Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Is 62. 1-5
Mê niăm nùs Kơnràñ.
Đăl tam sră Isaia, cau ala-bơr dê.
Bơh Sion, añ rơ̆p ờ thĭt bơr, mơ bơh Jerusalem, añ rơ̆p ờ rơlô-bòl, jơl tŭs tŭ Bơtau song-dơpă tơlĭk măt be bơta àng, Bơtau Tơngklàs Sion tŭs be ồs sơmpòl àng-gơcrà. Ală làng-bol rơ̆p gŏ Khai lah Bơtau song-dơpă mê dê, mơ ală bơtau rơ̆p gŏ bơta gơklŏ Khai dê. Kơnràñ tờm rơ̆p tơmoh mê in dùl sơnđăn pa. Mê rơ̆p lah sơgơn gơklŏ hơ đăng tê Kơnràñ, mơ sơgơn bơtau gơnoăr-pràn tam tê Yàng mê dê. Mê rơ̆p ờ găm hòi lah cau kong săng-lời tai, mơ ù mê dê rơ̆p ờ găm hòi lah tiah ngềt-ngơ̆t. Mê rơ̆p geh hòi lah “cau Añ boh-bài”, mơ ù mê dê rơ̆p geh hòi lah ù geh làng-bol ơm, bơh mê niăm nùs Yàng, mơ ù mê dê rơ̆p geh cau ơm. Cau bơnu rơ̆p ơm bal mơ cau ùr-ruh, mơ oh kòn mê rơ̆p ơm tam Khai. Cau bơklau rơ̆p chờhờp bơh cau bơùr, Yàng mê dê rơ̆p chơhờp bơh mê.
Hơ̆ jơnau đơ̆s Kơnràñ dê.
Nrĭ-nrềng: Tv, 88 4-5, 16-17, 27 mơ 29
Hw: Ơ Kơnràñ, añ rơ̆p đơ̆scrĭh jờng nùs tơpă-tơpài Đi dê jơl ală rài.
Añ neh tam bơrkoăt mơ cau Añ săc-rơwăh, Añ neh sơntơ̆m mơ Đavit, cau duh-broă Añ be do: Añ rơ̆p bơ̆t-bơtào jơi-nòi mê jơl ală rài, Añ rơ̆p băc-bơtào sơbàn mê dê bơh rơnàng do tŭs rơnàng dă. Hw
Bơtoăh ngăn làng-bol lơi neh gĭt sơnđoh-ñchừn, bol khai cơnđoà lòt tam bơta àng muh-măt niămgoh Kơnràñ, bol khai sùm sùm chờhờp bơh sơnđăn niămgoh Kơnràñ, mơ sơnđoh-ñchừn bơh bơta song-dơpă Kơnràñ dê. Hw
Đavit rơ̆p hơ mơ Añ: Kơnràñ gơ̆s Bàp añ, gơ̆s Yàng añ, gơ̆s bơnơm lŭ tơngklàs añ. Añ rơ̆p sùm sùm gơboh mơ khai , mơ prăp sùm bơr hơ-pơrgon Añ dê mơ khai. Hw
Bơta đăl bàr: Broă 13. 16-17, 22-25
Paulo niămgoh lơh cơng gơrềng bơh Kơnràñ Kristo, kòn bơtau Đavit.
Đăl tam sră Ală Broă Bol Dờp-pơyoa dê.
(Paulo tŭs Antiokia, lơgăr Pisidia, mŭt hìu-pơrjum, ñă-ntào), pờ tê sồr ală cau ơm thĭt mơ đơ̆s: “Ơ cau Israel mơ ală cau duh-ngòt Yàng, iăt tĕ ndo. Yàng làng-bol Israel neh rơwăh pàng-yau he, Khai neh tơngguh làng-bol Khai tŭ bol khai găm ơm kĭs tam lơgăr Ejypto, mơ Khai tơlĭk tê pràn lăm ồng pàng he lĭk bơh lơgăr hơ̆. Tơnơ̆ mơ tŭ neh săng-sơrbì Saole, Khai neh bơtào Đavit gơ̆s bơtau làng-bol Khai, làng lơh cơng jơnau hơ̆, Khai tờm neh đơ̆s: Añ neh bàn wơl Đavit kòn Jesse dê, cau di nùs Añ, khai rơ̆p lơh gơ̆s ală jơnau kờñ Añ dê. Bơh jơibơtiàn Đavit, jăt bơr pơrgon, Yàng neh pà Israel in Jesu gơ̆s Bơtau Tơngklàs, Bơtau mơ Joan neh yal lài, tŭ khai tŭs yal-bơto tềl pơnđum ềng-màl jơh làng-bol Israel in. Tŭ Joan bơsir broă-pờm, khai yal: Añ ờ di lah cau mơ oh mi kơlôi tìs, mơya do, Khai rơ̆p tŭs tơnơ̆ añ, mơ añ ờ pal hồ che khŏ hơ đơm jơng Khai.
Hơ̆ jơnau đơ̆s Kơnràñ dê.
ALLELUIA. Alleluia, Alleluia. Ngai hìng tìs-glài dunia rơ̆p geh tơnroh, mơ Bơtau Tơngklàs rơ̆p ơm-ăt hơ đăng hi. Alleluia.
Jơnau Yălniăm: Mt 1. 1-25
Jơi-nòi Kơnràñ Jesu Kristo, kòn bơtau Đavit.
Sơntờm Jơnau Yălniăm niămgoh jăt Mattheo.
Sră jơi-nòi Kơnràñ Jesu Kristo, kòn Đavit, kòn Abraham.
Abraham deh Isaak, Isaak deh Jakop, Jakop deh Juđa mơ ală oh mi khai dê, Juđa deh Phares mơ Zara bơh Thamar, Phares deh Esrom, Esrom deh Aram, Aram deh Aminađap, Aminađap deh Naasson, Naason deh Salmon, Salmon deh Booz bơh Rahap, Booz deh Obet bơh Ruth, Obet deh Jesse, Jesse deh bơtau Đavit. Đavit deh Salomon bơh bau ùr Uria dê, Salomon deh Roboam, Roboam deh Abia, Abia deh Asa, Asa deh Josaphat, Josaphat deh Joram, Joram deh Ozia, Ozia deh Joatham, Joatham deh Akaz, Akaz deh Ezekia, Ezekia deh Manasse, Manasse deh Amon, Amon deh Josia, Josia deh Jekonia mơ ală oh mi khai dê tŭ kong cèng ơm tam Babylon.
Tơnơ̆ mơ tŭ kong cèng ơm tam Babylon, Jekonia deh Salathiel, Salathiel deh Zorobabel, Zorobabel deh Abiut, Abiut deh Eliakim, Eliakim deh Azor, Azor deh Sađok, Sađok deh Akim, Akim deh Eliut, Eliut deh Eleazar, Eleazar deh Matthan, Matthan deh Jakop, Jakop deh Joseph, bau klau Maria dê; bơh Maria, Kơnràñ Jesu, hòi lah Kristo, neh deh-dùh.
Be hơ̆, jơh ală rài, bơh Abraham tŭs Đavit lah jơ̆t poăn rài; bơh Đavit tŭs tŭ kong cèng ơm tam Babylon lah jơ̆t poăn rài; mơ bơh tŭ kong cèng ơm tam Babylon tŭs Kơnràñ Kristo lah jơ̆t poăn rài.
Kơnràñ Jesu Kristo deh-dùh be do:
Maria, mè khai, neh hơ bau mơ Joseph; lài mơ tŭ bol khai ơm bal, gen gơlĭk gơ̆s lah Maria neh bun bơh Yàng Nhơm. Joseph, bau klau khai dê, bơh lah cau songdơpă mơ ờ kờñ yal-yă khai, gen kờñ lời ờm khai.
Khai găm kơlôi jơnau hơ̆, gen do huềng-duh Kơnràñ dê neh tơnggŏ măt mơ khai tam mpau mơ đơ̆s: “Ơ Joseph, kòn Đavit dê, bañ ngòt dờp Maria bau mê. Bơh kòn khai neh bun lah bơh Yàng Nhơm; khai rơ̆p deh kòn klau, mơ mê rơ̆p hòi sơnđăn Khai lah Jesu: bơh tờm Khai rơ̆p tơngklàs làng-bol Khai bơh ală jơnau tìs bol khai dê.” Jơh jơnau do neh gơlĭk gơ̆s, làng gơlĭk di ngăn jơnau Kơnràñ neh ngui cau alabơr mơ đơ̆s: “Do, ùr tơmo rơ̆p bun mơ deh kòn klau, mơ cau rơ̆p hòi sơnđăn Khai lah Emmanuel”, gơ cĭh-tơlĭk lah Yàng ơm bal mơ bol he.
Kah-rơngal, Joseph neh lơh jăt be huềng-duh Kơnràñ dê neh sồr khai, mơ khai rò bau khai dê; mơya ờ gĭt broă ơm bal jơl tŭs tŭ bau ùr deh kòn klau, mơ Joseph hòi sơnđăn Khai lah Jesu.
Hơ̆ jơnau đơ̆s Kơnràñ dê.
