Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Mt 6, 19-23
Đăl tam Jơnau Yălniăm niămgoh jăt Mattheo.
Đăm phan tam trồ
19 Bol kòn bañ tơrgùm-prăp bol kòn in ală đăm phan tam tiah, tềng hơ̆ geh mŏ tơrleh sa, mơ tềng hơ̆ bol thừ-blơ̆ tờ blong kơñau; 20 mơya bol kòn tơrgùm-prăp tĕ bol kòn in ală đăm phan tam trồ, tềng hơ̆ ờ geh mŏ tơrleh sa, mơ tềng hơ̆ bol thừ-blơ̆ ờ tờ blong kơñau; 21 bơh đăm phan kòn ơm tềng lơi, gen nùs kòn krung rơp ơm tềng hơ̆ sơl.
Đèng să-jăn dê
22 Đèng să-jăn dê lah măt. Be hơ̆, dilah măt kòn sàng-niăm, gen jơh să-jăn kòn rơp àng-goh; 23 mơya dilah măt kòn ờ diơng, gen jơh să-jăn kòn rơp klăm-jơngo. Be hơ̆, dilah bơta àng tam kòn lah bơta klăm-jơngo, gen bơta klăm-jơngo rơp lah git nđờ !
Hơ̆ jơnau đơ̆s Kơnràñ dê.
