Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Lk 11, 47-54
Đăl tam Jơnau Yălniăm niămgoh jăt Luka
47 Dồn-sa bol mê in, bơh bol mê băc ală bơtô bồc bol ala-bơr dê, mơ ồng-pàng bol mê neh gơsơt bol khai ! 48 Be hơ̆, bol mê lơh cơng mơ geh dùl nùs bal mơ ală broă ồng-pàng bol mê dê, bơh bol khai neh gơsơt bol ala-bơr, ai bol mê gen băc ală bơtô bồc. 49 Hơ̆ tàng bơta jăk-chài Yàng dê neh đơs: Añ rơp pơyoa bol ala-bơr mơ bol dờp-pơyoa tus mơ bol khai, bol khai rơp gơsơt cau do, kup-kuăn cau ne, 50 làng jơi-nòi do rơp kong lùp dồs mhàm jơh ală cau ala-bơr dê neh gơtuh bơh tŭ crơng-gơs trồ tiah, 51 bơh mhàm Abel jơl tus mhàm Zakaria dê, lah cau neh chơt tam gùl cơnờng duh-khoai mơ gơlăng niăm-goh. Ngăn be hơ̆, Añ đơs mơ bol mê: Jơi-nòi do rơp kong lùp dồs mhàm. 52 Dồn-sa bol mê in, bol cau jăk gùng boh-lăm, bơh bol mê neh ăt kơrnal pờ bơta git-wă dê ! Să tờm bol mê neh ờ mut, mơ ală cau kờñ mut, bol mê krung kơryăn.”
53 Tŭ Kơnràñ lik bơh tềng hơ̆, bol gơnoar-cih mơ bol Phariseo sơntờm gơhào-gơjrañ, lùp sơwì Khai gơrềng bơh rà jơnau, 54 pơt dă Khai, làng kup jơnau lơi bơh bơr Khai.
Hơ̆ jơnau đơ̆s Kơnràñ dê.
