Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
2. Jơnau bơto gơrềng bơh bơta lồi-dut
Jơnau lăm-mut
24 * 1 Tam tŭ Kơnràñ Jesu lik bơh hìu duh-khoai, gen bol jăt-dờn Kơnràñ dê tus làng sơnđio Khai in ală gùng băc-bơtào hìu duh-khoai dê; 2 Mơya Kơnràñ hơ mơ đơs mơ bol khai: ‘‘Bol kòn gŏ jơh ală bơta hơ̆ sơl ? Di ngăn, Añ đơs mơ bol kòn: Rơp ờ geh lời wơl tềng do pơnai lŭ lơi hơđăng pơnai lŭ lơi, mơ gơ ờ kong lơh tơrlah.” * 3 Tam tŭ nggui hơđăng bơnơm Olive, gen bol jăt-dờn tus is mơ Kơnràñ mơ đơs: ‘‘Dăn Đi đơs bol kòn in: Tŭ lơi rơp gơs ală bơta hơ̆ mơ tềl lơi sơnđio bơta tus wơl Đi dê mơ ngai lồi-dut dunia taih ?”
Ală bơta jê-yăn sơntờm
4 Hơ wơl, Kơnràñ Jesu đơs mơ bol khai: ‘‘Sền ngăc tĕ, bañ lời cau lơi pơrlồm bol kòn. 5 Kơyoa gal cau rơp ai sơnđăn Añ tus mơ đơs: ‘‘Añ lah Kristo”, mơ bol khai rơp pơrlồm gal cau. 6 Kơyoa bol kòn rơp kơno geh ală bơta tamlơh mơ ală jơnau pơnrơ tamlơh. Sền ngăc tĕ, bañ bìr-ngòt; bơh pal gơlik gơs be hơ̆, mơya ờ hềt lah dut-lồi. 7 Kơyoa làng-bol do rơp ñă-ntào tamdră mơ làng-bol ne, lơgar do tamdră mơ lơgar ne, mơ rơp geh ală bơta jơgloh-rung mơ ală bơta mprơm ù tam oă tiah; 8 mơya jơh ală bơta hơ̆ lah sơntờm ală bơta jê-yăn lơm. 9 Tŭ hơ̆, bol khai rơp jào bol kòn tam bơta kòl-yăn kal-ke, mơ rơp gơsơt bol kòn, mơ bol kòn rơp kong jơh ală làng-bol ềng-gơjrañ tài bơh sơnđăn Añ. 10 Mơ tŭ hơ̆ geh gal cau rơp kong gơtup tìs, mơ bol khai rơp tam jào bal mơ rơp tam ềng-gơjrañ bal; 11 mơ geh gal cau ala-bơr blăc rơp ñă-ntào, mơ bol khai rơp pơrlồm gal cau. 12 Mơ tài bơh bơta iơh-bơsăk neh gơguh bềng, tàng bơta gơboh gal cau dê rơp gơs bơsàp; 13 mơya cau lơi ơm kơ̆ sùm tus lồi, gen cau hơ̆ rơp geh tơngklàs. * 14 Mơ Jơnau Yal Niăm lơgar dê do rơp geh yal-bơto làm ù-tiah, gơs cơng jơh ală làng-bol in; mơ tŭ hơ̆ rơp tus bơta lồi-dut.
Bơta kòl-yăn kal-ke dờng tam Jerusalem
* 15 Be hơ̆, tŭ bol kòn gŏ bơta bơ̆-bơl ngkòr-ngkàc bơta tơrlah-tơrling dê ơm tam anih niăm-goh, mơ Daniel cau ala-bơr neh đơs, – cau lơi đal, gen wă tĕ ! – 16 tŭ hơ̆, bol cau lơi ơm tam Judea, dô tĕ hơ bơnơm; 17 cau lơi ơm hơđăng rơkàng hìu, bañ mù ai chi lơi bơh hìu he; 18 mơ cau lơi ơm tam sre, bañ wơlke ai ào war he. 19 Dồn-sa bol cau ùr găm bun in mơ bol cau ùr găm tơmpô kòn in tam ală ngai hơ̆ !
20 Răc dăn tĕ, làng bơta dô bol kòn dê ờ gơtìp tam kàl noăt-mrềt ngŏlah tam ngai sabbat:
* 21 kơyoa tŭ hơ̆ rơp geh bơta kòl-yăn kal-ke dờng, tiăn tus bơh but ù jơl tus tŭ do neh ờ geh, mơ krung rơp ờ geh be hơ̆ tai. * 22 Mơ dilah ală ngai hơ̆ ờ geh tơnliah, gen ờ geh nă lơi geh tơngklàs; mơya tài bơh bol cau geh rơwah, gen ală ngai hơ̆ rơp geh tơnliah. 23 Tŭ hơ̆, dilah geh cau lơi đơs mơ bol kòn: ‘‘Do, Kơnràñ Kristo ơm tềng do”, ngŏlah: ‘‘Tềng ne”, gen bol kòn bañ pindờn. 24 Kơyoa rơp geh bol Kristo blăc mơ bol ala-bơr blăc ñă-ntào mơ lơh ală tềl dờng mơ ală broă krơi, tiăn tus dilah rơgơi, bol khai krung lăm bol cau geh rơwah mut tam bơta tìs. 25 Do, Añ neh đơs lài bol kòn in.
Bơta tus wơl Kòn kòn-bơnus dê
26 Be hơ̆, dilah bol khai đơs mơ bol kòn: ‘‘Do, Khai ơm tam blàng bràs”, gen bol kòn bañ lik-lòt; ‘‘Do, Khai ơm tam anih ndơp”, gen bol kòn bañ pindờn; 27 kơyoa be puh-lèp lik bơh đah măt tơngai lik mơ gơcrà tus đah măt tơngai mut, gen bơta tus wơl Kòn kòn-bơnus dê krung rơp be hơ̆ sơl. 28 Tềng lơi geh să chơt, gen tềng hơ̆ geh ală gơrơt ñồm.
Ală bơta gơlik gơs ngai tus wơl dê
* 29 Tơnơ̆ mơ bơta kòl-yăn kal-ke ală ngai hơ̆ dê, gen tŭ hơ̆ mơ, măt tơngai rơp gơs jơngo, àng-kơnhai rơp ờ ai bơta àng tai, ală sơrmañ rơp dùh bơh trồ, mơ ală pràn-gơnoar ală kơloàng trồ dê rơp kong gơ mprơm. 30 Tŭ hơ̆, rơp gŏ tềl Kòn kòn-bơnus dê tam trồ, mơ tŭ hơ̆, jơh ală jơi-bơtiàn tam ù-tiah rơp tur ntơh mơ rơp gŏ Kòn kòn-bơnus tus tam mhoal trồ bal mơ pràn-gơnoar mơ bơta gơklŏ dờng; 31 mơ Khai rơp pơyoa bol huềng-duh Khai dê uh kơluờk, mơ tơrgùm ală cau geh rơwah Khai dê bơh poan mum ù, bơh jơng trồ do tus jơng trồ ne.
Jơnau pơniơu tờm chi bal
32 Bol kòn bơsrăm tĕ jơnau pơniơu gơrềng bơh tờm chi bal: tŭ ntê gơ dê bơnung mơ nha gơcăt, gen bol kòn git lah kàl duh neh rềp rau. 33 Ai bol kòn krung be hơ̆ sơl, tŭ gŏ jơh ală bơta hơ̆, gen bol kòn git tĕ lah Kòn kòn-bơnus neh rềp rau, dơ mpồng. 34 Di ngăn, Añ đơs mơ bol kòn: Rơnàng do rơp ờ gơgăn, jơl tus tŭ jơh ală bơta hơ̆ gơlik gơs. 35 Trồ mơ tiah rơp gơgăn, mơya ală jơnau đơs Añ dê rơp ờ gơgăn.
Pal drơng-kơp mơ răk-rơcăng
* 36 Gơrềng bơh ngai mơ jiờ hơ̆, gen ờ geh cau lơi git, bol huềng-duh tam trồ krung ờ, Kòn krung ờ sơl, mìng Bàp lơm git. 37 Kơyoa be ală ngai Noe dê, gen bơta tus wơl Kòn kòn-bơnus dê krung rơp be hơ̆ sơl. 38 Kơyoa be tam ală ngai lài mơ dà kŏ, cau găm ñô-sa, lăp klau tambao ùr, tus dơ ngai Noe mut tam ahò, 39 cau krung ờ git, jơl tus dơ tŭ dà kŏ tus pơrdô jơh tơl nă, gen bơta tus wơl Kòn kòn-bơnus dê krung rơp be hơ̆ sơl. 40 Tŭ hơ̆, rơp geh bàr nă cau klau ơm tam sre: dùl nă geh cèng lòt, mơ dùl nă kong lời wơl; 41 bàr nă cau ùr găm piah dơ mpal: dùl nă geh cèng lòt mơ dùl nă kong lời wơl.
42 Gen tàng, bol kòn drơng-kơp tĕ, bơh bol kòn ờ git ngai lơi Kơnràñ bol kòn rơp tus. 43 Bol kòn git tĕ jơnau do: dilah cau tờm hìu git jiờ lơi cau blơ̆ rơp tus, gen khai rơp drơng-kơp mơ ờ lời cau hơ̆ tờ bluh hìu khai. 44 Gen tàng, bol kòn krung răk-rơcăng tĕ, tài bơh jiờ lơi bol kòn ờ git, gen Kòn kòn-bơnus rơp tus.
Jơnau pơniơu cau duh-broă kơ̆-mềr
* 45 Ñcau lah cau duh-broă kơ̆-mềr mơ ngăc-ngar, mơ cau tờm hìu neh pồ-ơn hơđăng bol duh-broă tam hìu khai, làng pà phan sa bol hơ̆ in di jiờ taih ? 46 Bơtoah cau duh-broă hơ̆, tŭ cau tờm khai tus, bàn khai găm lơh be hơ̆. 47 Di ngăn, Añ đơs mơ bol kòn lah, cau tờm rơp pồ-bơtào cau duh-broă hơ̆ hơđăng jơh ală phan-bơna khai dê. 48 Mơya dilah cau duh-broă iơh hơ̆ đơs tam nùs khai: ‘‘Cau tờm añ ờ băt tus”, 49 mơ khai sơntờm pù-lơh bol duh-broă bal mơ khai, ñô-sa bal mơ bol bơñul-lơmbè, 50 cau tờm cau duh-broă hơ̆ rơp tus tam ngai khai ờ kơp, tam jiờ khai ờ git, 51 mơ cau tờm rơp cah khai, ơn bơnah khai dê bal mơ bol blăc-să; tềng hơ̆ rơp geh bơta ñìm-răc mơ rơkiăt sề.
