Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Mt 9, 9-13
Đăl tam Jơnau Yălniăm niămgoh jăt Mattheo.
Kơnràñ Jesu hòi Mattheo
9 Bơh tềng hơ̆, Kơnràñ Jesu lòt găn, gŏ dùl nă cau nggui tam hìu dar dia, sơnđăn lah Mattheo, Kơnràñ đơs mơ khai: ‘‘Jăt tĕ Añ !” Mơ khai ñă-ntào, jăt Kơnràñ.
Kơnràñ Jesu sào mơ bol tìs-glài
10 Mơ gơlik gơs lah, tŭ Kơnràñ Jesu nggui sào tam hìu, gen do geh gal cau dar dia mơ cau tìs-glài tus nggui sào bal mơ Kơnràñ mơ bol jăt-dờn Khai dê. 11 Gŏ be hơ̆, bol Phariseo đơs mơ bol jăt-dờn Khai dê: ‘‘Ñchi bơh tài Pôgru bol mê sào bal mơ bol dar dia mơ bol tìs-glài taih ?” 12 Kơno be hơ̆, Kơnràñ đơs: ‘‘Bol pràn-kơldăng ờ càng cau lơh sơnơm, mơya bol kòp-jê. 13 Lòt tĕ bơsrăm git ñchi lah jơnau do: ‘‘Añ kờñ bơta nđàc-sơngit, mơ ờ kờñ phan lơh-yàng.” Kơyoa Añ ờ tus hòi bol song-dơpă, mơya bol tìs-glài.”
Hơ̆ jơnau đơ̆s Kơnràñ dê.
