Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu kong cà tơlòng
4 * 1 Tŭ hơ̆, Kơnràñ Jesu geh Nhơm lăm tus tam blàng bràs, làng kong cà tơlòng. 2 Mơ Kơnràñ neh ơt-sa tam poan jơt ngai mơ poan jơt măng, tơnơ̆ hơ̆, Khai jơgloh. * 3 Jơi tơlòng tus rềp đơs mơ Kơnràñ: ‘‘Dilah mê lah Kòn Yàng dê, sồr tĕ làng ală pơnai lŭ do gơs bañ !” * 4 Kơnràñ hơ lah: ‘‘Neh geh cih: ‘‘Kòn bơnus kis ờ di mìng bơh bañ lơm, mơya găm bơh jơh ală jơnau gơlik bơh bơr Yàng dê.”‘
5 Tŭ hơ̆, cà cèng Kơnràñ tus tam bòn dờng niăm-goh, ơn Khai hơđăng bồ joc hìu duh-khoai, * 6 mơ đơs mơ Khai: ‘‘Dilah mê lah Kòn Yàng dê, ntruñ tĕ dơ tiah ! Kơyoa neh geh cih: ‘‘Bơh mê, Yàng rơp sồr bol huềng-duh Khai dê, mơ bol khai rơp ai tê đơ mê, mbài mê gơtup jơng dơ lŭ.”‘
7 Kơnràñ Jesu đơs mơ gơ: ‘‘Krung neh geh cih: ‘‘Mê bañ tơlòng Kơnràñ Yàng mê dê.”‘
8 Cà cèng tai Kơnràñ guh hơđăng bơnơm jơnhoa ngăn, mơ sơnđio Khai in jơh ală lơgar dunia mơ bơta gơklŏ gơ dê, 9 mơ đơs mơ Khai: ‘‘Jơh ală bơta do, añ rơp pà mê in, dilah mê kun să duh-khoai añ.” * 10 Tŭ hơ̆, Kơnràñ Jesu đơs mơ gơ: ‘‘Ruc tĕ, ơ Satan ! Bơh neh geh cih: ‘‘Kơnràñ Yàng mê dê, mê pal duh-khoai, mơ duh-broă mìng Khai lơm.”‘
11 Tŭ hơ̆, cà lời Kơnràñ, mơ do bol huềng-duh tus rềp, mơ duh-broă Khai.
Kơnràñ Jesu pleh lòt tam Galilea
12 Tŭ Kơnràñ Jesu kơno Joan neh kong jào, gen Khai pleh lòt tam Galilea. 13 Lời Nazareth, Kơnràñ tus ơm tam Kapharnaum, dơ gah dà-lềng, 14 tam kơnhoàl ù Zabulon mơ Nepthali, làng gơlik di ngăn jơnau Isaia, cau ala-bơr, neh đơs:
15 ‘‘Tiah Zabulon mơ tiah Nepthali, gùng dà-lềng, đah ne Jordano, Galilea ală làng-bol bơdìh dê;
* 16 làng-bol nggui tam klăm-jơngo, neh gŏ bơta àng dờng, mơ bol cau nggui tam tiah mơ mbur bơta chơt dê, bơta àng neh lik bol khai in.”* 17 Bơh tŭ hơ̆, Kơnràñ Jesu sơntờm yal-bơto mơ đơs: ‘‘Bol mê ềng-màl tĕ; bơh lơgar trồ neh tus rềp rau.”
Kơnràñ Jesu hòi poan nă cau jăt-dờn sơnrờp
18 Tam tŭ lòt rò gah dà-lềng Galilea, Kơnràñ gŏ bàr nă oh mi, lah Simon hòi lah Petro, mơ Andrea lah oh khai, găm dăng bơrtơng tam dà-lềng; bơh bol khai lah cau kup ka. 19 Kơnràñ đơs mơ bol khai: ‘‘Bol mê jăt tĕ Añ, Añ rơp lơh bol mê gơs cau kup ka bơnus.” 20 Bol khai lời mơ bơrtơng, mơ jăt Kơnràñ.
21 Bơh tềng hơ̆ lòt tai, Kơnràñ gŏ bàr nă oh mi ndai, lah Jakobe kòn Zebede dê, mơ Joan lah oh khai, găm srăng bơrtơng tam ahò bal mơ Zebede lah bàp bol khai dê, mơ Kơnràñ hòi bol khai. 22 Tŭ hơ̆ mơ, bol khai lời ahò mơ bàp he, mơ jăt Kơnràñ.
Kơnràñ Jesu bơto mơ tơmbời jơh bơta kòp-jê
* 23 Mơ Kơnràñ Jesu lòt làm Galilea, bơto tam ală hìu-pơrjum bol khai dê, yal-pơnrơ Jơnau Yal Niăm lơgar trồ, mơ tơmbời jơh bơta kòp-tê jê-să mơ jơh bơta lơbơn-lơñơ tam làng-bol. 24 Jơnau tiơng Kơnràñ dê pơnrơ làm Syria; cau cèng tus mơ Khai jơh ală cau kòp-jê gơkoă tơl bơta kòp-tê jê-să, ală cau kong cà lơh, phut lơh, kuet-kơlte, mơ Kơnràñ neh tơmbời bol khai. 25 Ală mpồl làng-bol gal bơh Galilea, Dekapoli, Jerusalem, Judea mơ đah ne Jordano, jăt Kơnràñ.
