĭh sơnđăn măt dơ̆ sơnrờp do gơlĭk gơ̆s tam tŭ Quirino gơ̆s cau ăt-bồ Syria. Jơh ală cau lòt yal sơnđăn măt kờp nă tam bòn dờng he dê. Bơh bòn dờng Nazareth tam Galilea, Joseph guh hơ bòn dờng Đavit, hòi lah Bethlehem, tam Juđea, tài bơh Khai lah bơh hìu-bơnhă mơ jơi-bơtiàn Đavit, làng yal sơnđăn măt bal mơ Maria, neh hơ bau mơ khai, găm bun.
Gơlĭk gơ̆s lah, tŭ bol khai ơm tềng hơ̆, gen ngai Maria deh neh tŭs. Maria deh kòn klau tơnruh, ai ồi klơm khai mơ tơmbĭc khai tam bòng ñhơ̆t, tài bơh ờ geh anih bol khai in tam hìu apah. Tam kơnhoàl hơ̆, geh ală cau ê belàt ơm drơng măng mơ khiă-gàr mpồl belàt bol khai dê. Huềng-duh Kơnràñ dê ntào rềp mơ bol khai, mơ bơta gơklŏ Kơnràñ dê gơcrà gùt-dăr bol khai, mơ bol khai rơngòt-rơngơ̆t ngăn.
Huềng-duh đơ̆s mơ bol khai: “Bol mê bañ rơngòt; kơyoa do añ yal bol mê in bơta chơhờp dờng, krung lah bơta chờhờp dờng jơh làng-bol in, tài bơh ngai do, tam bòn dờng Đavit dê, neh deh bol mê in Bơtau Tơngklàs, lah Kristo Kơnràñ. Mơ do lah tềl bol mê in: bol mê rơ̆p bàn gŏ oh-nga, geh klơm mơ ồi mơ tơmbĭc tam bòng ñhơ̆t.” Mơ nisơna, bal mơ huềng-duh, geh mpồl gal ling tam trồ jờngrơ Yàng mơ đơ̆s: “Gơklŏ Yàng tam kơloàng trồ, mơ tam tiah ring-lơngai bol cau di nùs Yàng.”
Hơ̆ jơnau đơ̆s Kơnràñ dê.
