Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau Yălniăm: Jn 10. 11-18
Cau ê niăm phi bơta kĭs he dê bơh ală belàt in.
Đăl tam Jơnau Yălniăm niămgoh jăt Joan.
Tŭ hơ̆, Kơnràñ Jesu đơ̆s: “Añ lah cau ê niăm: cau ê niăm phi bơta kĭs he dê bơh ală belàt in; ai cau lơh apah, ờ di lah cau ê, ală belàt ờ di lah phan ĭs khai dê tàng gŏ so rơhau tŭs, khai săng ală belàt mơ dô – so rơhau kăp bol gơ mơ lơh gơprăh-gơpring – , khai dô tài bơh khai lah cau lơh apah mơ ờ gơkoă mơ khai gơrềng bơh ală belàt. Añ lah cau ê niăm: Añ gĭt ală belàt Añ dê, mơ ală belàt Añ dê gĭt Añ, be Bàp gĭt Añ, mơ Añ gĭt Bàp; mơ Añ phi bơta kĭs Añ dê bơh ală belàt in. Añ geh ală belàt ndai, bol gơ ờ gơrê mơ wàng do, Añ pal lăm bol gơ rê, mơ bol gơ rơ̆p iăt săp Añ, mơ rơ̆p gơ̆s dùl mpồl, dùl nă cau ê. Tài bơh hơ̆ Bàp gơboh mơ Añ, bơh Añ phi bơta kĭs Añ dê làng ai wơl gơ. Ờ geh cau lơi tă gơ bơh Añ, mơya Añ phi gơ bơh să tờm Añ. Añ geh gơnoăr phi gơ mơ geh gơnoăr ai wơl gơ. Jơnau-sồr do, Añ neh dờp bơh dơ Bàp Añ.”
Hơ̆ jơnau đơ̆s Kơnràñ dê.
Jơnau Blàng Sră Goh: Bàp Vincente K’ Brèp
Lăm bồ
Tŭ lòt ngài kòn cau he wờl kờn cau năc in: Lòt tus brê, rê tus hìu. Mbe he lơh dòng lòt di gùng? Cau lơi lăm tàng he ờ nhờt gùng? Ngai do Yàng Jêsu đơs: An lah cau ê niêm. Mbe bol he gŏ?
Kờn lòt brê lòt dà, kờn lòt um dà lềng he pal geh cau tềlăm. Geh cau tềlăm he ờ nhờt gùng. Geh cau tềlăm he cham re dà, Geh cau tềlăm he cham cơnđòa lòt gùng. He cham dờ tus tam anih, tam brê he kờn lòt tus. Tàm gùng rài be hơ̆. Tàm gùng tềlăm huềng soàn màng rơlao tai gĭt thơu đờ. Cau lơi neh gĭt gùng rê tà trồ? Bơh rài yut rài yau, bơh tàm pồt dà lô, bơh tà tô dà lềng, ñcau lơi gĭt gùng rê tàm trồ? Ò hề geh cau lơi neh gĭt gùng hơ̆. Mìng dùl nă Yàng Jesu gĭt gùng rê tàm trồ. Bơh Khai neh chơ̆t mơ neh kis wơl. Be ồng Phêrô neh đơs mơ làng bol in lah mìng nă Yàng Jesu lah Bơtau tơng klàs dunia. Gen tàng mìng dùl nă Yàng Jesu lăm he tus tam bơta kis rài rài.
Đơs mà bơr lah be hơ̆, mơya tam rài kis is ồn ñcau găm tềlăm he? Yàng Jesu ha la cau ndai? Mà bơr he đơs añ lah cau jăt Yàng mơ rài kis añ hơ̆ sơlơ̆ wơl mơ jơnau Yàng bohlăm. Yàng jạ he sang lời tis cau in. Ai he kŭp glài cau¸ sa dôs cau oh mi rơlao mơ cau ò jăt Yàng. Yàng sồr he bañ kơñau phan cau. Ai he phà ù phà tiah cau, ờ tung kơñau phan cau mơ ya đơs blac geh ai priă ai jền cau. Ờ tung kơñau mơ ya sa kwì sa kwà phan bal. He đơs Yàng tềlăm añ, mơ he gam lòt proh, lòt cơnăng, lòt mà gru sền dà sền ia, sền phe sền bơrlah. He đơs jăt Yàng Jesu mơya he ò pà Khai tềlăm. He pà cau gời hala phan do phan ne tề he. Ngai do, Pơrjum niêm kah klôiê tus Cau Ê Niêm. Yàng Jesu lah Cau Ê Niêm bơh Khai neh phi să tòm mpồl be làt in. Khai neh chơ̆t mơ kis wơl làng be làt in geh kis mơ kis lìu làc. Khai lah Cau Ê Niêm bơh gĭt be làt bềlơi, gơ kòptê, gơ jê să, gơ sồt rơman. Khai gĭt ò di kờn geh jòi nau, ò di kŭp tis kŭp glài. Mơ ya kờn geh sơm bời, kờn geh toh lời, kờn geh gơ boh mơ tơng klàs.
Dăn mơ Yàng pà cau át bồ tam Pơrjum Niêm, cau át bồ kờp dà lơgar, cau át bồ ntum mpồl, cau me cau bàp geh plai nùs niêm lơnhơn be Yàng Jesu. Làng bol khai in gĭt lăm niêm gùng lòt Yàng, sàng dà bò ka, song sơna pañ prò. Mơ dăn Yàng pà oă rà cau kơnòm geh nùs anàng làng pơdơng să Yàng in.
