Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Pà phan dong-kờl cau tam bơta pơndơp
6 * 1 Sền ngăc tĕ, bañ lơh bơta song-dơpă bol kòn dê dơđăp cau, làng geh bol khai gŏ; dilah ờ be hơ̆, bol kòn rơp ờ geh phan-jờng dơ Bàp bol kòn, Bơtau ơm tam trồ. 2 Gen tàng, tŭ kòn pà phan dong-kờl cau, bañ uh kơluờk dơđăp kòn, be bol blăc-să lơh tam ală hìu-pơrjum mơ tam ală gùng, làng geh cau jờngrơ. Di ngăn, Añ đơs mơ bol kòn: Bol khai neh dờp phan-jờng bol khai dê rau.
3 Mơya tŭ kòn pà phan dong-kờl cau, bañ ai tê kiau kòn git broă tê ma kòn lơh, 4 làng broă pà kòn dê geh pơndơp, mơ Bàp kòn lah Bơtau gŏ tam tiah ndơp, rơp ai wơl kòn in.
Răc dăn tam tiah ndơp
5 Mơ tŭ bol kòn răc dăn, bañ lơh be bol cau blăc-să, bol khai gơboh ntào răc dăn tam ală hìu-pơrjum mơ tam ală jum gùng, làng geh cau gŏ. Di ngăn, Añ đơs mơ bol kòn: Bol khai neh dờp phan-jờng bol khai dê rau. 6 Mơya tŭ kòn răc dăn, mut tĕ tam adŭ kòn dê, mơ dơ̆ neh til mpồng, răc dăn tĕ mơ Bàp kòn lah Bơtau ơm tam tiah ndơp; mơ Bàp kòn lah Bơtau gŏ tam tiah ndơp, rơp ai wơl kòn in.
Jơnau răc ‘‘Ơ Bàp bol kòn”
7 Tŭ răc dăn, bol kòn bañ đơs rà jơnau be bol bơdìh: kơyoa bol khai tồn lah bơh đơs rà jơnau gen rơp geh dờp. 8 Be hơ̆, bañ đòm bol khai; bơh Bàp bol kòn git bol kòn kờñ ală bơta lơi, lài mơ tŭ bol kòn dăn mơ Khai.
9 Gen tàng, bol kòn răc dăn tĕ be do: Ơ Bàp bol kòn, Đi ơm tam trồ, dăn sơnđăn Đi geh pơniăm-goh,
* 10 gơnoar Đi tus, nùs-kơñ Đi dê gơlik gơs dơ tiah be tam trồ.
* 11 Dăn ai bol kòn in ngai do phan sa pah ngai;
12 săng dồs bol kòn in, be bol kòn săng cau in dồs mơ bol kòn;
13 bañ tơmut bol kòn tam bơta tơlòng, mơya tơngklàs bol kòn bơh bơta iơh.
14 Kơyoa dilah bol kòn hồ cau in ală jơnau tìs bol khai dê, gen Bàp bol kòn tam trồ krung rơp hồ bol kòn in
15 mơya dilah bol kòn ờ hồ cau in, gen Bàp bol kòn krung rơp ờ hồ ală jơnau tìs bol kòn dê.
Ơt-sa tam bơta pơndơp
16 Tŭ bol kòn ơt-sa, bañ lơh moăt-jrùng be bol blăc-să; bơh bol khai lơh ñòp muh ñòp măt, làng ràng-tơlik cau in lah bol khai ơt-sa. Di ngăn, Añ đơs mơ bol kòn: Bol khai neh dờp phan-jờng bol khai dê rau.17 Mơya tŭ kòn ơt-sa, bong tĕ bơñà dơ bồ kòn, mơ tuh tĕ muh-măt kòn, 18 mbài cau in gŏ kòn ơt-sa, mơya Bàp kòn in, lah Bơtau ơm tam tiah ndơp; mơ Bàp kòn lah Bơtau gŏ tam tiah ndơp, rơp ai wơl kòn in.
Đăm phan tam trồ
19 Bol kòn bañ tơrgùm-prăp bol kòn in ală đăm phan tam tiah, tềng hơ̆ geh mŏ tơrleh sa, mơ tềng hơ̆ bol thừ-blơ̆ tờ blong kơñau; 20 mơya bol kòn tơrgùm-prăp tĕ bol kòn in ală đăm phan tam trồ, tềng hơ̆ ờ geh mŏ tơrleh sa, mơ tềng hơ̆ bol thừ-blơ̆ ờ tờ blong kơñau; 21 bơh đăm phan kòn ơm tềng lơi, gen nùs kòn krung rơp ơm tềng hơ̆ sơl.
Đèng să-jăn dê
22 Đèng să-jăn dê lah măt. Be hơ̆, dilah măt kòn sàng-niăm, gen jơh să-jăn kòn rơp àng-goh; 23 mơya dilah măt kòn ờ diơng, gen jơh să-jăn kòn rơp klăm-jơngo. Be hơ̆, dilah bơta àng tam kòn lah bơta klăm-jơngo, gen bơta klăm-jơngo rơp lah git nđờ !
Ờ rơgơi duh-broă
Yàng ndăng mơ priă-jền ndăng
24 Ờ geh cau lơi rơgơi duh-broă bàr nă cau tờm: bơh ngŏlah khai rơp ềng mơ cau do mơ gơboh mơ cau ne, ngŏlah khai rơp đềt-mềr mơ cau do mơ sền ờ sơp cau ne; bol kòn ờ rơgơi duh-broă Yàng mơ priă-jền.
Pindờn dơ Yàng săp-pơndăp
25 Gen tàng, Añ đơs mơ bol kòn: Bol kòn bañ kơlôi-kơnòl bơta kis bol kòn in ñchi bol kòn sa, mơ să-jăn bol kòn in ñchi bol kòn soh. Bơta kis ờ rơlau mơ phan sa, mơ să-jăn ờ rơlau mơ phan soh ơ ? 26 Bol kòn sền tĕ sềm tam trồ, gơ ờ sih, krung ờ tơwès, krung ờ tơrgùm tam đăm, mơ Bàp bol kòn tam trồ krung siăm-ròng gơ. Bol kòn ờ màng rơlau mơ bol gơ ơ ? 27 Ñcau tam bol kòn bơh kơlôi mơ rơgơi bơtơl dùl tal dơ rài kis he ơ ? 28 Mơ gơrềng bơh phan soh, ñchi bol kòn kơlôi-kơnòl ? Sền-kơlôi tĕ ală bơkào bŏ tam blàng gơhòn be lơi: gơ ờ bòl-glar, krung ờ rồi brài. 29 Mơya Añ đơs mơ bol kòn lah, Salomon tam jơh bơta gơklŏ khai dê krung ờ geh soh be dùl nơm tam ală bơkào gen. 30 Dilah ñhơt tam blàng, ngai do găm mơ ngai hìng kong sơrbì tam rơm ồs, mơ Yàng găm tơnsoh be hơ̆, gen bol kòn rơlau git nđờ, ơ bol ờ hoan pindờn ? 31 Gen tàng, bol kòn bañ kơlôi-kơnòl mơ đơs: ‘‘Ñchi bol he rơp sa ?”, ngŏlah: ‘‘Ñchi bol he rơp hùc ?”, ngŏlah: ‘‘Ñchi bol he rơp soh ?” 32 Kơyoa jơh ală bơta hơ̆, ală làng-bol bơdìh jòi; mơ Bàp bol kòn tam trồ git bol kòn di kờñ jơh ală bơta hơ̆. 33 Lài jơh, bol kòn jòi tĕ lơgar Yàng mơ bơta song-dơpă Khai dê, mơ jơh ală bơta hơ̆ rơp geh ai bơtơl bol kòn in. 34 Gen tàng, bol kòn bañ kơlôi-kơnòl gơrềng bơh ngai hìng; kơyoa ngai hìng rơp kơlôi-kơnòl gơ in. Bơta bòl-glar ngai lơi lah tơl ngai hơ̆ in.
