Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Hc 3. 2-6, 12-14
Cau lơi duh-ngòt Yàng gen duh-adăt me-bàp.
Đăl tam sră Bơto jơnau niăm dê.
Yàng tơngklŏ cau bàp tam oh kòn, Khai tơngkơ̆ gơnoăr cau me hơ đăng mpồl oh kòn. Cau lơi gơboh mơ bàp he, gen rơmăl wơl tìs-glài, cau lơi duh-adăt me he, gen be cau trơgùm wơl dùl đăm-màng. Cau lơi duh-adăt bàp he, rơ̆p geh chờhờp tam oh kòn. Tŭ răc-dăn, cau hơ̆ rơ̆p geh dờp bơr. Cau lơi duh-adăt bàp he, rơ̆p geh kĭs jŏ-jòng. Cau lơi dờn bơr bàp, rơ̆p tơnchờ nùs me. Ơ cau lah kòn, tui tĕ sơnăm kra bàp mê dê, bañ lơh moăt nùs khai, tŭ khai găm kĭs. Dilah tơngoh khai huời-huơr, gen pơha tĕ nùs, mê gơ̆s cau kơnòm pràn, bañ sền ờ sơ̆p khai. Bơh phan ai bàp in, rơ̆p ờ gŏ roh-rui, mơ rơ̆p rơmăl wơl tìs-glài.
Hơ̆ jơnau đơ̆s Kơnràñ dê.
Nrĭ-nrềng: 127. 1-2, 3, 4-5
Hw: Bơtoăh ngăn cau lơi duh-ngòt Kơnràñ, mơ ơm kĭs jăt gùng-dà Khai dê.
Bơtoăh ngăn cau lơi duh-ngòt Kơnràñ, mơ ơm kĭs jăt gùng-dà Khai dê. Mê rơ̆p dờp-dờn cồng-nha broă bơh tê mê, mê geh bơtoăh mơ rơ̆p bàn bơta niăm. Hw
Bơùr mê be tờm ño rơ̆ plai tam hìu-bơnhă mê. Oh kòn mê be cồng-bơnung tờm klòng ơm gùt-dăr cơnờng sa mê dê. Hw
Hơ̆ lah bơta yalniăm cau duh-ngòt Kơnràñ in. Bơh Sion, dăn Kơnràñ yalniăm mê in. Wờl-kờñ mê in gŏ bơta păs-gơ̆s Jerusalem jơh ală ngai tam rài kĭs mê. Hw
Bơta đăl bàr: Kl 3. 12-21
Gơrềng bơh rài kĭs hìu-bơnhă tam Kơnràñ.
Đăl tam sră Paulo, cau Dờp-pơyoa bơtoăh, pơyoa bol Kolosse in.
Ơ oh mi kờñ-gơboh, be bol cau geh rơwăh Yàng dê, bol cau niămgoh mơ geh gơboh, oh mi soh tĕ ală nhơm-nùs tơpă-tơpài, niăm-lơnhơn, pơndêt-să, rămsòr, kơ̆-nùs, tam kong ơ̆t bal, mơ tam hồ-lời tĕ bal, dilah cau do geh jơnau pal oàn-gơjrañ mơ cau ne. Be Kơnràñ neh hồ-lời oh mi in, oh krung tam hồ-lời tĕ bal. Mơ hơ đăng jơh ală bơta, oh mi geh tĕ bơta gơboh, gen lah che kơ̆t bơta niăm wiltơl. Kơ̆p dăn bơta ring-lơngai Kơnràñ Kristo dê ăt-bồ tam nùs oh mi, bôta ringlơngai mơ oh mi neh geh hòi jà tŭs làng lơh gơ̆s dùl să-jăn.
Oh mi ưn-ngài tĕ Yàng. Kơ̆p dăn bơr Kơnràñ Kristo ơm lìu-làc tam oh mi; Bal mơ jơh ală bơta ngăc-ngăr, oh mi bơsrăm mơ tam bơtăn tĕ bal. Ngui tĕ ală bơta nrĭ-nrềng, ală jơnau đơ̆s jờng mơ ală bơta đơ̆scrĭh đah huềng bal mơ nùs kah-ưn, làng đơ̆scrĭh gờm Yàng tam nùs oh mi. Mơ jơh ală chi lơi oh mi lơh, tam bơr đơ̆s krung be tam broă lơh, jơh ală bơta, oh mi lơh tĕ bơh sơnđăn Kơnràñ Jesu Kristo, kơnờm bơh Khai mơ ưn-ngài Yàng Bàp.
Ơ ală cau bơùr, dờn-duh tĕ bơklau di gùng tam Kơnràñ. Ơ ală cau bơklau, gơboh tĕ bơùr he, bañ đơ̆s joh-yoăm khai. Ơ ală cau kòn, dờn bơr tĕ me bàp tam ală bơta, bơh gơ gen lah niăm nùs Kơnràñ. Ơ ală cau bàp, bañ hào gơjrañ mơ oh kòn, mbài bol khai cù-kìr ngòt-rơngơ̆t.
Hơ̆ jơnau đơ̆s Kơnràñ dê.
ALLELUIA: Kl 3. 15a, 16a
Alleluia, Alleluia. Kơ̆p dăn bơta ring-lơngai Kơnràñ Kristo dê ăt-bồ tam nùs oh mi. Kơ̆p dăn bơr Kơnràñ Kristo ơm lìu-làc tam oh mi.Alleluia.
Yălniăm : Lk 2. 41-52
Bàr nă bàn Khai nggui tam gùl bol jăk-chài.
Đăl tam Jơnau Yălniăm niămgoh jăt Luka.
Pah sơnăm, me bàp Kơnràñ dê lòt tŭs hơ Jerusalem tam ngai lèh Lòt Găn. Tŭ Kơnràñ neh jơ̆t bàr sơnăm, bol khai guh tềng hơ̆ jăt be bơta ờ-mờng ngai lèh dê, lồc ală ngai hơ̆, tŭ bol khai rê wơl, gen oh dêt Jesu ơm wơl tam Jerusalem, mơ me bàp Khai ờ gĭt. Tồn lah oh dêt ơm tam ntum cau rê, bol khai neh lòt dùl ngai gùng, gen lùp-jòi Khai tam gùl bol jơi-bơtiàn mơ gơ̆p-bòn; mơ ờ bàn, tàng bol khai rê wơl hơ Jerusalem jòi Khai.
Gơlĭk gơ̆s lah, tơnơ̆ mơ pe ngai, bol khai bàn Khai tam hìu duh-khoai, nggui tam gùl bol jăk-chài, iăt bol khai mơ lòt bol khai; Jơh ală cau kơno Khai, gen ai lơh crĭh-crài bơh bơta jăk-chài mơ ală jơnau hơ wơl Khai dê. Dơ̆ gŏ Khai, bol khai ai lơh krơi, mơ mè Khai đơ̆s mơ Khai: “Ơ kòn, ñchi mê lơh bol hi in be hơ̆ taih ? Do bàp mê mơ añ moăt-kơnòl jòi mê.”
Khai đơ̆s mơ bol khai: “Ñchi gơlơh me bàp jòi añ taih ? Me bàp ờ gĭt lah añ pal lơh ală broă Bàp añ dê ơ ?” Bol khai ờ wă jơnau Khai đơ̆s mơ bol khai. Khai mù bal mơ bol khai, tŭs tam Nazareth mơ dờn-duh bol khai. Mè Khai prăp jơh ală jơnau hơ̆ tam nùs. Kơnràñ Jesu gơguh tam bơta jăk-chài, tam să-bồ, mơ tam bơta hànggoh dơ đăp Yàng mơ dơ đăp cau.
Hơ̆ jơnau đơ̆s Kơnràñ dê.
