Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu mut tam Jerusalem mơ gơnăp-gơnoar Bơtau Messia
21 1 Tŭ bol khai neh tus rềp Jerusalem, mơ tus Bethphage, hơ bơnơm Olive, tŭ hơ̆ Kơnràñ Jesu pơyoa bàr nă cau jăt-dờn 2 mơ đơs mơ bol khai: ‘‘Lòt tĕ tam bòn dơđăp bol kòn, mơ bol kòn rơp bàn mơ dùl nơm alàng me găm diàng, mơ alàng kòn bal mơ gơ, bol kòn hồ tĕ mơ tề cèng Añ in. 3 Dilah geh cau lơi đơs mơ bol kòn chi lơi, gen bol kòn đơs tĕ ‘‘Kơnràñ kờñ gơ”, mơ cau hơ̆ rơp ai tề gơ mơ.” 4 Bơta do neh gơlik gơs, làng gơlik di ngăn jơnau cau ala-bơr neh đơs:
* 5 ‘‘Đơs tĕ mơ kòn ùr Sion: Do Bơtau ai dê tus mơ ai, niăm-lơnhơn mơ nggui hơđăng alàng me, mơ hơđăng alàng kòn, lah kòn alàng pơdiăng phan dê.”
6 Bol jăt-dờn lòt, lơh be Kơnràñ Jesu neh sồr bol khai, 7 bol khai tề alàng me mơ alàng kòn; bol khai dă ào bol khai dê hơđăng gơ, mơ Kơnràñ nggui hơđăng gơ. 8 Mpồl làng-bol gal ngăn dă ào bol khai dê tam gùng; ai bol ndai sreh ală ntê chi mơ rơsìh tam gùng. * 9 Ală mpồl làng-bol bà lòt lài mơ bà jăt tơnơ̆ Kơnràñ, driau lah: ‘‘Hosanna kòn Davit ! Yalniăm Bơtau tus bơh sơnđăn Kơnràñ ! Hosanna tam hơđăng jơnhoa rơlau jơh !”
10 Tŭ Kơnràñ mut tam Jerusalem, gen jơh mơ bòn dờng nggồr-nggàc mơ đơs: ‘‘Hơ̆ lah ñcau taih ?” 11 Ală mpồl làng-bol đơs: ‘‘Hơ̆ lah Jesu, cau ala-bơr, bơh Nazareth, lơgar Galilea.”
Kơnràñ Jesu bơtrơh jơh ală cau tăc mơ ală cau blơi bơh hìu duh-khoai
12 Kơnràñ Jesu mut tam hìu duh-khoai, mơ bơtrơh jơh ală cau tăc mơ ală cau blơi tam hìu duh-khoai, tơlơ ală cơnờng bol gơl priă mơ ală cơnờng nggui bol tăc ntờp, * 13 mơ đơs mơ bol khai: ‘‘Neh geh cih: ‘‘Hìu Añ dê rơp geh hòi lah hìu răc dăn.” Mơya bol mê lơh gơs trồm bol tung-kơñau dê.”
14 Geh bol jơngo mơ bol kuet-kơlte tus hơ Kơnràñ tam hìu duh-khoai, mơ Kơnràñ tơmbời bol khai. 15 Mơya bol ăt-bồ bol lơh-yàng dê mơ bol gơnoar-cih gŏ ală bơta krơi-sơrbơi Kơnràñ neh lơh, mơ bol kơnòm hòi-nggà tam hìu duh-khoai mơ đơs: ‘‘Hosanna kòn Davit”, gen bol khai gơjrañ * 16 mơ đơs mơ Kơnràñ: ‘‘Ồng kơno bol hơ̆ đơs chi lơi sơl ờ ?” Kơnràñ Jesu đơs mơ bol khai: ‘‘Kơno; bol mê ờ hềt tŭ lơi neh đal sơl ơ: ‘‘Bơh bơr bol kơnòm dêt mơ bol găm pô, Yàng neh lơh gơs wil-tơl jơnau jờngrơ ?”‘‘ 17 Mơ lời bol khai, Kơnràñ lik hơ bơdìh bòn dờng, tus tam Betania, mơ ơm tềng hơ̆.
Tờm chi bal ờ gơlik plai
18 Àng drim, tam tŭ rê wơl tam bòn dờng, Kơnràñ jơgloh. * 19 Gŏ dùl tờm chi bal dơ gah gùng, Kơnràñ tus hơ gơ; mơya Kơnràñ ờ gŏ chi lơi tam gơ, mìng nha lơm, gen Kơnràñ đơs mơ gơ: ‘‘Jơl sùm sùm, ờ tŭ lơi geh plai gơlik bơh mê tai.” Mơ tờm chi bal gơro mơ 20 Gŏ be hơ̆, bol jăt-dờn ai lơh krơi mơ đơs: ‘‘Mbe gơlơh tờm chi bal ro mơ taih ?” 21 Hơ wơl, Kơnràñ Jesu đơs mơ bol khai: ‘‘Di ngăn, Añ đơs mơ bol kòn: Dilah bol kòn geh bơta pindờn mơ ờ pin wi-wơ, gen bol kòn rơp lơh ờ di mìng gơrềng bơh tờm chi bal lơm, mơya dilah bol kòn đơs mơ bơnơm do: ‘‘Yờ tĕ mơ cơm tĕ să mê tam dà-lềng”, gen bơta hơ̆ rơp gơs sơl. 22 Mơ jơh ală bơta lơi bol kòn rơp dăn tam tŭ răc dăn mơ pindờn, gen bol kòn rơp dờp.”
Jơnau lùp gơrềng bơh gơnoar Kơnràñ Jesu dê
23 Tŭ Kơnràñ tus tam hìu duh-khoai, găm bơto, gen bol ăt-bồ bol lơh-yàng dê mơ bol kuang kra làng-bol dê tus hơ Khai mơ đơs: ‘‘Ồng ai gơnoar lơi mơ lơh ală bơta hơ̆ ? Mơ ñcau neh pà ồng in gơnoar hơ̆ taih ?” 24 Hơ wơl, Kơnràñ Jesu đơs mơ bol khai: ‘‘Ai Añ, Añ rơp lùp bol mê dùl jơnau lơm, dilah bol mê đơs mơ Añ jơnau hơ̆, gen Añ rơp đơs mơ bol mê, Añ ai gơnoar lơi mơ lơh ală bơta hơ̆: 25 Bơta pơnđum Joan dê mbơh lơi taih ? Bơh trồ ngŏlah bơh kòn-bơnus ?” Mơya bol khai kơlôi mơ đơs bal: ‘‘Dilah bol he đơs: ‘‘Bơh trồ”, gen Khai rơp đơs mơ bol he: ‘‘Be hơ̆, ñchi bơh tài bol mê ờ pindờn khai ?”; 26 ai dilah bol he đơs: ‘‘Bơh kòn-bơnus”, gen bol he ngòt mpồl làng-bol ; kơyoa jơh ală cau sền Joan be cau ala-bơr.” 27 Mơ bol khai hơ mơ đơs mơ Kơnràñ Jesu: ‘‘Bol hi ờ git.” Kơnràñ đơs mơ bol khai: ‘‘Añ krung ờ đơs mơ bol mê Añ ai gơnoar lơi mơ lơh ală bơta hơ̆.”
Jơnau pơniơu bàr nă kòn klau
28 ‘‘Ñchi bol mê kơlôi taih ? Cau ne geh bàr nă kòn klau. Khai tus đơs mơ kòn sơnrờp: ‘‘Ơ kòn, ngai do lòt tĕ lơh broă tam suơn ño.” 29 Kòn hơ̆ hơ mơ đơs: ‘‘Añ ờ bài”; mơya tơnơ̆ hơ̆ khai màl mơ lòt. 30 Cau bàp tus mơ kòn tơnơ̆ mơ krung đơs ndrờm be hơ̆ sơl. Khai hơ mơ đơs: ‘‘Ơ ồng, añ lòt”; mơya khai ờ lòt. 31 Ñcau tam bàr nă kòn hơ̆ neh lơh jăt nùs-kờñ bàp dê taih ?” Bol khai đơs: ‘‘Kòn sơnrờp.” Kơnràñ Jesu đơs mơ bol khai: ‘‘Di ngăn, Añ đơs mơ bol mê: Bol dar dia mơ bol dri-tơlàr mut tam lơgar Yàng lài mơ bol mê. 32 Kơyoa Joan tus mơ bol mê tam gùng song-dơpă, mơ bol mê neh ờ pindờn khai; mơya bol dar dia mơ bol dri-tơlàr neh pindờn khai. Ai bol mê neh gŏ, mơ tơnơ̆ hơ̆ krung ờ ềng-màl, làng pindờn khai.
Jơnau pơniơu bol lơh suơn gơsơt cau
33 Bol mê iăt tĕ jơnau pơniơu ndai. Geh dùl nă cau tờm hìu ne tăm dùl suơn ño, lơh pơnggàr gùt dar, tờ bơtô tam hơ̆, mơ bơtào dùl nơm kù, ai bol lơh suơn in apah mơ lòt tiah ngài. 34 Tŭ mờr tus kàl pic plai, cau tờm pơyoa bol duh-broă khai dê tus mơ bol lơh suơn, làng dờp cồng-nha khai dê. 35 Bol lơh suơn kup bol duh-broă khai dê, pù-lơh cau do, gơsơt cau ne, cơm lŭ dơ cau dă. 36 Cau tờm pơyoa tai bol duh-broă ndai oă rơlau mơ lài, mơ bol lơh suơn krung lơh bol khai in ndrờm be hơ̆ sơl. 37 Dut-ndơl, cau tờm pơyoa kòn klau khai dê tus mơ bol hơ̆ mơ đơs: ‘‘Bol khai rơp bìr-adăt kòn klau añ.” 38 Mơya bol lơh suơn gŏ kòn klau hơ̆, gen đơs bal: ‘‘Do lah cau pơrdờn. Bol mê tus tĕ, bol he rơp gơsơt khai mơ rơp geh jơtài khai dê.” 39 Mơ kup kòn klau hơ̆, bol lơh suơn neh cơm khai hơ bơdìh suơn ño mơ gơsơt. 40 Be hơ̆, tŭ cau tờm suơn ño tus, ñchi khai rơp lơh bol lơh suơn ño hơ̆ in ?” 41 Bol khai đơs mơ Kơnràñ: ‘‘Khai rơp jàñ-bơsăk tơnroh bol iơh-bơsăk mơ ai bol ndai apah lơh suơn, lah bol cau rơp ai khai in cồng-nha di tơngai gơ dê.” * 42 Kơnràñ Jesu đơs mơ bol khai: ‘‘Bol mê neh ờ tŭ lơi đal tam Sră Goh sơl ơ:
‘‘Lŭ mơ bol băc hìu săng-sơrbì, lŭ hơ̆ neh gơlik gơs lŭ mum; broă hơ̆ neh geh Kơnràñ lơh, mơ gơ krơi-sơbơi dơ măt bol he?”
43 Be hơ̆, Añ đơs mơ bol mê lah, lơgar Yàng rơp tă bơh bol mê, mơ rơp pà dùl làng-bol in git lơh gơlik cồng-nha gơ dê. 44 Cau lơi dùh hơđăng lŭ hơ̆, gen cau hơ̆ rơp kong lề; ai lŭ hơ̆ dùh hơđăng cau lơi, gen gơ tơnlề cau hơ̆.”
45 Tŭ bol ăt-bồ bol lơh-yàng dê mơ bol Phariseo kơno ală jơnau pơniơu Kơnràñ dê, gen bol khai git lah Kơnràñ đơs gơrềng bơh bol khai; 46 bol khai jòi gùng kup Kơnràñ, mơya rơngòt ală mpồl làng-bol, bơh ală mpồl làng-bol sền Kơnràñ be cau ala-bơr.
