Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
- Jơnau bơto hơđăng bơnơm
Phàm bơta bơtoah
5 * 1 Gŏ ală mpồl làng-bol, Kơnràñ guh hơđăng bơnơm; Khai nggui, mơ bol jăt-dờn Khai dê tus mơ Khai;
2 Kơnràñ pờ bơr bơto bol khai mơ đơs:
* 3 ‘‘Bơtoah bol cau nùs rơbah-rơbừp, bơh lơgar trồ gơrê mơ bol khai.
* 4 Bơtoah bol cau ñìm-moăt, bơh bol khai rơp geh pơndờm-pơnđiăng.
5 Bơtoah bol cau niăm-lơnhơn, bơh bol khai rơp geh ù-tiah.
6 Bơtoah bol cau jơgloh tơhìr bơta song-ring, bơh bol khai rơp geh hờm.
7 Bơtoah bol cau nđàc-sơngit, bơh bol khai rơp geh sơnđàc.
8 Bơtoah bol cau nùs sàng-goh, bơh bol khai rơp gŏ Yàng.
9 Bơtoah bol cau pơnring-lơngai, bơh bol khai rơp geh hòi lah kòn Yàng.
10 Bơtoah bol cau kong kup-kơryăn bơh bơta song-ring, bơh lơgar trồ gơrê mơ bol khai.
11 Bơtoah bol kòn tŭ cau bơtăt-bơtrờh bol kòn, kup-kơryăn bol kòn, mơ đơs jơh ală bơta iơh blơ̆-blăc tamdră mơ bol kòn tài bơh Añ. 12 Chờhờp mơ rơhờn tĕ, bơh phan-jờng bol kòn dê dờng ngăn tam trồ; kơyoa krung be hơ̆ sơl, bol khai neh kup-kơryăn bol ala-bơr, lah ală cau lòt lài mơ bol kòn.
Boh ù dê mơ bơta àng dunia dê
13 ‘‘Bol kòn lah boh ù dê; dilah boh hơ̆ gơs bơsàp, ñchi ai pơnđồm gơ ? Gơ ờ kuơ chi lơi in tai, mìng cơm hơ bơdìh lơm mơ cau jă hơđăng.
14 Bol kòn lah bơta àng dunia dê. Bòn dờng geh ơn hơđăng bơnơm gen ờ rơgơi ndơp; 15 ờ geh cau lơi chu đèng mơ ơn gơ tam rồm, mơya ơn gơ hơđăng jơng đèng làng sòl-pơnđàng jơh ală cau ơm tam hìu in. 16Bơta àng bol kòn dê pal sòl-pơnđàng dơđăp ală cau, làng bol khai gŏ ală broă niăm bol kòn dê mơ tơngklŏ Bàp bol kòn dê, Bơtau ơm tam trồ.
Kơnràñ Jesu bơsir Gùng boh-lăm Moise dê
* 17 Bol kòn bañ kơlôi Añ tus làng săng-lời Gùng boh-lăm ngŏlah Ală jơnau ala-bơr; Añ ờ tus làng săng-lời, mơya làng bơsir. 18 Di ngăn, Añ đơs mơ bol kòn: Jơl tus tŭ trồ tiah gơgăn, gen dùl pêt dùl lêl tam Gùng boh-lăm rơp ờ gơgăn, jơl tus tŭ jơh ală bơta gơlik gơs. 19 Be hơ̆, cau lơi săng-lời dùl jơnau tam ală jơnau sồr-lăm dêt-rơhền rơlau jơh hơ̆, mơ bơto cau be hơ̆, gen rơp geh hòi lah cau dêt-rơhền rơlau jơh tam lơgar trồ; ai cau lơi lơh mơ bơto,gen rơp geh hòi lah cau dờng tam lơgar trồ.
Bơta song-dơpă cau jăt-dờn dê
* 20 Kơyoa Añ đơs mơ bol kòn: Dilah bơta song-dơpă bol kòn dê ờ lin rơlau mơ bơta song-dơpă bol gơnoar-cih mơ bol Phariseo dê, gen bol kòn rơp ờ geh mut tam lơgar trồ.
Bañ gơjrañ
* 21 Bol kòn neh kơno đơs bol cau yau in: ‘‘Bañ gơsơt cau; cau lơi gơsơt cau, gen rơp kong cah-rơña.” 22Mơya Añ đơs mơ bol kòn: Cau lơi gơjrañ mơ oh mi he, gen rơp kong cah-rơña sơl; cau lơi đơs mơ oh mi he: ‘‘Brơngơl”, gen rơp kong mpồl-pơrjum cah-rơña; cau lơi đơs mơ oh mi he: ‘‘Sơnrăng”, gen rơp kong ồs brah-tìng. 23 Be hơ̆, dilah kòn rơp pồ phan pơdơng kòn dê dơ jơnào, mơ tềng hơ̆ kah wơl oh mi geh jơnau tamdră mơ kòn, 24 gen kòn lời tĕ phan pơdơng kòn dê tềng hơ̆ dơđăp jơnào, lài lòt tam bơsòr wơl mơ oh mi, sòng gen tus pồ phan pơdơng kòn dê. 25 Lơh ring tĕ mhar mơ cau sò-tơm kòn dê, tŭ kòn găm tam gùng bal mơ khai, mbài cau sò-tơm jào kòn cau cah-rơña in, mơ cau cah-rơña jào kòn cau ling in, mơ kòn kong tơmut tam hìu jàm. 26 Di ngăn, Añ đơs mơ kòn: Kòn rơp ờ lik bơh tềng hơ̆, jơl tus tŭ kòn tơm jơh priă su dut-ndơl.
Bañ lơh bơrnàn
* 27 Bol kòn neh kơno đơs: ‘‘Bañ lơh bơrnàn.” 28 Ai Añ, Añ đơs mơ bol kòn: Cau lơi sền cau ùr mơ hàm-kờñõ khai, gen neh lơh bơrnàn mơ khai tam nùs he. 29 Dilah măt ma kòn lơh kòn in gơtup tìs, gen kơluĕ tĕ gơ mơ cơm ngài bơh dơ kòn; kơyoa tiăn roh dùl bơnah să, gen niăm rơlau kòn in lah jơh să-jăn kòn kong tơmut tam brah-tìng. 30 Mơ dilah tê ma kòn lơh kòn in gơtup tìs, gen koh tĕ gơ mơ cơm ngài bơh dơ kòn; kơyoa tiăn roh dùl bơnah să, gen niăm rơlau kòn in lah jơh să-jăn kòn kong tơmut tam brah-tìng.
Bañ lời bao
* 31 Geh đơs tai: ‘‘Cau lơi lời bao ùr he, gen pal ai khai in sră tamlời.” 32 Ai Añ, Añ đơs mơ bol kòn: Cau lơi lời bao ùr he, ờ kờp bơh bơta bơrnàn, gen lơh khai in bơrnàn; mơ cau lơi bao mơ cau ùr neh kong lời hơ̆, gen krung bơrnàn sơl.
Bañ sơntơm
* 33 Bol kòn neh kơno đơs tai mơ cau yau: ‘‘Bañ sơntơm blăc; mơya bơsir tĕ ală jơnau sơntơm mê dê mơ Yàng.” 34 Ai Añ, Añ đơs mơ bol kòn: Bañ sơntơm chi lơi, bañ ai trồ mơ sơntơm, kơyoa gơ lah sơbàn Yàng dê, * 35 bañ ai ù mơ sơntơm, kơyoa gơ lah kơrnờl jơng Khai dê, bañ ai Jerusalem mơ sơntơm, kơyoa gơ lah bòn dờng Bơtau dờng dê; 36 krung bañ ai bồ kòn mơ sơntơm, kơyoa kòn ờ rơgơi lơh dùl ñhe sŏ gơlik kò ngŏlah jù sơl. 37 Mơya bơr bol kòn pal lah: ‘‘Geh, đơs geh”, ‘‘Ờ, đơs ờ”; rơlau mơ hơ̆ lah bơh cà iơh.
Bañ tàng tê
* 38 Bol kòn neh kơno đơs: ‘‘Măt sal măt, mơ sề sal sề.” * 39 Ai Añ, Añ đơs mơ bol kòn: Bañ tamdră mơ cau iơh; mơya dilah cau lơi pah kòn dơ tơrmồ ma, gen ai tĕ khai in đah ne tai; 40 mơ cau lơi kờñ yă kòn làng ai ào dơlăm kòn dê, gen lời tơn tĕ tai khai in ào bơdìh; 41 mơ cau lơi kup kòn lòt dùl rơbô cơnđoà, gen lòt tĕ bal mơ khai bàr rơbô. 42 Cau lơi dăn mơ kòn, gen ai tĕ khai in; mơ cau lơi kờñ càn mơ kòn, gen bañ wơl ngkời.
Pal gơboh mơ cau sò-tơm
* 43 Bol kòn neh kơno đơs: ‘‘Gơboh tĕ mơ cau gơp mê dê, mơ ềng-gơjrañ tĕ mơ cau sò-tơm mê dê.” 44 Ai Añ, Añ đơs mơ bol kòn: Gơboh tĕ mơ bol sò-tơm bol kòn dê, răc dăn tĕ bol kup-kơryăn bol kòn in, 45 làng bol kòn in gơs bol kòn Bàp bol kòn dê, Bơtau ơm tam trồ, bơh Khai lơh măt tơngai Khai dê lik hơđăng bol iơh mơ bol niăm, mơ lơh mìu dùh hơđăng bol song-dơpă mơ bol ờ song-dơpă. 46 Kơyoa dilah bol kòn gơboh mơ bol cau gơboh mơ bol kòn, gen bol kòn geh phan-jờng lơi taih ? Bol dar dia ờ lơh be hơ̆ ơ ? 47 Dilah bol kòn mìng đơs niăm-să bol oh mi bol kòn dê lơm, gen ñchi rơlau bol kòn lơh taih ? Bol bơdìh ờ lơh be hơ̆ ơ ? 48 Gen tàng, bol kòn gơs tĕ niăm wil-tơl be Bàp bol kòn tam trồ lah niăm wil-tơl.
