Jơnau Yalniam Mattheo – Pơnăh 19

VI. LƠGAR TRỒ:

GƠNOAR-BƠTAU YÀNG DÊ NEH TUS RỀP

1. Bơnah cih-yal

Jơnau lùp gơrềng bơh bơta tamlời

19 1 Mơ gơlik gơs lah, tŭ Kơnràñ Jesu neh jơh đơs ală jơnau hơ̆ rau, gen Khai lòt bơh Galilea tus hơ kơnhoàl Judea, đah ne Jordano. 2 Geh ală mpồl làng-bol gal jăt Kơnràñ, mơ Kơnràñ tơmbời bol khai tềng hơ̆.

3 Bol Phariseo tus mơ Kơnràñ, tơlòng Khai mơ đơs: ‘‘Cau geh lời sơl bao ùr he bơh kai lơi lơi ờ ?” 4 Hơ wơl, Kơnràñ đơs: ‘‘Bol mê neh ờ đal sơl ơ, bơh sơnrờp, Yàng neh pơjềng kòn-bơnus, Khai pơjềng bol khai, klau mơ ùr, 5 mơ Khai neh đơs: ‘‘Tài bơh hơ̆,  cau klau rơp lời bàp mơ mè, mơ đềt-mềr mơ bao ùr he dê, mơ bàr nă gơs mìng dùl poăc-să ?” 6 Mơ be hơ̆, bol khai ờ di lah bàr tai, mơya mìng dùl poăc-să lơm. Gen tàng, bơta lơi Yàng neh bơrkuăt, kòn-bơnus ờ geh pơnrah.” 7 Bol khai đơs mơ Kơnràñ: ‘‘Be hơ̆, ñchi bơh tài Moise neh sồr pal ai sră tamlời làng lời bao taih ?” 8 Kơnràñ đơs mơ bol khai: ‘‘Bơh nùs bol mê kơldăng, gen tàng Moise neh ai gơnoar bol mê in lời bao ùr bol mê dê; mơya bơh sơnrờp ờ geh be hơ̆. * 9 Mơ Añ đơs mơ bol mê lah, cau lơi lời bao ùr he dê, ờ di bơh jơnau bơrnàn, mơ bao mơ cau ndai, gen cau hơ̆ tìs bơrnàn.”

Bơh nùs tờm kis sàng-kloh

10 Bol jăt-dờn Kơnràñ dê đơs mơ Khai: ‘‘Dilah bơta cau klau dê mơ bao ùr lah be hơ̆, gen ờ bao lah niăm rơlau.” 11 Kơnràñ đơs mơ bol khai: ‘‘Ờ di jơh ală cau rơgơi dờp jơnau hơ̆, mơya mìng bol cau lơi in geh ai lơm. * 12 Kơyoa geh bol cau kong kriau, bơh tam kơndul mè deh neh be hơ̆; geh bol cau kong kriau bơh cau lơh; mơ geh bol cau kong kriau bơh să tờm bol khai kriau tài bơh lơgar trồ. Cau lơi rơgơi dờp, gen dờp tĕ.”

Kơnràñ Jesu mơ kơnòm dêt

13 Tŭ hơ̆, cau cèng bol kơnòm dêt tus hơ Kơnràñ, làng Kơnràñ ơn tê hơđăng bol khai mơ hòi dăn; bol jăt-dờn lah-pơrhơng bol khai. 14 Mơya Kơnràñ Jesu đơs: ‘‘Lời tĕ bol kơnòm dêt, bañ kơryăn bol khai tus hơ Añ; bơh lơgar trồ gơrê mơ bol cau be bol khai.” 15 Gen Kơnràñ ơn tê hơđăng bol khai, mơ lòt bơh tềng hơ̆.

Cau pơnu geh oă phan-bơna

16 Mơ do, geh dùl nă cau tus đơs mơ Kơnràñ: ‘‘Ơ Pôgru, añ pal lơh broă niăm lơi làng geh bơta kis găm sùm sùm taih ?” Kơnràñ đơs mơ khai: 17 ‘‘Ñchi bơh tài mê lùp Añ gơrềng bơh broă niăm taih ? Mìng geh dùl Bơtau niăm lơm. Dilah mê kờñ mut tam bơta kis, gen prăp tĕ ală jơnau sồr.”

18 Cau hơ̆ đơs mơ Kơnràñ: ‘‘Ală jơnau sồr lơi taih ?” Kơnràñ Jesu đơs: ‘‘Mê bañ gơsơt cau, bañ lơh dri-bơrnàn, bañ tung-kơñau, bañ lơh cơng blăc, 19 dờn-duh tĕ bàp mơ mè, gơboh tĕ mơ gơp mê be să tờm mê.” 20 Cau pơnu hơ̆ đơs mơ Kơnràñ: ‘‘Añ neh prăp jơh ală jơnau hơ̆ rau. Ñchi añ găm phơt taih ?” * 21 Kơnràñ Jesu đơs mơ khai: ‘‘Dilah mê kờñ gơs niăm wil-tơl, gen lòt tĕ tăc jơh ală phan mê geh, mơ pà bol rơbah in, gen mê rơp geh đăm phan-màng tam trồ; mơ tus tĕ jăt Añ.” 22 Mơya dơ̆ cau pơnu kơno jơnau hơ̆, gen moăt-jrùng lik-lòt; bơh khai geh oă phan-bơna.

Cau pas-sơm mut tam lơgar trồ lah kăn-rơmăn

23 Gen Kơnràñ Jesu đơs mơ bol jăt-dờn Khai dê: ‘‘Di ngăn, Añ đơs mơ bol kòn: Cau pas-sơm mut tam lơgar trồ lah kăn-rơmăn. 24 Añ đơs tai mơ bol kòn: Làk-đà lòt găn trồm jrum, gen buơn rơlau mơ cau pas-sơm mut tam lơgar Yàng.” 25 Kơno ală jơnau hơ̆, bol jăt-dờn ai lơh krơi ngăn mơ đơs: ‘‘Be hơ̆, ñcau rơgơi geh tơngklàs taih ?” 26 Kơnràñ Jesu sền dơ bol khai mơ đơs: ‘‘Mơ kòn-bơnus, jơnau hơ̆ ờ rơgơi, mơya mơ Yàng, jơh ală bơta rơgơi lơm.”

Phan-jờng gơrê mơ cau săng-lời jơh ală bơta mơ jăt Kơnràñ Jesu

27 Tŭ hơ̆, Petro hơ mơ đơs mơ Kơnràñ: ‘‘Do bol kòn neh săng jơh ală bơta mơ jăt Kơnràñ. Be hơ̆, ñchi bol kòn rơp geh taih ?” * 28 Kơnràñ Jesu đơs mơ bol khai: ‘‘Di ngăn, Añ đơs mơ bol kòn lah, bol kòn lah ală cau neh jăt Añ, gen tam rơnàng deh wơl, tŭ Kòn kòn-bơnus rơp nggui hơđăng sơbàn gơklŏ Khai dê, bol kòn krung rơp nggui hơđăng jơt bàr nơm sơbàn cah-rơña jơt bàr jơi-bơtiàn Israel dê. 29 Cau lơi tài bơh sơnđăn Añ mơ săng hìu-đăm, oh mi, ruh- lŏ, me bàp, oh kòn, ngŏlah sre-bŏ, gen cau hơ̆ rơp dờp dùl rơhiăng dơ̆ rơlau, mơ pơrdờn bơta kis găm sùm sùm.

30 Mơya geh gal cau sơnrờp rơp gơs bol lồi-dut, mơ bol lồi-dut rơp gơs bol sơnrờp.