Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Joel 2. 12-18
Crè tĕ nùs, bañ crè ào bol mê.
Đăl tam sră Joel, cau ala-bơr dê.
Tŭ hơ̆, Kơnràñ đơs: “Bol mê jơh nùs rê wơl tĕ mơ Añ tam bơta wèr-ơ̆t, dà măt mơ ñìm răc-ròc. Crè tĕ nùs, bañ crè ào bol mê. Rê wơl tĕ mơ Kơnràñ gơ̆s Yàng bol mê, bơh Khai niăm-lơnhơn mơ tơpă-tơpài, kơ̆-ơ̆t, bềng nùs nđàc mơ gĭt kah-pơlai bơh bơta rềs-àr. Be gĭt Khai rơ̆p rê wơl rơ̆p kah-pơlai mơ rơ̆p pà wơl bơta bơtoăh làng geh phan gơsơ̆t pơdơng dơ Kơnràñ gơ̆s Yàng bol mê. Ŭh tĕ kơwào làm khŏp Sion, bơtosồr tĕ bơta ơtê sa, lơh dùl lèh dờng, trơgùm làng-bol, sồr lơh pơrjum dờn g, trơgùm ală cau kra, ală kơnòm mơ ală oh-nga. Cau bơrtơu lĭk tĕ bơh hìu, mơ cau ban lĭk tĕ bơh cơldŭ. Ală cau kơiơng-yàng lah bol cau duh-broă Kơnràñ, ntào tĕ dơ gùlk mpồng mơ jơnào Yàng làng ñìm-răc mơ driau be do: Ơ Kơnràñ, dăn nđàc-sơngĭt làng-bol Đi, dăn bañ lời jơtài Đi dê pal bàs-sìl, bañ lời ală làng-bol bơdìh ăt-bồ gơ. Ñchi gơlơh cau dunia khin đơ̆s be do: ntềng đah Kơnràñ bol khai ơm taih ? Kơnràñ neh kơ̆-mềr mơ lơgăr Khai dê mơ neh hồ-lời làng-bol Khai dê in.
Hơ̆ jơnau đơ̆s Kơnràñ dê.
Nrĭ-nrềng: 50. 3-4, 5-6a, 12-13, 14 mơ 17
Hw: Ơ Kơnràñ dăn nđàc añ jăt nùs niăm-lơnhơn Đi dê. Ơ Kơnràñ, dăn nđàc añ jăt nùs niăm-lơnhơn Đi dê, tơnroh tìs añ jăt nùs tơpă-tơpài. Dăn rào añ kloh tìs-bìr, mơ jùt añ kloh tìs iơ̆h. Hw
Bơh añ tờm neh gĭt bơta tìs añ dê, mơ tìs añ ơm sùm dơ đăp măt añ. Añ lơh tìs tam dră mơ Yàng. Hw
Ơ Kơnràñ, dăn mòn añ in plai nùs sàng-goh, mơ tơnpa wơl nhơm-nùs pràn-kơldăng tam añ. Dăn bañ tơlĭk añ bơh măt Đi, Bañ ai wơl Yàng Nhơm Đi dê lĭk bơh añ. Hw
Dăn pà wơl añ in nùs chờ tam bơta tơngklàs, mơ nùs pơha, Đi đơng-dong añ.Ơ Kơnràñ dăn pờ sơndồi bơr añ, làng añ rơ̆p lơh-pơnrơ jơnau jờngrơ. Hw
Bơta đăl bàr: 2 Kr 5. 20 – 6. 2
Tam bơsòr tĕ mơ Kơnràñ … Tŭ do gơ̆s tŭ lơmpah.
Đăl tam sră bàr Paulo, cau Dờp-pơyoa bơtoăh, pơyoa bol Korinto in.
Ơ oh mi kờñ-gơboh, bol hi do gơ̆s cau ala măt Kristo dê, Yàng tờm kơnờm dơ bol hi làng pơnđơl oh mi. Bơh sơnđăn Kristo, bol hi dăn hàñ oh mi tam bơsòr tĕ mơ Kơnràñ. Bơtau ờ gŏ gĭt tìs-glài, gen Yàng neh lơh Khai gơjềng să tìs tài bơh bol he, làng tam Khai, bol he geh gơjềng gơ̆s bơta song-dơpă Yàng dê. Bơh sơnđăn lah bol cau boh-tê Khai dê, bol hi bơtăn oh mi bañ dờp gời wơl bơta niăm Yàng dê. Ngăn sơl Kơnràñ đơ̆s: Tŭ lơmpah tŭs rau, Añ neh dờp bơr mê, tam ngai tờngklàs, Añ neh dong-kờl mê. Tŭ do gơ̆s tŭ lơmpah, jiờ do lah ngai tơngklàs. Hơ̆ jơnau đơ̆s Kơnràñ dê.50 Jơnau đăl lài Jơnau Yălniăm: Nn 50. 12a mơ 14. Ơ Kơnràñ dăn mòn añ in plai nùs sàng-goh. Dăn pà wơl añ in nùs chờ tam bơta tơngklàs. Jơnau Yălniăm: Mt 6. 1-6, 16-18 Bàp kòn lah Bơtau gŏ tam tiah ndơ̆p, rơ̆p ai wơl kòn in. Đăl tam Jơnau Yălniăm niămgoh jăt Mattheo. Tŭ hơ̆ Kơnràñ Jesu đơ̆s mơ bol jăt-dờn be do: “Sền ngăc tĕ, bañ lơh bơta song-dơpă bol kòn dê dơ đăp cau, làng geh bol khai gŏ; di lah ờ be hơ̆, bol kòn rơ̆p ờ geh phan-jờng dơ Bàp bol kòn, Bơtau ơm tam trồ. Gen tàng, tŭ kòn pà phan dong-kờl cau, bañ ŭh kơluờk dơ đăp kòn, be bol blăc-să lơh tam ală hìupơrjum mơ tam ală gùng, làng geh cau jờngrơ. Di ngăn, Añ đơ̆s mơ bol kòn: Bol khai neh dờp phan-jờng bol khai dê rau. Mơya tŭ bol kòn pà phan dong-kờl cau, bañ ai tê kiau kòn gĭt broă tê ma kòn lơh, làng broă pà kòn dê geh pơndơ̆p, mơ Bàp kòn lah Bơtau gŏ tam tiah ndơ̆p, rơ̆p ai wơl kòn in. Mơ tŭ bol kòn răc-dăn, bañ lơh be bol blăc-să, bol khai gơboh ntào răc-dăn tam ală hìu-pơrjum mơ tam ală jum gùng, làng geh cau gŏ. Di ngăn, Añ đơ̆s mơ bol kòn: Bol khai neh dờp phan-jờng bol khai dê rau. Mơya tŭ kòn răc-dăn, mŭt tĕ tam adŭ kòn dê, mơ dơ̆ neh til mpồng, răc-dăn tĕ mơ Bàp kòn lah Bơtau ơm tam tiah ndơ̆p; mơ Bàp kòn lah Bơtau gŏ tam tiah ndơpê , rơpê ai wơl kòn in. Tŭ bol kòn ơ̆t-sa, bañ lơh moăt-jrùng be bol blăc-să; bơh bol khai lơh ñòp muh ñòp măt, làng ràng-tơlĭk cau in lah bol khai ơtê sa. Di ngăn, Añ đơ̆s mơ bol kòn: Bol khai neh dờp phan-jờng bol khai dê rau. Mơya tŭ kòn ơ̆t-sa, bong tĕ bơñà dơ bồ kòn, mơ tuh tĕ muh-măt kòn, mbài cau in gŏ kòn ơ̆t-sa, mơya Bàp kòn in, lah bơtau ơm tam tiah ndơ̆p; mơ Bàp kòn lah Bơtau gŏ tam tiah ndơ̆p, rơ̆p ai wơl kòn in.
Hơ̆ jơnau đơ̆s Kơnràñ dê.
