Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu kong cèng hơ Pilato, cau kuang dờng lơgar
27 1 Drim tus, jơh ală cau ăt-bồ bol lơh-yàng dê mơ ală cau kuang kra làng-bol dê bơyai bal tamdră mơ Kơnràñ Jesu làng gơsơt Khai. * 2 Bol khai cèng Kơnràñ găm kong căp mơ jào dơ Pilato lah cau kuang dờng lơgar.
Juda lik-lòt yồng ngko
3 Tŭ hơ̆, Juda lah cau neh jào Kơnràñ, gŏ Khai kong yal-glài, gen ềng-màl mơ cèng wơl pe jơt đong priă bol ăt-bồ bol lơh-yàng dê mơ bol kuang kra in, 4 mơ đơs: ‘‘Añ neh lơh tìs jào mhàm ờ geh tìs.” Mơya bol khai đơs: ‘‘Ñchi jơnau mơ bol hi taih ? Dò mê dê !” 5 Juda cơm ală đong priă tam hìu duh-khoai, mơ lik-lòt yồng ngko. 6 Bol ăt-bồ bol lơh-yàng dê khòm ală đong priă hơ̆ mơ đơs: ‘‘Ờ geh ơn priă do tam đăm niăm-goh, kơyoa hơ̆ lah priă khà mhàm.” 7 Neh bơyai bal rau, bol khai ai priă hơ̆ blơi sre cau chài mòn ù dê làng lơh tiah tơp bồc bol cau năc krơi. 8 Tài bơh hơ̆, sre gen geh hòi lah sre mhàm jơl tus ngai do. 9 Tŭ hơ̆ neh gơlik gơs di ngăn jơnau Jeremia, cau ala-bơr, neh đơs: ‘‘Bol khai neh khòm pe jơt đong priă, lah priă màng Bơtau geh pơyòm dê, mơ ală kòn sau Israel neh pơyòm, * 10 mơ bol khai neh ai priă hơ̆ blơi sre cau lơh glah dê, jăt be Kơnràñ neh sồr Añ.”
Kơnràñ Jesu lik dơđăp Pilato, cau kuang dờng lơgar
11 Kơnràñ Jesu ntào dơđăp cau kuang dờng lơgar; mơ cau kuang dờng lơgar lùp Kơnràñ mơ đơs: ‘‘Mê lah Bơtau bol Jude ơ ?” Kơnràñ Jesu đơs: ‘‘Ồng đơs hơ̆.” 12 Mơya tŭ kong bol ăt-bồ bol lơh-yàng dê mơ bol kuang kra yă, gen Kơnràñ ờ hơ chi lơi. 13 Tŭ hơ̆, Pilato đơs mơ Kơnràñ: ‘‘Mê ờ kơno git nđờ jơnau cơng bol khai đơs tamdră mơ mê ơ ?” 14 Kơnràñ ờ hơ mơ khai dùl jơnau lơi, tiăn tus cau kuang dờng lơgar ai lơh krơi ngăn.
15 Pah dơ̆ leh dờng, cau kuang dờng lơgar ờs- mờng hồ làng-bol in dùl nă cau ơm jàm lơi bol khai kờñ. 16 Tŭ hơ̆, bol khai geh dùl nă cau kong jàm pơnrơ ngăn, sơnđăn lah Barabba. 17 Be hơ̆, tŭ bol khai neh pơrjum bal, Pilato đơs mơ bol khai: ‘‘Ñcau bol mê kờñ añ hồ bol mê in: Barabba ngŏlah Jesu hòi lah Kristo ?” 18 Kơyoa khai git lah bơh nùs boah-gơjrañ mơ bol khai neh jào Kơnràñ.
19 Tam tŭ khai găm nggui hơđăng cơnờng cah-rơña, bao ùr khai pơyoa cau tus đơs mơ khai: ‘‘Mê mơ cau song-dơpă hơ̆ bañ geh jơnau lơi, kơyoa ngai do añ neh kong bòl oă ngăn tam mpao tài bơh khai.” 20 Mơya bol ăt-bồ bol lơh-yàng dê mơ bol kuang kra bơchồt ală mpồl làng-bol dăn hồ Barabba mơ tơnroh Kơnràñ Jesu. 21 Cau kuang dờng lơgar hơ wơl mơ đơs mơ bol khai: ‘‘Ñcau tam bàr nă do, bol mê kờñ añ hồ bol mê in taih ?” Bol khai đơs: ‘‘ Barabba !” 22 Pilato đơs mơ bol khai: ‘‘Gen tàng, ñchi añ rơp lơh mơ Jesu hòi lah Kristo taih ?” Jơh ală cau đơs: ‘‘Khai pal kong tơs dơ chikal !” 23 Cau kuang dờng lơgar đơs: ‘‘Mơya ñchi bơta iơh Khai neh lơh taih ?”
Bol khai sơlơ nggà dờng rơlau mơ đơs: ‘‘Khai pal kong tơs dơ chikal !”
24 Pilato gŏ lah ờ gơlik kuơ chi lơi, mơya sơlơ gơlik gơs bơta nggồr-nggàc dờng rơlau, gen khai ai dà rào tê dơđăp mpồl làng-bol mơ đơs: ‘‘Añ ờ geh tìs bơh mhàm do; dò bol mê dê !” 25 Jơh làng-bol hơ mơ đơs: ‘‘Mhàm Khai tuh hơđăng bol hi, mơ hơđăng kòn sau bol hi dê.” 26 Tŭ hơ̆, khai hồ Barabba bol khai in; ai Kơnràñ Jesu, khai sồr pù-lơh mơ jào làng kong tơs dơ chikal.
Kơnràñ Jesu kong groă mơ gơnoàr lò
27 Tŭ hơ̆, bol ling cau kuang dờng lơgar dê cèng Kơnràñ Jesu mut tam anih lơh broă cau kuang dê, mơ pơrjum jơh mpồl ling gùt dar Kơnràñ. 28 Bol khai hồ ào Kơnràñ, tơnwar ào prơhê Khai in, 29 ai lò wăc dùl nơm gơnoàr groă hơđăng bồ Khai, mơ ơn dùl nơm gai proh dơ tê ma Khai, mơ cùn kơltăng dơđăp Khai, bol khai ñŏ-tơnhial Khai mơ đơs: ‘‘Niăm-să Bơtau bol Jude dê !” 30 Bol khai choh dơ Kơnràñ, ai gai proh tờl dơ bồ Khai. 31 Tơnơ̆ mơ tŭ bol khai neh ñŏ-tơnhial Kơnràñ, gen bol khai hồ ào prơhê, tơnsoh wơl Khai in ào Khai dê, mơ cèng Khai lòt, làng tơs dơ chikal.
32 Tam tŭ lik-lòt, bol khai tìp dùl nă cau Sirene, sơnđăn lah Simon; bol khai kup bơklơn cau do tui chikal Kơnràñ dê. 33 Bol khai tus tam dùl bă tiah, hòi lah Golgotha, hơ̆ lah tiah Kơndoh Bồ, * 34 bol khai ai Kơnràñ in ñô alăk pơrlŭ bal mơ plai măt bơtăng; mơ dơ̆ neh liăp, Kơnràñ ờ bài ñô. 35 Tơnơ̆ mơ tŭ bol khai neh tơs Kơnràñ dơ chikal, bol khai tă khà, tampà ào Khai dê 36 mơ nggui khiă Khai tềng hơ̆. 37 Bol khai ơn hơđăng bồ Kơnràñ jơnau cih bơta kơt tìs lơh glài: ‘‘Do lah Jesu, Bơtau bol Jude dê.”
Kơnràñ Jesu kong tơmbàs
38 Tŭ hơ̆, krung geh bàr nă cau thừ-blơ̆ kong tơs dơ chikal bal mơ Kơnràñ, dùl nă đah ma, dùl nă đah kiau. 39 Ală cau lòt găn đơs tràl-sơrbil dơ Kơnràñ, rơtơs bồ, 40 mơ đơs: ‘‘Mê lah cau lơh tơrlah hìu duh-khoai, mơ tam pe ngai bơtào wơl gơ, tơngklàs tĕ să tờm mê; dilah mê lah Kòn Yàng dê, mù tĕ bơh chikal !” 41 Krung ndrờm be hơ̆ sơl, bol ăt-bồ bol lơh-yàng dê, bal mơ bol gơnoar-cih, mơ bol kuang kra ñŏ-tơnhial mơ đơs: 42 ‘‘Khai neh tơngklàs ală cau ndai, mơ ờ rơgơi tơngklàs să tờm. Khai lah Bơtau Israel; gen tŭ do Khai mù tĕ ih bơh chikal, mơ bol he rơp pindờn Khai. 43 Khai kơnờm dơ Yàng; gen tŭ do Yàng rơp tơngklàs Khai, dilah Yàng kờñ Khai. Tài bơh Khai neh đơs: ‘‘Añ lah Kòn Yàng dê.”‘‘ 44 Bol thừ-blơ̆ kong tơs dơ chikal bal mơ Kơnràñ, krung bơtăt-bơtrờh Khai be hơ̆ sơl.
Kơnràñ Jesu tăc nhơm
* 45 Bơh jiờ dơ̆ prau gơlik klăm-jơngo làm ù jơl tus dơ jiờ dơ̆ sin. * 46 Pơgăp dơ jiờ dơ̆ sin, Kơnràñ Jesu hòi mơ săp dờng mơ đơs: ‘‘Eli, Eli, lema sabacthani ?”, hơ̆ lah: ‘‘Ơ Yàng kòn dê, ơ Yàng kòn dê, ñchi gơlơh Đi săng-lời kòn ?” 47 Geh bol bà tam ală cau ntào tềng hơ̆, kơno gen đơs: ‘‘Khai hòi Elia.” 48 Tŭ hơ̆ mơ, geh dùl nă tam bol khai ntoat ai dùl nơm phan-nsồp iŭ bềng dà sràt, ơn dơ gai proh mơ ai Kơnràñ in hùc. 49 Mơya ală cau ndai đơs: ‘‘Lời dò, lòng sền Elia tus tơngklàs Khai sơl ờ ?” 50 Mơya Kơnràñ Jesu nggà tai dùl săp dờng mơ tăc nhơm.
* 51 Mơ do, biài kơrnìng hìu duh-khoai dê gơcrè bơh hơđăng tus hơđơm gơs bàr bơnah, mơ ù gơ mprơm, lŭ klềr gơ bơcah; 52 ală bơtô bồc gơpờ, mơ oă bồc bol niăm-goh dê găm bic neh guh wơl, * 53 mơ tơnơ̆ mơ tŭ Kơnràñ kis wơl, bol khai lik bơh bơtô bồc, tus tam bòn dờng niăm-goh mơ tơnggŏ măt gal cau in. 54 Cau ăt dùl rơhiăng ling mơ ală cau bal mơ khai ơm khiă Kơnràñ Jesu, gŏ ù gơ mprơm mơ ală bơta hơ̆ gơlik gơs, gen ngòt ngăn mơ đơs: ‘‘Ngăn, cau do lah Kòn Yàng dê !”
55 Tềng hơ̆, geh gal cau ùr ơm sền bơh ngài, bol khai lah ală cau neh jăt Kơnràñ Jesu bơh Galilea làng duh-broă Khai; 56 tam bol khai geh Maria Magdala, Maria mè Jakobe mơ Joseph, mơ mè bol kòn klau Zebede dê.
Tơp bồc Kơnràñ Jesu
57 Mho tus, geh dùl nă cau pas-sơm bơh Arimathia, sơnđăn lah Joseph tus, khai krung lah cau jăt-dờn Kơnràñ Jesu dê. 58 Khai tus mơ Pilato, dăn bồc Kơnràñ Jesu. Tŭ hơ̆, Pilato sồr ai bồc khai in. 59 Neh ai bồc, Joseph pò mơ biài che dơmai goh, 60 ơn gơ tam bơtô bồc pa khai dê, neh khai phàt tam lŭ, mơ pơrlă pơnai lŭ dờng hơ mpồng bơtô, gen khai lòt. 61 Tềng hơ̆ geh Maria Magdala mơ Maria ndai nggui tamtoh mơ bơtô bồc.
Bol ling khiă bơtô bồc
* 62 Ngai tơnơ̆, hơ̆ lah tơnơ̆ mơ Ngai Rơcăng, bol ăt-bồ bol lơh-yàng dê mơ bol Phariseo lòt bal tus hơ Pilato 63 mơ đơs: ‘‘Ơ ồng, bol hi kah lah cau blăc-pơrlồm do tam tŭ găm kis neh đơs: ‘‘Pe ngai tơnơ̆, Añ rơp kis wơl.” 64 Gen tàng, dăn ồng sồr kơp-gàr bơtô bồc jơl tus dơ ngai pe, mbài bol jăt-dờn Khai dê tus kơñau bồc Khai, gen đơs mơ làng-bol: ‘‘Khai neh kis wơl bơh bol cau chơt”, mơ bơta blăc-pơrlồm lồi-tơnơ̆ rơp iơh rơlau mơ bơta lài.” 65 Pilato đơs mơ bol khai: ‘‘Bol mê geh cau ling khiă; lòt tĕ, kơp-gàr tĕ jăt be bol mê git.” 66 Bol khai lik-lòt, tăp băng-kì dơ pơnai lŭ, mơ sồr cau ling khiă kơp-gàr bơtô bồc.
