Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
III. YAL-BƠTO LƠGAR TRỒ
1. Bơnah cih-yal
Kơnràñ Jesu tờmbời cau lut-dun
8 1 Tŭ Kơnràñ mù bơh bơnơm, gen geh ală mpồl làng-bol gal jăt Khai.
2 Mơ do, dùl nă cau lut-dun tus cùn-khoai Kơnràñ mơ đơs: ‘‘Ơ Kơnràñ, dilah Đi kờñ, Đi rơgơi tơnggoh añ.” 3 Yơr tê, Kơnràñ bư dơ khai mơ đơs: ‘‘Añ kờñ, mê gơs goh tĕ !”; tŭ hơ̆ mơ, sồt dun khai dê geh tơnggoh. 4 Kơnràñ đơs mơ khai: ‘‘Sền ngăc tĕê, bañ yal mơ cau lơi; mơya lòt tĕ sơnđio să mơ cau lơh-yàng, mơ pơdơng phan Moise neh sồr, làng gơs cơng bol khai in.”
Kơnràñ Jesu tơmbời cau dĭ-gơna cau kuang ăt-rơhiăng dê
5 Tŭ Kơnràñ neh mut tam Kapharnaum, gen dùl nă kuang ăt-rơhiăng tus dăn Khai 6 mơ đơs: ‘‘Ơ Kơnràñ, cau dĭ-gơna añ dê kuet-kơlte bic tam hìu, kong rơpơt jê oă ngăn.” 7 Kơnràñ đơs mơ khai: ‘‘Añ rơp tus mơ rơp tơmbời khai.” 8 Mơ hơ wơl, cau kuang ăt-rơhiăng đơs: ‘‘Ơ Kơnràñ, añ ờ pal làng Đi mut tam hìu, mơya dăn Đi mìng đơs dùl bơr, gen cau dĭ-gơna añ dê rơp geh tơmbời. 9 Kơyoa añ lah cau ơm hơđơm gơnoar, mơ krung geh bol ling hơđơm añ, añ đơs mơ cau do: ‘‘Lòt tĕ”, gen khai lòt; mơ cau ne: ‘‘Tus tĕ”, gen khai tus; mơ cau duh-broă añ dê: ‘‘Lơh tĕ broă do”, gen khai lơh.”
* 10 Kơno be hơ̆, Kơnràñ Jesu ai lơh krơi, đơs mơ ală cau jăt Kơnràñ: ‘‘Di ngăn, Añ đơs mơ bol mê: Añ ờ hềt gŏ bơta pindờn dờng be hơ̆ dơ cau lơi tam Israel ! 11 Mơya Añ đơs mơ bol mê lah, geh gal cau bơh đah măt tơngai lik mơ đah măt tơngai mut, rơp tus nggui sa bal mơ Abraham, Isaak mơ Jakop tam lơgar trồ; 12 ai bol oh kòn lơgar dê rơp kong bơtrơh hơ tiah klăm-jơngo bơdìh: tềng hơ̆ rơp geh bơta ñìm-răc mơ rơkiăt sề.” 13 Mơ Kơnràñ Jesu đơs mơ cau kuang ăt-rơhiăng: ‘‘Lòt tĕ; be mê neh pindờn, gen gơs tĕ mê in.” Mơ di dơ jiờ hơ̆, cau dĭ-gơna geh tơmbời.
Kơnràñ Jesu tơmbời po-me Petro dê
14 Tŭ Kơnràñ Jesu tus tam hìu Petro, gŏ po-me khai dê găm bic kòp mprơm; 15 Kơnràñ bư dơ tê mò, mơ kòp mprơm lik bơh mò; mò guh mơ duh-broă Kơnràñ.
Kơnràñ Jesu tơmbời jơh ală cau kòp-jê
16 Mho tus, cau cèng Kơnràñ in rà cau kong cà lơh; mơ Khai bơtrơh huềng-iơh bơh bơr đơs, mơ tơmbời jơh ală cau kòp-jê, 17 làng gơlik di ngăn jơnau Isaia, cau ala-bơr, neh đơs:
‘‘Khai neh dờp ală bơta lơbơn-lơñơ he dê, mơ neh àñ ală bơta jê-yăn he dê.”
Cau jăt-dờn pal săng-lời jơh ală bơta
18 Gŏ ală mpồl làng-bol gal gùt dar Khai, Kơnràñ Jesu sồr tiă đah bơtĭ ne. 19 Dùl nă cau gơnoar-cih tus đơs mơ Khai: ‘‘Ơ Pôgru, añ dăn jăt Đi bulah Đi lòt tiah lơi .” 20 Kơnràñ Jesu đơs mơ khai: ‘‘Pì geh trồm, sềm tam trồ geh rơsòn, mơya Kòn kòn-bơnus ờ geh tiah sơnđìng bồ.”
21 Dùl nă tam bol jăt-dờn Kơnràñ dê đơs mơ Khai: ‘‘Ơ Kơnràñ, dăn ai kòn in lài rê tơp bàp kòn.” 22 Mơya Kơnràñ Jesu đơs mơ khai: ‘‘Jăt tĕ Añ, mơ lời tĕ cau chơt tơp cau chơt bol khai dê.”
Kơnràñ Jesu lơh dà-lềng gơs ring-drik
23 Dơ̆ Kơnràñ hào ahò, gen bol jăt-dờn Kơnràñ dê jăt Khai. 24 Mơ do, dà-lềng gơ nsừc dờng tiăn tus dà gơpồt gơgòm ahò; mơya Kơnràñ găm bic. 25 Bol jăt-dờn tus pơrlai Khai mơ đơs: ‘‘Ơ Kơnràñ, dăn tơngklàs bol kòn, chơt bol kòn wai !” 26 Mơ Kơnràñ đơs mơ bol khai: ‘‘Ñchi gơlơh bol kòn bìr-ngòt, ơ bol ờ hoan pindờn ?” Tŭ hơ̆, Khai ñă-ntào, lah-pơrhơng rơbut mơ dà-lềng, mơ gơlik gơs ring-drik ngăn. 27 Ală cau ai lơh krơi mơ đơs: ‘‘Cau do lah ñcau, mơ rơbut bal mơ dà-lềng krung dờn bơr Khai taih ?”
Bàr nă cau kong cà lơh
28 Tŭ Kơnràñ neh tus đah bơtĭ ne, tam kơnhoàl làng-bol Gadara, gen geh bàr nă cau kong cà lơh lik bơh brê bồc, tus tìp Khai; bol hơ̆ jàñ-bơsăk ngăn tiăn tus ờ geh cau lơi rơgơi lòt găn gùng hơ̆. 29 Mơ do, bol hơ̆ hòi-nggà mơ đơs: ‘‘Ñchi jơnau bol hi mơ Đi, ơ Kòn Yàng dê ? Đi tus ndo lài mơ tŭ tơngai làng tơnyăn bol hi ơ ?”
30 Ngài mơ bol hơ̆, geh mpồl oă sur găm sa. 31 Ală cà dăn Kơnràñ mơ đơs: ‘‘Dilah Đi bơtrơh bol hi, dăn ai bol hi in mut tam mpồl sur.” 32 Mơ Kơnràñ đơs mơ bol gơ: ‘‘Lòt tĕ !” Bol gơ lik, mut tam mpồl sur; mơ do jơh mơ mpồl sur, bơh kơh ntruñ tam dà-lềng, mơ chơt tam dà. 33 Bol cau ê ntoat dô, tus tam bòn dờng, yal wơl jơh ală bơta mơ jơnau gơrềng bơh bol cau kong cà lơh. 34 Mơ do, jơh mơ bòn dờng lik tìp Kơnràñ Jesu; mơ dơ̆ gŏ Kơnràñ, bol khai dăn Kơnràñ lik bơh kơnhoàl ù bol khai dê.
