Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
VII. BƠTA JÊ-YĂN MƠ BƠTA KIS WƠL
Bơyai jòi kai kup Kơnràñ Jesu mơ gơsơt
26 1 Mơ gơlik gơs lah, tŭ Kơnràñ Jesu neh đơs jơh ală jơnau hơ̆ rau, gen Khai đơs mơ bol jăt-dờn Khai dê: 2 ‘‘Bol kòn git lah, găm bàr ngai tai tus leh Lòt Găn, mơ Kòn kòn-bơnus rơp kong jào, làng kong tơs dơ chikal.”
3 Tŭ hơ̆, bol ăt-bồ bol lơh-yàng dê mơ bol kuang kra làng-bol dê pơrjum bal tam hìu gơlăng cau ăt-bồ bol lơh-yàng dê, sơnđăn lah Kaipha, 4 mơ bơyai bal, làng jòi kai kup Kơnràñ Jesu mơ gơsơt; 5 mơya bol khai đơs: ‘‘Bañ lơh tam ngai leh, mbài gơlik bơta nggồr-nggàc tam làng-bol.”
Kơnràñ Jesu geh tuh bơñà tam Betania
6 Tŭ Kơnràñ Jesu ơm tam Bethania, tam hìu Simon, cau lut-dun, 7 gen geh dùl nă cau ùr ià dùl nơm gri lŭ màng ơn bơñà kas ngăn, tus hơ Kơnràñ mơ tuh hơđăng bồ Kơnràñ găm ơm sào. 8 Gŏ be hơ̆, bol jăt-dờn gơjrañ mơ đơs: ‘‘Ñchi kuơ lơh prih-prah be hơ̆ ? 9 Kơyoa bơñà do rơgơi tăc geh oă priă mơ pà bol rơbah in.” 10 Git be hơ̆, Kơnràñ Jesu đơs mơ bol khai: ‘‘Ñchi gơlơh bol kòn lơh kal-ke cau ùr do in taih ? Tài bơh khai neh lơh broă niăm Añ in; 11 kơyoa bol rơbah, bol kòn geh sùm bal mơ bol kòn, mơya Añ, bol kòn ờ geh sùm. * 12 Tài bơh tam tŭ cau ùr do tuh bơñà do hơđăng să Añ, gen khai neh lơh làng tơp Añ. 13 Di ngăn, Añ đơs mơ bol kòn: Tềng lơi tam jơh dunia, Jơnau Yal Niăm do rơp geh yal-bơto, gen bơta cau ùr do neh lơh, krung rơp geh yal wơl làng kah-kơlôi khai.”
Juda jào Kơnràñ Jesu
14 Tŭ hơ̆, dùl nă tam bol Jơt Bàr sơnđăn lah Juda Iskarioth, lòt tus hơ bol ăt-bồ bol lơh-yàng dê, 15 mơ đơs: ‘‘Ñchi bol ồng kờñ ai añ in, gen añ rơp jào Khai bol ồng in ?” Bol hơ̆ ai khai in pe jơt đong priă. 16 Mơ bơh tŭ hơ̆, khai jòi tŭ lơmpah làng jào Kơnràñ.
Rơcăng sa leh Lòt Găn
* 17 Ngai sơnrờp tam ală ngai sa bañ ờ kañ, bol jăt-dờn tus hơ Kơnràñ Jesu mơ đơs: ‘‘Ntềng đah Đi kờñ bol kòn rơcăng Đi in sa leh Lòt Găn taih ?” 18 Kơnràñ đơs: ‘‘Bol kòn lòt tĕ tam bòn dờng, tus mơ dùl nă cau ne, mơ đơs mơ khai: ‘‘Pôgru đơs: Tơngai Añ dê neh rềp; Añ kờñ lơh leh Lòt Găn bal mơ bol jăt-dờn Añ dê tam hìu mê.”‘‘ 19 Bol jăt-dờn neh lơh jăt be Kơnràñ Jesu neh sồr bol khai, mơ bol khai neh rơcăng leh Lòt Găn.
Kơnràñ Jesu yal lài Juda rơp jào Khai
20 Mho tus, Kơnràñ ơm dơ cơnờng sào bal mơ bol Jơt Bàr. 21 Tam tŭ bol khai găm sào, gen Kơnràñ đơs: ‘‘Di ngăn, Añ đơs mơ bol kòn: Dùl nă tam bol kòn rơp jào Añ.” 22 Bol khai moăt-jrùng ngăn, mơ kờp nă sơntờm đơs mơ Kơnràñ: ‘‘ Kòn ơ, ơ Kơnràñ ?” 23 Kơnràñ hơ mơ đơs: ‘‘Cau iŭ tê bal mơ Añ tam preng, cau hơ̆ rơp jào Añ. 24 Ngăn, Kòn kòn-bơnus lik-lòt, be neh geh cih gơrềng bơh Khai ; mơya dồn-sa cau hơ̆ in, bơh khai Kòn kòn-bơnus kong jào ! Niăm cau hơ̆ in, dilah neh ờ deh khai.” 25 Juda lah cau jào Kơnràñ krung hơ mơ đơs: ‘‘Kòn ơ, ơ Rabbi ?” Kơnràñ đơs mơ khai: ‘‘Kòn neh đơs hơ̆.”
Kơnràñ Jesu lơh gơs tềl-gơnrơh Să Mhàm niăm-goh
* 26 Tam tŭ Kơnràñ mơ bol jăt-dờn găm sào, Kơnràñ Jesu neh dờp bañ, yalniăm mơ pet gơ, pà bol jăt-dờn mơ đơs: ‘‘Bol kòn dờp mơ sa tĕ: do lah să Añ dê.” 27 Mơ Khai dờp coàn, ưn-ngài, pà bol jăt-dờn in mơ đơs: ‘‘Jơh ală bol kòn hùc tĕ coàn do: * 28 kơyoa do lah mhàm Añ dê, mhàm bơta tam bơrkuăt pa, kong tuh bơh rà cau in làng tơnroh ală jơnau tìs. * 29 Mơya Añ đơs mơ bol kòn: Añ rơp ờ hùc tai bơh tŭ do dà ño do jơl tus ngai hơ̆, tŭ Añ rơp hùc bal mơ bol kòn dà ño pa tam lơgar Bàp Añ dê.”
Kơnràñ Jesu yal lài Petro rơp pơndăng-săng Khai
30 Mơ neh đơs-chờ rau, Kơnràñ mơ bol jăt-dờn lik-lòt tam bơnơm Olive. * 31 Tŭ hơ̆, Kơnràñ Jesu đơs mơ bol jăt-dờn: ‘‘Jơh ală bol kòn rơp gơtup tìs tài bơh Añ tam măng do. Bơh neh geh cih: ‘‘Añ rơp pù-lơh cau ê, mơ mpồl belàt rơp gơprah-gơpring.” 32 Mơya tơnơ̆ mơ tŭ Añ neh kis wơl, Añ rơp lòt lài mơ bol kòn tus tam Galilea.” 33 Petro hơ mơ đơs mơ Kơnràñ: ‘‘Bulah jơh tơl nă rơp gơtup tìs tài bơh Kơnràñ, gen kòn, ờ tŭ lơi kòn rơp gơtup tìs.” 34 Kơnràñ Jesu đơs mơ khai: ‘‘Di ngăn, Añ đơs mơ kòn: Tam măng do, lài mơ tŭ iar nrau, kòn rơp pơndăng-săng Añ pe dơ̆.” 35 Petro đơs mơ Kơnràñ: ‘‘Bulah kòn rơp pal chơt bal mơ Đi, gen kòn krung rơp ờ pơndăng-săng Đi.” Jơh tơl nă cau jăt-dờn krung đơs ndrờm be hơ̆ sơl.
Kơnràñ Jesu răc dăn tam bă tiah Gethsemani
36 Tŭ hơ̆, Kơnràñ Jesu lòt bal mơ bol jăt-dờn tus tam dùl bă tiah sơnđăn lah Gethsemani. Mơ Kơnràñ đơs mơ bol khai: ‘‘Bol kòn nggui tĕ ndo, tam tŭ Añ lòt hơ ne răc dăn.” 37 Kơnràñ lăm Petro mơ bàr nă kòn Zebede dê lòt bal, mơ Kơnràñ sơntờm moăt-jrùng mơ kơlôi-kơnòl. 38 Tŭ hơ̆, Kơnràñ đơs mơ bol khai: ‘‘Sồp-soàn Añ moăt-jrùng jơl tus chơt; bol kòn ơm tĕ ndo mơ drơng tĕ bal mơ Añ.” * 39 Lòt hơđăp dŭt, Kơnràñ blup măt răc dăn mơ đơs: ‘‘Ơ Bàp kòn dê, dilah rơgơi, dăn ai coàn do gơgăn bơh kòn; mơya ờ jăt be kòn kờñ, jăt be Bàp kờñ lơm.” 40 Kơnràñ lòt tus mơ bol jăt-dờn mơ gŏ bol khai găm bic, gen đơs mơ Petro: ‘‘Be hơ̆, bol kòn ờ rơgơi drơng bal mơ Añ dùl jiờ ơ ?” 41 Drơng tĕ mơ răc dăn tĕ, làng bol kòn ờ mut tam bơta tơlòng; nùs-nhơm ñhăp-ñhar ngăn, mơya poăc-să lơbơn-lơñơ. 42 Kơnràñ lòt tai dơ̆ bàr, răc dăn mơ đơs: ‘‘Ơ Bàp kòn dê, dilah coàn do ờ rơgơi pleh, mơ kòn pal hùc, gen dăn nùs-kờñ Bàp dê gơlik gơs.” 43 Kơnràñ tus tai mơ gŏ bol khai găm bic: bơh măt bol khai gơjồt. 44 Mơ lời bol khai, Kơnràñ lòt tai mơ răc dăn dơ̆ pe, đơs tai krung dùl jơnau hơ̆. 45 Tŭ hơ̆, Kơnràñ tus mơ bol jăt-dờn, mơ đơs mơ bol khai: ‘‘Tŭ do, bic tĕ, rơlô tĕ; do jiờ neh tus rềp rau, mơ Kòn kòn-bơnus kong jào tam tê bol cau tìs. 46 Guh tĕ, bol he lòt ih; do cau jào Añ neh tus rềp rau.”
Kơnràñ Jesu kong kup
47 Tam tŭ Kơnràñ găm đơs, gen do Juda, dùl nă tam bol Jơt Bàr tus, mơ bal mơ khai geh mpồl gal cau ăt đào mơ gai bơh bol ăt-bồ bol lơh-yàng dê mơ bol kuang kra làng-bol dê pơyoa tus. 48 Cau jào Kơnràñ neh ai tềl bol khai in mơ đơs: ‘‘Cau lơi añ cum, hơ̆ lah Khai; bol mê kup tĕ Khai !” 49 Tŭ hơ̆ mơ, khai tus mơ Kơnràñ Jesu mơ đơs: ‘‘Niăm-să Rabbi !” mơ khai cum Kơnràñ. 50 Kơnràñ Jesu đơs mơ khai: ‘‘Ơ kơnau, mê tus làng lơh chi lơi, gen lơh tĕ !” Tŭ hơ̆, bol khai tus, ai tê sơmbăt kup Kơnràñ Jesu. 51 Mơ do, dùl nă tam ală cau ơm bal mơ Kơnràñ Jesu, ai tê tă đào khai dê sreh cau duh-broă cau ăt-bồ bol lơh-yàng dê, mơ lơh tăc tồr cau hơ̆.
52 Tŭ hơ̆, Kơnràñ Jesu đơs mơ khai: ‘‘Srồm tĕ đào kòn tam sơmprồm gơ. Bơh jơh ală cau lơi ăt đào, gen rơp chơt bơh đào. 53 Ngŏlah kòn kơlôi lah Añ ờ rơgơi dăn mơ Bàp Añ, sồr tus Añ in rơlau mơ jơt bàr mpồl huềng-duh ơ ? 54 Be hơ̆, mbe gơlik gơs di ngăn ală jơnau tam Sră Goh lah pal gơlik gơs be gen ?” 55 Tam jiờ hơ̆, Kơnràñ Jesu đơs mơ ală mpồl làng-bol: ‘‘Bol mê ăt đào mơ gai lòt kup Añ be kup cau thừ-blơ̆ ơ ? Pah ngai Añ nggui bơto tam hìu duh-khoai mơ bol mê neh ờ kup Añ.” 56 Mơya jơh bơta do neh gơlik gơs, làng ală jơnau cih bol ala-bơr dê gơlik gơs di ngăn. Tŭ hơ̆, jơh ală cau jăt-dờn săng-lời Kơnràñ mơ dô.
Kơnràñ Jesu lik dơđăp mpồl tơrña
57 Bol khai kup Kơnràñ Jesu, cèng tus hơ Kaipha lah cau ăt-bồ bol lơh-yàng dê, tềng hơ̆ bol gơnoar-cih mơ bol kuang kra neh pơrjum bal. 58 Petro lòt jăt Kơnràñ ngài ngài, tus tam hìu gơlăng cau ăt-bồ bol lơh-yàng dê; mơ mut tam dơlăm nggui bal mơ bol dong-broă, làng sền bơta dut-ndơl mbe lơi.
59 Bol ăt-bồ bol lơh-yàng dê mơ jơh mpồl-pơrjum jòi cơng blăc tamdră mơ Kơnràñ Jesu, làng gơsơt Khai, 60 mơ neh ờ gŏ, bulah geh gal cau cơng blăc tus. Dut-ndơl geh bàr nă cau tus 61 mơ đơs: ‘‘Cau do neh đơs: Añ rơgơi lơh tơrlah hìu duh-khoai Yàng, mơ pe ngai tơnơ̆ bơtào wơl gơ.” 62 Mơ cau ăt-bồ bol lơh-yàng dê ñă-ntào mơ đơs: ‘‘Mê ờ hơ wơl chi lơi ơ ? Ñchi bol hơ̆ lơh cơng tamdră mơ mê taih ?” 63 Mơya Kơnràñ Jesu ơm momŏ. Mơ cau ăt-bồ bol lơh-yàng dê đơs mơ Khai: ‘‘Bơh Yàng kis sùm, añ sồr mê pal đơs mơ bol hi, mê lah Kristo, Kòn Yàng dê ờ ?” * 64 Kơnràñ Jesu đơs mơ khai: ‘‘Ồng neh đơs hơ̆. Rơlau tai, Añ đơs mơ bol mê: Bơh ndo, bol mê rơp gŏ Kòn kòn-bơnus nggui đah ma Pràn-gơnoar dê mơ tus tam mhoal trồ.”
65 Tŭ hơ̆, cau ăt-bồ bol lơh-yàng dê crè ào tờm mơ đơs: ‘‘Khai neh đơs tràl-sơrbil ! Ñchi bol he kờñ tai bol cau cơng ? Hơ̆, tŭ do, bol mê neh kơno jơnau tràl-sơrbil. 66 Mbe bol mê kơlôi taih ?” Bol khai hơ wơl mơ đơs : ‘‘Khai pal chơt !” 67 Tŭ hơ̆, bol khai choh dơ măt Kơnràñ, mơ tap-lơh Kơnràñ; bol bà pah dơ măt Kơnràñ. 68 mơ đơs: ‘‘Ơ Kristo, mê hồr tĕ bol hi in, ñcau neh tap-lơh mê taih ?”
Petro pơndăng-săng Kơnràñ Jesu
69 Ai Petro nggui bơdìh tam blàng; mơ dùl nă cau ùr duh-broă tus hơ khai mơ đơs: ‘‘ Mê krung ơm bal mơ Jesu, cau Galilea !” 70 Mơya Petro neh pơndăng-săng dơđăp jơh ală cau mơ đơs: ‘‘Añ ờ git ñchi ai đơs !” 71 Tŭ Petro lòt hơ mpồng, gen dùl nă cau ùr duh-broă ndai gŏ khai mơ đơs mơ ală cau tềng hơ̆: ‘‘Cau do krung neh ơm bal mơ Jesu cau Nazareth !” 72 Petro neh pơndăng-săng tai mơ sơntơm: ‘‘Añ ờ git cau hơ̆ !” 73 Dùl thoa tơnơ̆, ală cau ntào tềng hơ̆ tus đơs mơ Petro: ‘‘Ngăn, mê krung ơm tam bol hơ̆, bơh săp đơs mê dê ràng-tơlik mê.” 74 Tŭ hơ̆, Petro sơntờm srat-rơma mơ sơntơm: ‘‘Añ ờ git cau hơ̆ !” Tŭ hơ̆ mơ, iar nrau; 75 Petro kah wơl jơnau Kơnràñ Jesu neh đơs: ‘‘Lài mơ tŭ iar nrau, kòn neh pơndăng-săng Añ pe dơ̆.” Khai lik bơdìh ñìm-răc ñìm-ròc.
