Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu tơmbời cau kuet-kơlte
9 1 Hào ahò, Kơnràñ tiă dà mơ tus tam bòn dờng Khai dê. 2 Mơ do cau cèng tus Khai in dùl nă cau kuet-kơlte bic hơđăng cơnờng. Gŏ nùs pindờn bol khai dê, Kơnràñ Jesu đơs mơ cau kuet-kơlte: ‘‘Kơ̆ tĕ nùs, ơ kòn; ală jơnau tìs kòn dê neh geh hồ rau.” 3 Mơ do, geh bàr pe nă cau tam bol gơnoar-cih đơs ndring bol khai : ‘‘Cau do đơs tràl-sơrbil.” 4 Mơya Kơnràñ Jesu gŏ ală jơnau kơlôi bol khai dê, gen đơs: ‘‘Ñchi bơh tài bol mê kơlôi ală bơta iơh tam nùs bol mê taih ? 5 Kơyoa bơta lơi buơn rơlau taih ? Đơs: ‘‘Ală jơnau tìs kòn dê neh geh hồ”, ngŏlah đơs: ‘‘Ñă-ntào mơ lòt tĕ” ? 6 Mơya làng bol mê git Kòn kòn-bơnus geh gơnoar hồ tìs tam tiah – tŭ hơ̆, Khai đơs mơ cau kuet-kơlte –: Ñă-ntào tĕ, tui cơnờng mơ rê hìu mê.” 7 Mơ cau hơ̆ neh ñă-ntào mơ rê hìu tờm. 8 Gŏ be hơ̆, ală mpồl làng-bol ngòt mơ tơngklŏ Yàng, Bơtau neh pà kòn-bơnus in gơnoar be hơ̆.
Kơnràñ Jesu hòi Mattheo
9 Bơh tềng hơ̆, Kơnràñ Jesu lòt găn, gŏê dùl nă cau nggui tam hìu dar dia, sơnđăn lah Mattheo, Kơnràñ đơs mơ khai: ‘‘Jăt tĕ Añ !” Mơ khai ñă-ntào, jăt Kơnràñ.
Kơnràñ Jesu sào mơ bol tìs-glài
10 Mơ gơlik gơs lah, tŭ Kơnràñ Jesu nggui sào tam hìu, gen do geh gal cau dar dia mơ cau tìs-glài tus nggui sào bal mơ Kơnràñ mơ bol jăt-dờn Khai dê. 11 Gŏ be hơ̆, bol Phariseo đơs mơ bol jăt-dờn Khai dê: ‘‘Ñchi bơh tài Pôgru bol mê sào bal mơ bol dar dia mơ bol tìs-glài taih ?” 12 Kơno be hơ̆, Kơnràñ đơs: ‘‘Bol pràn-kơldăng ờ càng cau lơh sơnơm, mơya bol kòp-jê. 13 Lòt tĕ bơsrăm git ñchi lah jơnau do: ‘‘Añ kờñ bơta nđàc-sơngit, mơ ờ kờñ phan lơh-yàng.” Kơyoa Añ ờ tus hòi bol song-dơpă, mơya bol tìs-glài.”
Tam pơndăng gơrềng bơh bơta ơt-sa
14 Tŭ hơ̆, bol jăt-dờn Joan dê tus hơ Kơnràñ mơ đơs: ‘‘Ñchi gơlơh bol hi mơ bol Phariseo ờs ơt-sa, ai bol jăt-dờn Đi dê ờ ơt-sa taih ?” * 15 Mơ Kơnràñ Jesu đơs mơ bol khai: ‘‘Bol năc ñô-bao rơgơi ñìm-moăt tam tŭ cau bơrtơu găm ơm bal mơ bol khai ơ ? Mơya rơp tus ală ngai, tŭ cau bơrtơu kong tă-tơlik bơh bol khai, mơ tŭ hơ̆ bol khai rơp ơt-sa. 16 Ờ geh cau lơi ai pơnồ biài tơme làng tambồl dơ ào klar; bơh pơnồ tambồl lơh gơrồt wơl ào, mơ chi sèt gơlik iơh rơlau. 17 Cau krung ờ tròc tơrnờm pa tam ală kơldung gơltau yau; di be hơ̆, ală kơldung bơcah, gen tơrnờm gơlik mơ ală kơldung roh sơl; mơya tơrnờm pa, cau tròc tam kơldung gơltau pa, mơ geh prăp wơl jơh bàr.”
Kơnràñ Jesu tơmbời cau ùr kong gơhùng mhàm, mơ tơngkis wơl kòn ùr cau ăt-bồ hìu-pơrjum dê
18 Kơnràñ găm đơs ală jơnau hơ̆ mơ bol khai, gen do dùl nă cau ăt-bồ lòt tus, cùn-khoai Khai mơ đơs: ‘‘Kòn ùr añ pa chơt do ti; mơya dăn Đi tus ơn tê Đi hơđăng khai mơ khai rơp kis.” 19 Kơnràñ Jesu ñă-ntào mơ lòt jăt ồng hơ̆, bal mơ bol jăt-dờn Khai dê.
20 Mơ do, dùl nă cau ùr kong gơhùng mhàm neh jơt bàr sơnăm, lòt tus bơh ngkời mơ bư dơ tiăng ào Kơnràñ dê. 21 Kơyoa khai đơs is: ‘‘Dilah añ mìng bư lơm dơ ào Kơnràñ dê, añ krung rơp geh bời.” 22 Kơnràñ Jesu wơlke, gŏ khai mơ đơs : ‘‘Ơ kòn ùr, kơ̆ tĕ nùs; nùs pindờn ai dê neh tơmbời ai.” Mơ cau ùr neh geh tơmbời bơh jiờ hơ̆.
23 Tŭ Kơnràñ Jesu tus tam hìu cau ăt-bồ, mơ gŏ bol uh kơwào bal mơ mpồl làng-bol nggồr-nggàc, gen Khai đơs: 24 ‘‘Lik tĕ; bơh oh ùr ờ chơt, mơya khai bic khai dê.” Mơ bol khai ñŏ-tơnhial Kơnràñ. 25 Tŭ mpồl làng-bol neh kong tơlik hơ bơdìh rau, gen Kơnràñ mut, ăt dơ tê oh ùr, mơ khai guh. 26 Mơ jơnau do pơnrơ làm jơh tiah hơ̆.
Kơnràñ Jesu tơmbời bàr nă cau jơngo măt
* 27 Tam tŭ Kơnràñ Jesu lik-lòt bơh tềng hơ̆, gen geh bàr nă cau jơngo măt jăt Khai hòi-nggà mơ đơs: ‘‘Khoai ơ kòn Davit dê, dăn sơnđàc bol hi !” 28 Tŭ Kơnràñ tus tam hìu, gen bol cau jơngo măt tus mơ Khai, mơ Kơnràñ Jesu đơs mơ bol khai: ‘‘Bol mê pindờn Añ rơgơi lơh bơta hơ̆ sơl ờ ?” Bol khai đơs: ‘‘Ơi, ơ Kơnràñ.” 29 Tŭ hơ̆, Kơnràñ bư dơ măt bol khai mơ đơs: ‘‘Jăt be nùs pindờn bol mê dê, gen gơlik gơs bol mê in.” 30 Mơ măt bol khai neh gơpờ. Mơya Kơnràñ Jesu đơs kràñ-cê mơ bol khai: ‘‘Sền ngăc tĕ, bañ ai cau lơi in git.” 31 Mơya bol khai lik-lòt, yal-pơnrơ Kơnràñ làm jơh tiah hơ̆.
Kơnràñ Jesu tơmbời cau kloat kong cà lơh
32 Tam tŭ bol khai lik-lòt, gen do cau cèng tus Kơnràñ in dùl nă cau kloat kong cà lơh. 33 Dơ̆ cà neh kong bơtrơh rau, gen cau kloat đơs. Ală mpồl làng-bol ai lơh krơi mơ đơs: ‘‘Ờ tŭ lơi gŏ be hơ̆ tam Israel !” 34 Mơya bol Phariseo đơs: ‘‘Khai kơnờm dơ gơnoar ală cà mơ bơtrơh ală cà.”
Kơnràñ Jesu nđàc-sơngit làng-bol
35 Mơ Kơnràñ Jesu lòt làm jơh ală bòn dờng mơ ală bòn dêt, bơto tam ală hìu-pơrjum bol khai dê, yal-bơto Jơnau Yal Niăm lơgar dê, mơ tơmbời jơh ală bơta kòp-jê mơ jơh ală bơta lơbơn-lơñơ. 36 Gŏ ală mpồl làng-bol, Kơnràñ nđàc-sơngit bol khai, bơh bol khai bòl-glar mơ gơprah-gơpring be ală belàt ờ geh cau ê. 37 Tŭ hơ̆, Kơnràñ đơs mơ bol jăt-dờn Khai dê: ‘‘Kòi tơwès oă, mơya cau tơwès êt; 38 gen tàng, bol kòn dăn tĕ Kơnràñ kòi tơwès dê, làng Khai pơyoa bol cau tơwès tus tơwès kòi Khai dê.”
