Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bol gơnoar-cih mơ bol Phariseo blăc-să
23 1 Tŭ hơ̆, Kơnràñ Jesu đơs mơ ală mpồl làng-bol mơ bol jăt-dờn Khai dê: 2 ‘‘Bol gơnoar-cih mơ bol Phariseo nggui hơđăng cơnờng Moise dê. 3 Be hơ̆, jơh ală bơta bol khai đơs mơ bol mê, gen bol mê lơh tĕ mơ prăp tĕ; mơya bañ lơh jăt be ală broă bol khai dê: bơh bol khai đơs mơ ờ lơh. 4 Bol khai căp ală tơrnui kơnjơ̆ ờ jai tui mơ ơn hơđăng pơnì cau, mơya să tờm bol khai ờ bài tơrđeh gơ mơ nau tê. * 5 Jơh ală broă bol khai dê, bol khai lơh làng cau in gŏ: bơh bol khai lơh anàng kơldung-gơltau mơ lơh jòng tiăng ào, 6 bol khai gơboh anih hơđăp tam ală bơta ñô-sa, ală cơnờng hơđăp tam ală hìu-pơrjum, * 7 ală jơnau đơs niăm-să tam gùng-dà, mơ kờñ cau hòi lah Rabbi. 8 Ai bol mê bañ ai cau hòi lah Rabbi; bơh bol mê mìng geh dùl Pôgru lơm, ai jơh ală bol mê lah ală oh mi. * 9 Bol mê bañ hòi cau lơi tam tiah lah Bàp bol mê, bơh bol mê mìng geh dùl Bàp lơm, lah Bơtau tam trồ. 10 Bol mê krung bañ ai cau hòi lah bol Pôgru, bơh bol mê mìng geh dùl Pôgru lơm, lah Kơnràñ Kristo. 11 Cau lơi dờng rơlau tam bol mê, gen rơp gơs cau duh-broă bol mê dê. 12 Cau lơi tơngguh să tờm, gen rơp kong tơmù; mơ cau lơi tơmù să tờm, gen rơp geh tơngguh.
Kơnràñ Jesu lah-pơrhơng bol gơnoar-cih mơ bol Phariseo
13 Dồn-sa bol mê in, ơ bol gơnoar-cih mơ bol Phariseo blăc-să, bơh bol mê til lơgar trồ dơđăp kòn-bơnus ! Kơyoa bol mê ờ mut, mơ bol cau kờñ mut, bol mê krung ờ lời mut !
15 Dồn-sa bol mê in, ơ bol gơnoar-cih mơ bol Phariseo blăc-să, bơh bol mê lòt làm dà-lềng mơ làm ù, làng lơh dùl nă cau mut tam gùng Yàng, mơ tŭ khai neh mut rau, gen bol mê lơh khai in gơs kòn brah-tìng dê bàr dơ̆ rơlau mơ bol mê.
16 Dồn-sa bol mê in, ơ bol lăm gùng jơngo, bol mê đơs: ‘‘Cau lơi ai hìu-duh-khoai mơ sơntơm, gen ờ gơs chi lơi; mơya cau lơi ai màh-biàng hìu duh-khoai dê mơ sơntơm, gen khai gơkòl.” 17 Ơ bol brơngơl-gơla mơ jơngo ! Bơta lơi lah dờng rơlau taih: màh-biàng ngŏlah hìu duh-khoai pơniăm-goh màh-biàng ? 18 Mơ bol mê đơs: ‘‘Cau lơi ai jơnào mơ sơntơm, gen ờ gơs chi lơi; mơya cau lơi ai phan pơdơng dơ jơnào mơ sơntơm, gen gơkòl.” 19 Ơ bol jơngo ! Bơta lơi lah dờng rơlau taih: phan pơdơng ngŏlah jơnào pơniăm-goh phan pơdơng ? 20 Be hơ̆, cau lơi ai jơnào mơ sơntơm, gen lah ai jơnào mơ jơh ală bơta hơđăng jơnào mơ sơntơm; 21 cau lơi ai hìu duh-khoai mơ sơntơm, gen lah ai hìu duh-khoai mơ Bơtau ơm tam hìu duh-khoai mơ sơntơm; 22 cau lơi ai trồ mơ sơntơm, gen lah ai sơbàn Yàng dê mơ Bơtau nggui hơđăng sơbàn mơ sơntơm.
23 Dồn-sa bol mê in, ơ bol gơnoar-cih mơ bol Phariseo blăc-să, bơh bol mê ơn dùl bơnah jơt biăp bô, biăp krồng, biăp iăm-hum, mơ bol mê neh săng-lời ală bơta dờng-màng rơlau gùng boh-lăm dê: lah bơta song-ring, bơta nđàc-sơngit mơ bơta pindờn ! Pal lơh ală bơta do mơ bañ săng-lời ală bơta ne. 24 Ơ bol lăm gùng jơngo, bol mê kơnềng sơmồc mơya loan ừt làk-đà.
25 Dồn-sa bol mê in, ơ bol gơnoar-cih mơ bol Phariseo blăc-să, bơh bol mê rào goh đah bơdìh coàn mơ preng, mơya tam dơlăm bềng bơta thừ-blơ̆ mơ bơta bơ̆-bơl ! 26 Ơ cau Phariseo jơngo, lài jơh rào goh tĕ tam dơlăm coàn, làng đah bơdìh gơ dê krung gơs goh sơl.
27 Dồn-sa bol mê in, ơ bol gơnoar-cih mơ bol Phariseo blăc-să, bơh bol mê ndrờm be ală bơtô bồc pih cùr bò, đah bơdìh gŏ hàng-bơnĕ, mơya tam dơlăm bềng ală ntìng bol cau chơt mơ jơh ală bơta ồm-bơ̆ ! 28 Krung be hơ̆ sơl, bol mê đah bơdìh gŏ song-dơpă dơđăp măt cau, mơya tam dơlăm bềng bơta blăc-să mơ bơta iơh-bơsăk.
29 Dồn-sa bol mê in, ơ bol gơnoar-cih mơ bol Phariseo blăc-să, bơh bol mê băc ală bơtô bồc bol ala-bơr dê, bơka ală bơtô bồc bol song-dơpă dê, 30 mơ bol mê đơs: ‘‘Dilah bol he ơm tam ală ngai bol ồng-pàng bol he dê, gen bol he ờ geh bal mơ bol khai tam mhàm bol ala-bơr dê !” 31 Be hơ̆, bol mê lơh cơng să tờm bol mê in lah, bol mê lah kòn bol cau neh gơsơt bol ala-bơr. 32 Gen bol mê tơmbềng tĕ kơrnăc bol ồng-pàng bol mê dê.
Tìs iơh mơ bơta glài
33 Ơ ală bơs, ơ nòi bơs rai, mbe bol mê pleh klàs bơh bơta yal-glài brah-tìng taih ? * 34 Be hơ̆ tàng, do Añ pơyoa bol ala-bơr, bol jăk-chài mơ bol gơnoar-cih tus mơ bol mê; cau bà bol mê gơsơt mơ tơs dơ chikal, cau bà bol mê pù-lơh tam ală hìu-pơrjum bol mê dê, mơ jòi kup bơh bòn dờng do tus bòn dờng ne. 35 Làng jơh mhàm song-dơpă neh gơtuh hơđăng ù, bơh mhàm Abel lah cau song-dơpă, tus mhàm Zakaria lah kòn Barakia dê, mơ bol mê neh gơsơt tam gùl hìu duh-khoai mơ jơnào, jơh mhàm hơ̆ rơp gơdùh hơđăng bol mê. 36 Di ngăn, Añ đơs mơ bol mê: Jơh ală bơta hơ̆ rơp gơdùh hơđăng jơi-nòi do.
Kơnràñ Jesu nđàc-pơlai bòn dờng Jerusalem
37 Ơ Jerusalem, Jerusalem, mê gơsơt bol ala-bơr mơ to lŭ bol cau neh geh pơyoa tus mơ mê, git nđờ dơ̆ Añ neh kờñ tơrgùm oh kòn mê dê, be iar me tơrgùm ală kòn gơ dê hơđơm đar, mơya bol mê ờ bài. 38 Do, hìu bol mê kong lời srau dò bol mê dê ! 39 Kơyoa Añ đơs mơ bol mê: Bơh ndo bol mê rơp ờ gŏ Añ tai, jơl tus tŭ bol mê đơs: ‘‘Yalniăm Bơtau tus bơh sơnđăn Kơnràñ.”
