Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Mt 9, 35-10, 1.6-8
Đăl tam Jơnau Yălniăm niămgoh jăt Mattheo.
Kơnràñ Jesu nđàc-sơngit làng-bol
35 Mơ Kơnràñ Jesu lòt làm jơh ală bòn dờng mơ ală bòn dêt, bơto tam ală hìu-pơrjum bol khai dê, yal-bơto Jơnau Yal Niăm lơgar dê, mơ tơmbời jơh ală bơta kòp-jê mơ jơh ală bơta lơbơn-lơñơ. 36 Gŏ ală mpồl làng-bol, Kơnràñ nđàc-sơngit bol khai, bơh bol khai bòl-glar mơ gơprah-gơpring be ală belàt ờ geh cau ê. 37 Tŭ hơ̆, Kơnràñ đơs mơ bol jăt-dờn Khai dê: ‘‘Kòi tơwès oă, mơya cau tơwès êt; 38 gen tàng, bol kòn dăn tĕ Kơnràñ kòi tơwès dê, làng Khai pơyoa bol cau tơwès tus tơwès kòi Khai dê.”
Jơt Bàr nă cau dờp-pơyoa lòt yal-bơto
10 1 Mơ hòi Jơt Bàr nă cau jăt-dờn Khai dê tus, Kơnràñ pà bol khai in gơnoar hơđăng ală huềng bơ̆-bơl, làng bol khai bơtrơh bol gơ mơ tơmbời jơh ală bơta kòp-jê mơ jơh ală bơta lơbơn-lơñơ.
Kơnràñ Jesu pơyoa bol Jơt Bàr do lòt mơ sồr bol khai lah: “6 mơya niăm rơlau lah bol kòn lòt tus tĕ mơ ală belàt nrah-nring hìu Israel dê. 7 Tam tŭ lòt, bol kòn yal-bơto tĕ mơ đơs: ‘‘Lơgar trồ neh tus rềp rau.” 8 Tơmbời tĕ bol kòp-jê, tơngkis wơl tĕ bol cau chơt, lơh goh tĕ bol lut-dun, bơtrơh tĕ ală cà; bol kòn neh dờp gời, gen pà tĕ gời.”
Hơ̆ jơnau đơ̆s Kơnràñ dê.
