Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Đn 7. 13-14
Gơnoăr Khai dê lah gơnoăr gơ̆s sùm
Đăl tam sră Đaniel, cau ala-bơr dê.
Tam dùl bơta gơ tơnggŏ tam măng, añ neh rơmê-sền, mơ do añ gŏ be Kòn kòn-bơnŭs tŭs tam mhoăl trồ, Khai lòt tŭs hơ cau Kuăng-kra, mơ cau lăm Khai tŭs hơ đăp cau Kuăng-kra. Cau do pà Khai in gơnăp-gơnoăr, bơnàng-bò, mơ lơgăr Bơtau; jơh tơl ală làng-bol, jơi-nòi, mơ dà đơ̆s duh-broă Khai lơm. Gơnoăr Khai dê lah gơnoăr gơ̆s sùm, ờ tŭ lơi kong tă-tơlĭk, lơgăr Bơtau Khai dê ờ tŭ lơi kong tơnroh.
Hơ̆ jơnau đơ̆s kơnràñ dê.
Nrĭ-nrềng: 92. 1ab, 1c-2, 5
Hw: Kơnràñ ơm-ăt, Khai soh gơnoăr be ào bơtau.
Kơnràñ ơm-ăt, Khai soh gơnoăr rơyŭ be ào bơtau, Kơnràñ kơ̆t che bŭt mơ bềng bơta gơnrơh. Hw
Bơh Khai tơngkơ̆ plai ù, ờ ai gơ ơwăñ. Sơbàn Khai dê ntào kơ̆ bơh sơnrờp. Khai gŏ gơ̆s bơh yŭt bơh yau. Hw
Bơr cơng Khai dê ngăn păl pindờn. Ơ Kơnràñ, hìu Đi dê păl niămgoh, jŏ bơnòng jòng bơnăng kuăng tơngai. Hw
Bơta đăl bàr: Yt 1. 5-8
Khai ăt-bồ ală bơtau dunia. Khai neh lơh he in gơjềng lơgăr bơtau.
Đăl tam sră Yăl-tơlĭk, Joan, cau Dờp-pơyoa bơtoăh dê.
Wờl-kờñ oh mi in geh bơta hànggoh mơ ring-lơngai Kơnràñ Jesu Kristo dê, lah cau cơng dờn-song, lah kòn tơnhoa cau chơ̆t dê, lah ăt-bồ ală bơtau dunia, lah Bơtau neh gơboh mơ he. Khai neh ngui mhàm Khai làng rào he kloh ală tìsglài, mơ neh lơh he in gơjềng lơgăr bơtau, mơ bol kơiơng-yàng Yàng dê, Bàp Khai dê. Wờl-kờñ Khai geh gơklŏ mơ pràn-gơnoăr jơl jơh ală rài. Amen. Ne, Khai tŭs tam mhoăl, ală kòn măt neh sền gŏ Khai, mơ jơh sơl bol cau neh srơ̆p Khai krung sền gŏ Khai, ală jơi-nòi hơ đăng plai ù rơ̆p ñìm-răc Khai. Ngăn be hơ̆. Amen. Kơnràñ gơ̆s Yàng, Bơtau găm gơ̆s, neh gơ̆s, mơ rơ̆p tŭs, gơ̆s Bơtau tờm gơnrơh yăl: Añ lah Alpha mơ Omega, lah sơntờm mơ lah lồi-dŭt.
Hơ̆ jơnau đơ̆s Kơnràñ dê.
ALLELUIA: Mk 11. 9, 10
Alleluia. Alleluia. Yălniăm Bơtau tŭs bơh sơnđăn Kơnràñ! Yălniăm lơgăr bơtau Đavit, ồng-pàng bol he dê neh tŭs. Alleluia.
Jơnau Yălniăm: Jn 18. 33b-37
Ồng đơ̆s hơ̆, Añ lah bơtau.
Đăl tam Jơnau Yălniăm niămgoh jăt Joan.
Tŭ hơ̆, Pilato đơ̆s mơ Kơnràñ Jesu be do: “Mê lah bơtau bol Juđe ơ ?” Kơnràñ Jesu hơ wơl: “Ồng đơ̆s jơnau hơ̆ bơh să tờm ồng, ngolah geh bol ndai đơ̆s mơ ồng gơrềng bơh Añ ?” Pilato hơ wơl: “Añ lah cau Juđe ơ ? Làng-bol mê mơ bol lơh-yàng dờng neh jào mê Añ in; ñchi mê neh lơh ?” Kơnràñ Jesu hơ wơl: “Lơgăr Añ ờ gơrê mơ dunia do; dilah lơgăr Añ gơrê mơ dunia do, gen bol duh-broă Añ dê neh tam lơh, làng Añ ờ kong jào bol Juđe in; mơya tŭ do lơgăr Añ ờ di tềng do.” Pilato đơ̆s mơ Kơnràñ: “Be hơ̆, mê lah bơtau ơ ?” Kơnràñ Jesu hơ wơl: “Ồng đơ̆s hơ̆, Añ lah bơtau. Tài bơh hơ̆ mơ Añ neh lĭk-lìng, mơ tài bơh hơ̆ mơ Añ neh tŭs tam dunia, làng lơh cơng bơta ngăn-ngồn in; cau lơi gơrê mơ bơta ngăn-ngồn, gen iăt săp Añ.”
Hơ̆ jơnau đơ̆s Kơnràñ dê.
