Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau pơniơu bơta ñô-bao
22 1 Hơ wơl, Kơnràñ Jesu đơs tai ală jơnau pơniơu mơ bol khai: 2 ‘‘Lơgar trồ ndrờm be cau bơtau lơh bơta ñô-bao kòn klau khai dê in. 3 Khai pơyoa tai bol duh-broă khai dê lòt hòi bol cau neh geh jà tus ñô-bao, mơya bol hơ̆ ờ bài tus. 4 Khai pơyoa bol duh-broă ndai mơ đơs: ‘‘Đơs tĕ mơ bol cau neh geh jà: Do añ neh rơcăng bơta ñô-sa añ dê, ală kơnrồ mơ phan-jơi lơmă añ dê neh gơsơt, mơ jơh ală bơta neh rơcăng rau; tus tĕ ñô-bao.” 5 Mơya bol hơ̆ sền ờ sơp mơ lik-lòt, cau bà lòt sre-brê, cau bà lòt kă-bro; 6 ai bol ndai tai kup bol duh-broă cau bơtau dê, tơmbàs mơ gơsơt.
7 Cau bơtau gơjrañ mơ pơyoa bol ling khai dê lòt tơnroh bol cau gơsơt cau hơ̆, mơ chu bòn dờng bol hơ̆ dê. 8 Tŭ hơ̆, cau bơtau đơs mơ bol duh-broă khai dê: ‘‘Bơta ñô-bao neh rơcăng rau, mơya bol neh geh jà ờ di-pal; 9 be hơ̆, bol mê lòt tĕ hơ ală jum gùng, mơ bol lơi bol mê tìp, gen hòi tĕ tus ñô-bao.” 10 Bol duh-broă hơ̆ lik-lòt tam ală gùng, pơrjum jơh ală cau bol khai tìp, bol iơh mơ bol niăm; mơ adŭ ñô-bao bềng bol năc. * 11 Cau bơtau mut làng sền bol năc, mơ gŏ tam hơ̆ dùl nă ờ soh ào ñô-bao, 12 mơ khai đơs mơ cau hơ̆: ‘‘Ơ kơnau, mbe gơlơh mê mut ndo mơ ờ geh ào ñô-bao ?” Mơya cau hơ̆ ơm momŏ. 13 Tŭ hơ̆, cau bơtau đơs mơ bol dong-broă: ‘‘Căp tĕ jơng tê khai mơ cơm tĕ khai tam tiah klăm-jơngo bơdìh: tềng hơ̆ rơp geh bơta ñìm-răc mơ rơkiăt sề.” 14 Kơyoa gal cau geh hòi, mơya dŭt cau geh rơwah.”
Boh dia Sesare in
15 Tŭ hơ̆, bol Phariseo lik-lòt bơyai bal, làng kup Kơnràñ tam jơnau đơs. * 16 Bol khai pơyoa bol jăt-dờn bol khai dê lòt bal mơ bol tam ntum Herode tus mơ Kơnràñ mơ đơs: ‘‘Ơ Pôgru, bol hi git ồng lah cau ngăn-ngồn, ồng bơto gùng Yàng tam bơta ngăn-ngồn, mơ ồng ờ kơlôi is dơ cau lơi; bơh ồng ờ sền đah bơdìh cau dê. 17 Be hơ̆, dăn ồng đơs bol hi in ñchi ồng kơlô : Geh boh dia Sesare in ngŏlah ờ ?” 18 Mơya Kơnràñ Jesu git bơta iơh-bơsăk bol khai dê, gen đơs: ‘‘Ñchi bơh tài bol mê tơlòng Añ taih, ơ bol blăc-să ? 19 Sơnđio tĕ Añ in priă boh dia.” Bol khai tong Kơnràñ in dùl đong priă. 20 Kơnràñ đơs mơ bol khai: ‘‘Rùp mơ khar păc do lah ñcau dê taih ?” * Bol khai đơs mơ Kơnràñ: ‘‘Sesare dê”. Tŭ hơ̆, Kơnràñ đơs mơ bol khai: ‘‘Be hơ̆, jào wơl tĕ Sesare in ală bơta Sesare dê, mơ Yàng in ală bơta Yàng dê.” 22 Kơno be hơ̆, bol khai ai lơh krơi, mơ lời Kơnràñ, bol khai lik-lòt.
Cau chơt kis wơl
* 23 Tam ngai hơ̆, bol Sadduseo lah bol đơs ờ geh bơta kis wơl, tus hơ Kơnràñ, lùp Kơnràñ 24 mơ đơs: ‘‘Ơ Pôgru, Moise neh đơs, dilah cau lơi chơt mơ ờ geh kòn, gen oh mi khai pal bao mơ bao ùr cau hơ̆ dê làng tơrbŏ jơi oh mi khai in. 25 Tam bol hi geh poh nă oh mi: cau sơnrờp lồc bao, gen chơt, mơ bơh ờ geh kòn, gen neh lời bao ùr khai oh khai in; 26 krung ndrờm be hơ̆ sơl, cau dơ̆ bàr, mơ cau dơ̆ pe, jơl tus dơ cau dơ̆ poh. 27 Dut-ndơl, cau ùr jơh ală cau hơ̆ dê krung chơt sơl. 28 Be hơ̆, tam ngai kis wơl, cau ùr rơp lah bao ùr ñcau dê tam poh nă ? Kơyoa jơh tơl nă neh bao mơ khai.” 29 Hơ wơl, Kơnràñ Jesu đơs mơ bol khai : ‘‘Bol mê tìs tài bơh ờ git Sră Goh, mơ krung ờ git pràn-gơnoar Yàng dê; 30 bơh tam ngai kis wơl, cau ờ lăp klau tambao ùr, mơya gơs be bol huềng-duh tam trồ. 31 Ai gơrềng bơh bơta kis wơl bol cau chơt dê, bol mê neh ờ đal sơl ơ, jơnau Yàng đơs mơ bol mê: * 32 ‘‘Añ lah Yàng Abraham dê, Yàng Isaak dê, mơ Yàng Jakop dê” ? Yàng ờ di lah Yàng bol cau chơt dê, mơya bol cau kis dê.” 33 Kơno be hơ̆, ală mpồl làng-bol ai lơh krơi gơrềng bơh jơnau bơto Kơnràñ dê.
Jơnau sồr dờng
* 34 Tŭ bol Phariseo kơno lah Kơnràñ neh lơh bol Sadduseo kloat bơr, gen bol khai pơrjum bal. 35 Dùl nă cau jăk-chài gùng boh-lăm tam bol khai lùp tơlòng Kơnràñ: 36 ‘‘Ơ Pôgru, jơnau lơi lah jơnau sồr dờng tam Gùng boh-lăm ?” 37 Kơnràñ đơs mơ khai: ‘‘Mê pal gơboh mơ Kơnràñ Yàng mê dê jơh nùs, jơh soàn mơ jơh tồr mê: 38 do lah jơnau sồr dờng mơ lài jơh. 39 Jơnau bàr ndrờm be jơnau hơ̆ lah: Mê pal gơboh mơ gơp mê be să tờm mê. 40 Jơh Gùng boh-lăm mơ Ală jơnau ala-bơr gơrê mơ bàr jơnau hơ̆.”
Kơnràñ Jesu lah kòn mơ krung lah Kơnràñ Davit dê
41 Tŭ bol Phariseo pơrjum bal, Kơnràñ Jesu lùp bol khai 42 mơ đơs: ‘‘Ñchi bol mê kơlôi gơrềng bơh Kơnràñ Kristo ? Khai lah kòn ñcau dê ?” Bol khai đơs mơ Kơnràñ: ‘‘Kòn Davit dê.” 43 Kơnràñ đơs mơ bol khai: ‘‘Be hơ̆, mbe gơlơh Davit geh Nhơm pơnđàng, hòi Khai lah Kơnràñ mơ đơs:
44 ‘‘Kơnràñ neh đơs mơ Kơnràñ añ: Nggui tĕ đah ma Añ, jơl tus dơ tŭ Añ ơn bol sò-tơm Kòn dê hơđơm jơng Kòn” ?
* 45 Be hơ̆, dilah Davit hòi Khai lah Kơnràñ, gen mbe gơlơh Kơnràñ lah kòn khai dê taih ?”
46 Mơ ờ geh cau lơi rơgơi hơ mơ Kơnràñ dùl bơr lơi, mơ bơh ngai hơ̆, krung ờ geh cau lơi khin lùp Kơnràñ tai.
