Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bañ cah-rơña
7 * 1 Bañ cah-rơña, làng bol kòn ờ kong cah-rơña; 2 kơyoa bol kòn rơp kong cah-rơña jăt jơnau bol kòn neh cah-rơña, mơ cau rơp was bol kòn in mơ kơrnăc bol kòn neh was. 3 Ñchi bơh tài kòn gŏ dùl pet khoh tam măt oh mi kòn, mơ ròc-dra tam măt kòn, kòn ờ gŏ ? 4 Ngŏlah mbe lơh kòn đơs mơ oh mi kòn: ‘‘Lời añ tă pet khoh bơh dơ măt mê”, mơ do ròc-dra găm tam măt kòn taih ? 5 Ơ cau blăc-să, lài jơh tă tĕ ròc-dra bơh dơ măt kòn, mơ tŭ hơ̆ kòn rơp gŏ làng tă pet khoh bơh dơ măt oh mi kòn.
Bañ ai so in phan niăm-goh
* 6 Bañ ai so in phan niăm-goh, mơ bañ cơm lŭ màng bol kòn dê dơđăp sur, mbài gơjă mơ jơng mơ wơlke kăp bol kòn.
Dăn tĕ gen rơp pà
7 Dăn tĕ, gen rơp pà bol kòn in; jòi tĕ, gen bol kòn rơp bàn; teh tĕ, gen rơp geh pờ bol kòn in. 8 Kơyoa cau lơi dăn gen dờp; cau lơi jòi gen bàn; mơ cau lơi teh gen rơp geh pờ. 9 Geh cau lơi tam bol kòn, dilah kòn dăn bañ mơ ai khai in lŭ wơl ơ ? 10 Ngŏlah dilah khai dăn ka, mơ ai khai in bơs wơl ơ ? 11 Be hơ̆, dilah bol kòn, bulah cau iơh, mơ git pà kòn bol kòn in ală phan niăm, gen rơlau git nđờ, Bàp bol kòn lah Bơtau ơm tam trồ, rơp pà ală bơta niăm bol cau lơi in dăn mơ Khai.
Lơh tĕ cau in bơta he kờñ cau lơh he in
12 Gen tàng, jơh ală bơta lơi bol kòn kờñ cau lơh bol kòn in, gen bol kòn lơh tĕ cau in be hơ̆ sơl; kơyoa do lah Gùng boh-lăm mơ Ală jơnau ala-bơr.
Mpồng wêt mơ mpồng anàng
* 13 Mut tĕ găn mpồng wêt, kơyoa mpồng anàng mơ gùng dờng, gen lăm tus hơ bơta roh-rui, mơ geh gal cau mut găn tềng hơ̆; 14 ai mpồng wêt mơ gùng hăt, gen lăm tus hơ bơta kis, mơ dŭt cau bàn gơ !
Chi be lơi plai be hơ̆
15 Sền ngăc tĕ bol ala-bơr blăc, bol khai ai să belàt tus mơ bol kòn, mơya tam dơlăm, bol khai lah so rơhau aràk sa. 16 Bơh plai bol khai dê, bol kòn rơp đal-git bol khai: di cau pic plai ño bơh dơ rơlau lò, ngŏlah plai sơr bơh dơ lò-mrơt sơl ơ ? 17 Krung be hơ̆ sơl, chi niăm gơlik plai niăm, chi iơh gơlik plai iơh: 18 chi niăm ờ rơgơi gơlik plai iơh, mơ chi iơh ờ rơgơi gơlik plai niăm. 19 Chi lơi ờ gơlik plai niăm, gen kong kơl mơ cơm tam ồs. 20 Gen tàng, bơh plai bol khai dê, bol kòn rơp đal-git bol khai.
Cau jăt-dờn ngăn-ngồn
21 Ờ di jơh ală cau lơi đơs mơ Añ: ‘‘Ơ Kơnràñ, ơ Kơnràñ”, gen rơp geh mut tam lơgar trồ, mơya mìng cau lơi lơh jăt nùs-kờñ Bàp Añ dê, Bơtau ơm tam trồ lơm. 22 Geh gal cau rơp đơs mơ Añ tam ngai hơ̆: ‘‘Ơ Kơnràñ, ơ Kơnràñ, ờ di bơh sơnđăn Đi mơ bol hi neh đơs ala-bơr, bơh sơnđăn Đi mơ bol hi neh bơtrơh cà, bơh sơnđăn Đi mơ bol hi neh lơh rà broă pràn-gơnoar ơ ?” * 23 Mơ tŭ hơ̆, Añ rơp yal-tơlik bol khai in: Añ ờ tŭ lơi git bol mê; pleh tĕ ngài bơh dơ Añ, bol mê lah bol cau lơh bơta iơh-bơsăk.
24 Be hơ̆, cau lơi iăt ală jơnau đơs Añ dê do mơ lơh jăt, gen krung ndrờm be cau jăk-chài neh băc hìu khai hơđăng lŭ. 25 Mìu dùh, dà tih, càl khồm druh dơ hìu hơ̆, gen gơ krung ờ tơrlah; bơh neh geh băc hơđăng lŭ.
26 Ai cau lơi iăt ală jơnau đơs Añ dê do mơ ờ lơh jăt, gen krung ndrờm be cau brơngơl-gơla neh băc hìu khai hơđăng bràs. 27 Mìu dùh, dà tih, càl khồm druh dơ hìu hơ̆, gen gơ tơrlah, mơ gơ tơrlah-tơrlơm oă ngăn.”
Gùng bơto Kơnràñ Jesu dê
28 Mơ gơlik gơs lah tŭ Kơnràñ Jesu neh đơs ală jơnau hơ̆ rau, gen ală mpồl làng-bol ai lơh krơi bơh jơnau bơto Khai dê; * 29 kơyoa Khai bơto bol khai be Bơtau geh gơnăp-gơnoar, ờ di be bol gơnoar-cih bol khai dê.
