Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơtô bồc soh gời
28 * 1 Tơnơ̆ mơ ngai sabbat, tŭ rìng-àng ngai sơnrờp tam poh, Maria Magdala mơ Maria ndai tus còp bơtô bồc. 2 Mơ do, gơlik gơs ù gơ mprơm pràn ngăn: kơyoa huềng-duh Kơnràñ dê mù bơh trồ, tus pơrlă pơnai lŭ mơ nggui hơđăng gơ. 3 Rùp să huềng-duh dê be puh-lèp, mơ ào khai bò be piar. 4 Bơh ngòt huềng-duh, bol ling khiă rơm să mơ gơlơh be chơt. 5 Huềng-duh hơ mơ đơs mơ bol cau ùr: ‘‘Bol ai bañ ngòt ! Bơh añ git lah bol ai jòi Kơnràñ Jesu neh kong tơs dơ chikal. 6 Kơnràñ ờ ơm tềng do: bơh Khai neh kis wơl be Khai neh đơs. Tus tĕ mơ sền anih neh ơn Khai. 7 Mơ mhar lòt yal tĕ bol jăt-dờn Khai dê in: ‘‘Khai neh kis wơl bơh bol cau chơt, mơ do Khai lòt lài mơ bol mê hơ Galilea; tềng hơ̆ bol mê rơp gŏ Khai.” Do añ neh đơs mơ bol ai rau.” 8 Bol khai sơrbăc-sơrbăng lik bơh bơtô bồc, ngòt mơ chờhờp ngăn, ntoat yal bol jăt-dờn Kơnràñ dê in.
Kơnràñ Jesu tơnggŏ măt mơ bol cau ùr
9 Mơ do, Kơnràñ Jesu tìp bol khai mơ đơs: ‘‘Niăm- să bol ai.” Bol khai tus koar jơng Kơnràñ mơ cùn-khoai Khai. * 10 Tŭ hơ̆, Kơnràñ Jesu đơs mơ bol khai: ‘‘Bol kòn bañ ngòt; lòt tĕ yal ală oh mi Añ in, làng bol khai lòt hơ Galilea, mơ tềng hơ̆ bol khai rơp gŏ Añ.”
Bol ăt-bồ bol lơh-yàng dê pơrlồm
11 Tam tŭ bol khai lòt, gen do geh cau tam bol ling khiă tus tam bòn dờng, mơ yal bol ăt-bồ bol lơh-yàng dê in jơh ală bơta neh gơlik gơs. 12 Bol ăt-bồ bol lơh-yàng dê pơrjum bal mơ bol kuang kra, mơ lồc neh bơyai bal, bol khai neh ai bol ling in oă priă, 13 mơ đơs: ‘‘Bol mê đơs tĕ: ‘‘Bol jăt-dờn Khai dê neh tus tam tŭ trồ măng, mơ kơñau Khai tam tŭ bol hi găm bic.” 14 Mơ dilah cau kuang dờng lơgar kơno jơnau hơ̆, bol hi rơp pơnrài khai, mơ lơh bol mê in ờ gơkòl chi lơi.” 15 Bol ling lồc dờp priă, neh lơh jăt be bol khai geh bơto. Mơ jơnau hơ̆ geh pơnrơ tam bol Jude jơl tus dơ ngai do.
Kơnràñ Jesu tơnggŏ măt tam Galilea, mơ pơyoa bol jăt-dờn tus mơ jơh ală làng-bol
16 Jơt dùl nă cau jăt-dờn lòt hơ Galilea, tus hơ bơnơm Kơnràñ Jesu neh sồr bol khai, 17 tŭ gŏ Kơnràñ, bol khai cùn khoai; mơya geh bol bà pin wi-wơ. * 18 Kơnràñ Jesu tus rềp, đơs mơ bol khai: ‘‘Jơh ală gơnoar tam trồ mơ tam tiah neh geh jào Añ in. 19 Be hơ̆, bol kòn lòt bơto tĕ jơh ală làng-bol, pơnđum bol khai bơh sơnđăn Yàng Bàp mơ Yàng Kòn mơ Yàng Nhơm, 20 bơto bol khai prăp jơh ală jơnau Añ neh sồr bol kòn. Mơ do, Añ ơm bal mơ bol kòn tam jơh ală ngai tus lồi-dut dunia.”
