Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau pơniơu cau lơh suơn ño
20 * 1 Kơyoa lơgar trồ ndrờm be cau tờm hìu, rìng-àng lik-lòt apah bol lơh broă tus tam suơn ño khai dê; 2 dơ̆ neh ring bal mơ bol lơh broă dùl ngai dùl đong priă, khai pơyoa bol khai mut tam suơn ño khai dê. 3 Pơgăp jiờ dơ̆ pe, cau tờm hìu lik-lòt, gŏ bol ndai găm ntào gời tam drà, 4 gen đơs mơ bol khai: ‘‘Bol mê krung lòt tĕ tam suơn ño; mơ añ rơp ai bol mê in di-pal.” 5 Bol khai lik-lòt. Cau tờm hìu lik tai, pơgăp jiờ dơ̆ prau mơ jiờ dơ̆ sin, mơ lơh be hơ̆ sơl. 6 Pơgăp jiờ dơ̆ jơt dùl, khai lik tai mơ gŏ bol ndai găm ntào, gen đơs mơ bol khai: ‘‘Ñchi bơh tài bol mê ntào gời tềng do jơh tơngai taih ?” 7 Bol khai đơs mơ cau tờm hìu: ‘‘Tài bơh ờ geh cau apah bol hi.” Cau tờm hìu đơs mơ bol khai: ‘‘Bol mê krung lòt tĕ tam suơn ño.”
8 Mho tus, cau tờm suơn ño đơs mơ cau ăt-bồ broă khai dê: ‘‘Hòi tĕ bol lơh broă mơ ai priă tơngai bol khai in, sơntờm bơh bol lồi-dut tus dơ bol sơnrờp.” 9 Tŭ bol lơh broă pơgăp jiờ dơ̆ jơt dùl tus, bol khai dờp kờp nă dùl đong priă. 10 Dơ̆ bol sơnrờp tus, bol khai tồn lah rơp dờp oă rơlau; mơya bol khai krung dờp kờp nă dùl đong priă lơm. 11 Tam tŭ dờp, bol khai kơmrào tamdră mơ cau tờm hìu, 12 mơ đơs: ‘‘Bol lồi-dut do neh lơh mìng dùl jiờ lơm, mơ ồng ai bol khai ndrờm mơ bol hi, lah bol cau neh kong kơnjơ̆ jơh tơngai mơ duh-tơhu !” 13 Mơya cau tờm hơ mơ đơs mơ dùl nă tam bol khai: ‘‘Ơ kơnau, añ ờ lơh ờ di mơ mê; mê neh ờ ring nùs mơ añ dùl đong priă ơ ? 14 Ai tĕ phan mê dê mơ lòt tĕ; añ kờñ ai cau dut-ndơl in be mê in sơl. 15 Añ ờ geh lơh bơta añ kờñ gơrềng bơh ală phan-bơna añ dê ơ ? Ngŏlah măt mê iơh-bơsăk tài bơh añ niăm-lơhơn ơ ?”
16 Be hơ̆, bol lồi-dut rơp gơs bol sơnrờp, mơ bol sơnrờp rơp gơs bol lồi-dut.”
Kơnràñ Jesu yal lài dơ̆ pe bơta jê-yăn Khai dê
17 Tam tŭ Kơnràñ Jesu guh hơ Jerusalem, Kơnràñ lăm is Jơt Bàr nă cau jăt-dờn mơ đơs mơ bol khai tam gùng: 18 ‘‘Do bol he guh hơ Jerusalem, mơ Kòn kòn-bơnus rơp kong jào dơ bol ăt-bồ bol lơh-yàng dê, bol gơnoar-cih, mơ bol khai rơp yal-glài chơt Khai in, 19 jào Khai dơ ală làng-bol bơdìh làng ñŏ-tơnhial, pù-lơh, tơs dơ chikal, mơ ngai pe Khai rơp kis wơl.”
Mè bàr nă kòn klau Zebede dê
20 Tŭ hơ̆, mè bol kòn klau Zebede dê bal mơ bol kòn klau khai dê tus hơ Kơnràñ, cùn-khoai, dăn mơ Kơnràñ dùl bơta. 21 Kơnràñ đơs mơ khai: ‘‘Ñchi ai kờñ taih ?” Khai đơs mơ Kơnràñ: ‘‘Dăn sồr bàr nă kòn klau añ do, nggui dùl nă đah ma mơ dùl nă đah kiau Đi tam lơgar Đi dê.” 22 Mơya hơ wơl, Kơnràñ Jesu đơs: ‘‘ Bol kòn ờ git bơta bol kòn dăn. Bol kòn rơgơi hùc coàn mơ Añ rơp hùc sơl ờ ?” Bol khai đơs mơ Kơnràñ: ‘‘Bol kòn rơgơi.” * 23 Kơnràñ đơs mơ bol khai: ‘‘Ngăn, bol kòn rơp hùc coàn Añ dê, mơya ai nggui đah ma mơ đah kiau Añ dê, gen bơta hơ̆ ờ gơrê mơ Añ, mơya ai bol cau lơi in mơ bơta hơ̆ neh geh Bàp Añ rơcăng.”
24 Dớ jơt nă cau jăt-dờn kơno jơnau hơ̆, gen gơjrañ mơ bàr nă oh mi. 25 Kơnràñ Jesu hòi bol khai tus hơ Kơnràñ mơ đơs: ‘‘Bol kòn git lah bol lăm-bồ ală làng-bol bơdìh ăt-bồ bol khai, mơ bol cau lơh dờng, gen lơh gơnoar hơđăng bol khai. 26 Ờ di be hơ̆ tam gùl bol kòn, mơya cau lơi kờñ gơs dờng tam gùl bol kòn, gen cau hơ̆ rơp gơs cau dong-duh bol kòn dê; 27 mơ cau lơi kờñ gơs lài jơh tam gùl bol kòn, gen cau hơ̆ rơp gơs cau duh-broă bol kòn dê; 28 be Kòn kòn-bơnus ờ tus làng geh duh-broă, mơya làng duh-broă mơ pà bơta kis Khai dê gơs bơta tơwài gal cau in.”
Kơnràñ Jesu tơmbời bàr nă cau jơngo măt tam Jeriko
29 Mơ tam tŭ bol khai lik bơh Jeriko, geh mpồl làng-bol gal jăt Kơnràñ. 30 Mơ do, geh bàr nă cau jơngo măt nggui dơ gah gùng, kơno lah Kơnràñ Jesu lòt găn, gen hòi-nggà mơ đơs: ‘‘Ơ Kơnràñ, kòn Davit dê, dăn nđàc-sơngit bol hi !” 31 Mpồl làng-bol lah-pơrhơng bol khai, làng bol khai ơm momŏ; mơya bol khai sơlơ hòi-nggà mơ đơs: ‘‘Ơ Kơnràñ, kòn Davit dê, dăn nđàc-sơngit bol hi.” 32 Kơnràñ Jesu ơm wơl, hòi bol khai mơ đơs: ‘‘Ñchi bol mê kờñ Añ lơh bol mê in taih ?” 33 Bol khai đơs: ‘‘Ơ Kơnràñ, dăn ai măt bol hi in geh pờ.” 34 Kơnràñ Jesu nđàc-sơngit, bư dơ măt bol khai; tŭ hơ̆ mơ, bol khai gŏ mơ jăt Kơnràñ.
