Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau pơniơu jơt nă cau ùr tơmo
25 * 1 Tŭ hơ̆, lơgar trồ rơp ndrờm be jơt nă cau ùr tơmo ăt đèng bol khai dê, lik-lòt rò cau bơrtơu. 2 Tam bol khai, geh prăm nă brơngơl mơ prăm nă jăk-chài. 3 Bol cau brơngơl ăt đèng bol khai dê, mơ ờ cèng jiờu bal; 4 ai bol cau jăk-chài cèng jiờu tam gri bal mơ đèng bol khai dê. 5 Bơh cau bơrtơu ờ băt tus, gen ală bol khai gơdăn bic mơ bic jơh. 6 Nggùl măng, geh săp hòi: ‘‘Ne, cau bơrtơu ! Lik-lòt tĕ rò khai.” 7 Tŭ hơ̆, jơh ală cau ùr tơmo hơ̆ guh bic mơ rơcăng đèng bol khai dê. 8 Bol cau brơngơl đơs mơ bol cau jăk-chài: ‘‘Dăn bol ai pà bol hi in jiờu bol ai dê, bơh đèng bol hi neh chơt.” 9 Bol cau jăk-chài hơ wơl mơ đơs: ‘‘Ngòt ờ tơl bol añ in mơ bol ai in, niăm rơlau, bol ai lòt tĕ hơ bol cau tăc mơ blơi tĕ bol ai in.” 10 Mơya tam tŭ bol khai lòt blơi, gen cau bơrtơu tus, mơ bol cau neh rơcăng, gen mut bal mơ khai làng ñô-bao; mơ mpồng til wơl. 11 Dut-ndơl, bol cau ùr tơmo ne krung tus mơ đơs: ‘‘Ơ ồng, ơ ồng, dăn pờ bol hi in.” 12 Mơya khai hơ wơl mơ đơs: ‘‘Di ngăn, añ đơs mơ bol ai: Añ ờ git bol ai.” 13 Be hơ̆, bol kòn drơng-kơp tĕ, bơh bol kòn ờ git ngai lơi, jiờ lơi.
Jơniơu ală talen priă
* 14 Kơyoa be geh dùl nă cau ne rơp lik-lòt tiah ngài, gen neh hòi bol duh-broă khai dê mơ jào bol khai in ală phan-bơna khai dê. 15 Mơ khai neh jào cau do in prăm talen priă, cau ne in bàr talen priă, cau ndai in dùl talen priă, kờp nă cau in jăt be bơta chài-rơgơi is, gen lik-lòt. Tŭ hơ̆ mơ, 16 cau neh dờp prăm talen priă lòt lơh broă mơ ală talen priă hơ̆, mơ lơh gơlik cồng prăm talen priă ndai; 17 krung ndrờm be hơ̆ sơl, cau neh dờp bàr talen priă lơh gơlik cồng bàr talen priă ndai. 18 Mơya cau neh dờp dùl talen priă lòt tờ trồm tam ù mơ pồn priă cau tờm khai dê. 19 Jŏ-jòng tơnơ̆, cau tờm bol duh-broă hơ̆ dê rê wơl mơ lùp khà mơ bol khai. 20 Cau neh dờp prăm talen priă tus, cèng prăm talen priă ndai mơ đơs: ‘‘Ơ ồng, ồng neh jào añ in prăm talen priă; do añ neh lơh gơlik cồng prăm talen priă ndai.” 21 Cau tờm khai dê đơs mơ khai: ‘‘Niăm ngăn, ơ cau duh-broă niăm mơ kơ̆-mềr. Tam dŭt mơ mê neh kơ̆-mềr; añ rơp pồ-ơn mê hơđăng oă rà: mut tĕ tam bơta chờhờp cau tờm mê dê.” 22 Cau neh dờp bàr talen priă krung tus mơ đơs: ‘‘Ơ ồng, ồng neh jào añ in bàr talen priă; do añ neh lơh gơlik cồng bàr talen priă ndai.” 23 Cau tờm khai dê đơs mơ khai: ‘‘Niăm ngăn, ơ cau duh-broă niăm mơ kơ̆-mềr. Tam dŭt mơ mê neh kơ̆-mềr; añ rơp pồ-ơn mê hơđăng oă rà: mut tĕ tam bơta chờhờp cau tờm mê dê.” 24 Cau neh dờp dùl talen priă krung tus mơ đơs: ‘‘Ơ ồng, añ neh git ồng lah cau kràñ-cê: ồng tơwès tam tiah ồng ờ sih, mơ tơrgùm tam tiah ồng ờ rơsìh; 25 gen añ ngòt mơ neh lòt pồn talen priă ồng dê tam ù. Do, dăn ồng dờp wơl phan ồng dê.” 26 Hơ wơl, cau tờm khai dê đơs mơ khai: ‘‘Ơ cau duh-broă iơh-bơsăk mơ alah ! Mê neh git añ tơwès tam tiah añ ờ sih, tơrgùm tam tiah añ ờ rơsìh ơ ? 27 Be hơ̆, mê pal pơyoa priă añ dê bol kă priă in, mơ tŭ rê, añ rơp dờp phan añ dê bal mơ cồng gơ. 28 Gen tàng, bol mê tă tĕ talen priă bơh dơ khai, mơ ai cau geh jơt talen priă in: 29 kơyoa cau lơi geh, gen rơp ai tai khai in, mơ khai rơp geh jơngkah-jơngkañ; mơya cau lơi ờ geh, gen phan khai geh, krung rơp tă-tơlik bơh dơ khai. 30 Mơ cau duh-broă ờ kuơ, bol mê sơrbì tĕ tam tiah klăm-jơngo bơdìh: tềng hơ̆ rơp geh bơta ñìm-răc mơ rơkiăt sề.”
Bơta cah-rơña bal
* 31 Tam tŭ Kòn kòn-bơnus tus tam bơta gơklŏ Khai dê, mơ jơh ală huềng-duh bal mơ Khai, tŭ hơ̆ Khai rơp nggui hơđăng sơbàn gơklŏ Khai dê. 32 Mơ jơh ală làng-bol rơp pơrjum bal dơđăp Khai; mơ Khai rơp cah is bơh tam bol khai, be cau ê cah is ală belàt bơh ală be, 33 mơ rơp ơn ală belàt đah ma mơ ală be đah kiau. 34 Tŭ hơ̆, Bơtau rơp đơs mơ ală cau ơm đah ma Khai: ‘‘Tus tĕ, ơ ală cau geh Bàp Añ yalniăm; dờp tĕ lơgar neh rơcăng bol mê in bơh tŭ crơng-gơs dunia. 35 Kơyoa Añ jơgloh, bol mê neh ai Añ in sa; Añ tơhìr, bol mê neh ai Añ in hùc; Añ lah cau năc, bol mê neh wă-rò Añ; 36 Añ ơm kuh, bol mê neh tơnsoh Añ in; Añ kòp-jê, bol mê neh còp Añ; Añ ơm tam hìu jàm, bol mê neh tus mơ Añ.” 37 Tŭ hơ̆, ală cau song-dơpă rơp hơ mơ đơs: ‘‘ Ơ Kơnràñ, tŭ lơi bol hi neh gŏ Đi jơgloh mơ neh ai Đi in sa, ngŏlah tơhìr mơ neh ai Đi in hùc ? 38 Tŭ lơi bol hi neh gŏ Kơnràñ lah cau năc mơ neh wă-rò, ngŏlah ơm kuh mơ neh tơnsoh ? 39 Tŭ lơi bol hi neh gŏ Kơnràñ kòp-jê ngŏlah ơm tam hìu jàm mơ neh tus mơ Kơnràñ ?” 40 Mơ hơ wơl, Bơtau rơp đơs mơ bol khai: ‘‘Di ngăn, Añ đơs mơ bol mê: Tam tŭ bol mê neh lơh dùl nă cau in tam ală oh mi dêt-rơhền rơlau jơh Añ dê do, gen bol mê neh lơh Añ in.” 41 Tŭ hơ̆, Bơtau krung rơp đơs mơ ală cau ơm đah kiau : ‘‘Ơ ală cau kong yal-iơh, lik tĕ bơh dơ Añ mơ mut tam ồs găm sùm neh rơcăng cà in mơ ală huềng-duh gơ dê in. 42 Kơyoa Añ jơgloh, bol mê neh ờ ai Añ in sa; Añ tơhìr, bol mê neh ờ ai Añ in hùc; 43 Añ lah cau năc, bol mê neh ờ wă-rò Añ; Añ ơm kuh, bol mê neh ờ tơnsoh Añ in; Añ kòp-jê mơ ơm tam hìu jàm, bol mê neh ờ còp Añ.” 44 Tŭ hơ̆, bol khai krung rơp hơ mơ đơs: ‘‘Ơ Kơnràñ, tŭ lơi bol hi neh gŏ Đi jơgloh, ngŏlah tơhìr, ngŏlah cau năc, ngŏlah ơm kuh, ngŏlah kòp-jê, ngŏlah ơm tam hìu jàm, mơ bol hi neh ờ duh-broă Đi in ơ ?” 45 Tŭ hơ̆, Kơnràñ rơp hơ mơ đơs mơ bol khai: ‘‘Di ngăn, Añ đơs mơ bol mê: Tam tŭ bol mê neh ờ lơh dùl nă cau in tam ală cau dêt-rơhền rơlau jơh do, gen bol mê neh ờ lơh Añ in.” 46 Mơ bol do rơp lòt tam bơta glài sùm, ai ală cau song-dơpă rơp mut tam bơta kis sùm.”
