Jơnau Yalniam Mattheo-Pơnah 3

1. YAL-PƠNRƠ LƠGAR TRỒ

2. Bơnah cih-yal

Joan Baptista yal-bơto

3     1 Tam ală ngai hơ̆, Joan Baptista tus yal-bơto tam blàng bràs Judea * 2 mơ đơs: ‘‘Bol mê ềng-màl tĕ; bơh lơgar trồ neh tus rềp rau.”

       * 3 Khai lah cau mơ Isaia, cau ala-bơr, neh đơs: ‘‘Geh săp cau hòi-nggà tam blàng bràs: ‘‘Rơcăng tĕ gùng Kơnràñ, bơsong tĕ ală gùng-dà Khai dê !”‘‘

4 Joan do soh ào tơrnò làk-đà, kơt but mơ che gơltau; phan sa khai dê lah srah nting mơ dà kròt brê.

       5 Tŭ hơ̆, Jerusalem, jơh Judea mơ jơh tiah gùt dar Jordano lòt tus mơ khai, * 6 yal tìs he mơ geh khai pơnđum tam dà Jordano.

       7 Gŏ gal cau Phariseo mơ cau Sadduseo tus làng geh khai pơnđum, khai đơs mơ bol hơ̆: ‘‘Ơ nòi bơs rai, ñcau neh yal bol mê in gùng dô pleh bơh bơta gơjrañ rơp tus taih ? 8 Be hơ̆, lơh gơlik tĕ plai di-pal mơ nùs ềng-màl, 9 mơ bañ kơlôi rơgơi đơs ndring he lah: ‘‘Bol he geh Bàp lah Abraham”; bơh Añ đơs mơ bol mê lah, Yàng rơgơi ai ală pơnai lŭ do bơtào gơs kòn sau Abraham. 10 Kơyoa sùng neh ơn dơ tờm chi; be hơ̆, chi lơi ờ gơlik plai niăm, gen kong kơl mơ cơm tam ồs. * 11 Añ, añ pơnđum bol mê tam dà làng ềng-màl; ai cau rơp tus tơnơ̆ añ, pràn rơlau mơ añ, mơ añ ờ pal ià khŏ Khai dê; tờm Khai rơp pơnđum bol mê tam Yàng Nhơm mơ ồs; * 12 đồng neh tam tê Khai, Khai rơp puh kloh kòi tam blàng Khai dê, kòi rơlai Khai dê, Khai rơp tơrgùm ơn tam đăm, ai kòi nsiăp, gen Khai rơp chu tam ồs ờ gŏ chơt.”

Kơnràñ Jesu dờp bơta pơnđum

       13 Tŭ hơ̆, Kơnràñ Jesu bơh Galilea lòt tus mơ Joan tam Jordano, làng khai pơnđum Kơnràñ in. 14 Mơya Joan kơryăn Kơnràñ mơ đơs: ‘‘Să tờm añ pal geh Đi pơnđum, mơ Đi tus mơ añ ơ ?” 15 Hơ wơl, Kơnràñ Jesu đơs mơ khai: ‘‘Tŭ do, lơh tĕ gơ be hơ̆, bơh bol he pal lơh sir jơh bơta song-ring.” Tŭ hơ̆ Joan dờn Kơnràñ. 16 Neh geh pơnđum rau, Kơnràñ Jesu guh mơ bơh dà; mơ do, ală kơloàng trồ gơpờ Khai in,  mơ Khai gŏ Nhơm Yàng dê mù be ntờp mơ tus hơđăng Khai. * 17 Mơ do, geh săp bơh trồ đơs: ‘‘Do lah Kòn kờñ-gơboh Añ dê, tam Khai, Añ chờ nùs ngăn.”