Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
2. Jơnau bơto gơrềng bơh Pơrjum-niăm
Ñcau dờng rơlau tam lơgar trồ ?
18 1 Tam jiờ hơ̆, bol jăt-dờn tus hơ Kơnràñ Jesu mơ đơs: ‘‘ Đi kơlôi ñcau dờng rơlau tam lơgar trồ taih ?” 2 Kơnràñ hòi dùl nă kơnòm dêt tus, ơn khai tam gùl bol khai 3 mơ đơs: ‘‘Di ngăn, Añ đơs mơ bol kòn: Dilah bol kòn ờ màl wơl mơ gơlik be bol kơnòm dêt, gen bol kòn rơp ờ geh mut tam lơgar trồ. 4 Be hơ̆, cau lơi pơndêt-să be kơnòm dêt do, gen cau hơ̆ lah dờng rơlau tam lơgar trồ. * 5 Mơ cau lơi wă-rò dùl nă kơnòm dêt be do bơh sơnđăn Añ, hơ̆ lah wă-rò Añ.
Bañ gơs kai lơh gơtup tìs cau in
6 Mơya cau lơi lơh gơtup tìs dùl nă in tam ală kơnòm dêt neh pindờn dơ Añ do, gen niăm khai in lah, khai kong yồng mpal lŭ dờng dơ ngko mơ kong tơmbŭ tam tiah dà-lềng. 7 Dồn-sa dunia in bơh ală kai lơh gơtup tìs ! Kơyoa pal tus ală kai lơh gơtup tìs; mơya dồn-sa cau lơi in, bơh dơ khai tus kai lơh gơtup tìs !
8 Dilah tê kòn ngŏlah jơng kòn lơh kòn in gơtup tìs, gen koh tĕ gơ mơ cơm ngài bơh kòn: niăm kòn in, lut tê ngŏlah lut jơng mơ mut tam bơta kis, rơlau mơ geh bàr nơm tê ngŏlah bàr nơm jơng mơ kong sơrbì tam ồs găm sùm sùm. * 9 Mơ dilah măt kòn lơh kòn in gơtup tìs, gen kơluĕ tĕ gơ mơ cơm ngài bơh kòn: niăm kòn in, geh dùl đah măt mơ mut tam bơta kis, rơlau mơ geh bàr đah măt mơ kong sơrbì tam ồs brah-tìng.
10 Sền ngăc tĕ, bañ sền ờ sơp dùl nă lơi tam bol cau dêt do; bơh Añ đơs mơ bol kòn lah, bol huềng-duh bol khai dê tam trồ gŏ sùm măt Bàp Añ, Bơtau ơm tam trồ.
Belàt nrah
12 Mbe bol kòn kơlôi taih ? Dilah cau lơi geh dùl rơhiăng nơm belàt, mơ dùl nơm tam bol gơ neh nrah, gen khai ờ lời sin jơt sin nơm tam bơnơm, mơ lòt jòi belàt neh nrah ơ ? 13 Mơ dilah gơlik gơs lah, khai jòi bàn gơ, gen di ngăn, Añ đơs mơ bol kòn lah, khai rơp chờhờp bơh gơ rơlau mơ bơh sin jơt sin nơm ờ nrah. 14 Krung be hơ̆ sơl, Bàp bol kòn, Bơtau ơm tam trồ, ờ kờñ dùl nă lơi tam bol cau dêt do roh-rui.
Bơto-tơmàl oh mi
15 Dilah oh mi kòn dê tìs mơ kòn, gen lòt tĕ bơto-tơmàl khai tam gùl kòn mơ khai lơm. Dilah khai iăt kòn, gen kòn neh geh wơl oh mi kòn dê; * 16 mơya dilah khai ờ iăt, gen lăm tĕ bal mơ kòn dùl nă ngŏlah bàr nă tai, làng bơh bơr bàr nă ngŏlah pe nă cau cơng, gen jơh tơl jơnau geh kơ̆-nền; 17 dilah khai ờ kờñ iăt bol hơ̆, gen đơs tĕ mơ Pơrjum-niăm; mơya dilah Pơrjum-niăm tai khai krung ờ kờñ iăt, gen kòn sền tĕ khai be cau bơdìh mơ cau dar dia. 18 Di ngăn, Añ đơs mơ bol kòn: Ală bơta lơi bol kòn kơt tam tiah, gen tam trồ krung rơp kơt sơl; mơ ală bơta lơi bol kòn hồ tam tiah, gen tam trồ krung rơp hồ sơl.
Geh nùs-tồr bal răc dăn
19 Añ đơs tai mơ bol kòn: Dilah bàr nă cau lơi tam bol kòn geh nùs-tồr bal tam tiah gơrềng bơh jơh ală bơta lơi bol khai dăn, gen rơp gơlik gơs bol khai in bơh Bàp Añ, Bơtau ơm tam trồ. * 20 Bơh tềng lơi geh bàr pe nă cau pơrjum bal bơh sơnđăn Añ, gen Añ ơm tềng hơ̆ tam gùl bol khai.”
Oh mi pal hồ-lời tìs bal
21 Tŭ hơ̆, Petro tus đơs mơ Kơnràñ: ‘‘Ơ Kơnràñ, oh mi kòn dê lơh tìs mơ kòn, gen nđờ dơ̆ kòn pal hồ khai in ? Jơl tus poh dơ̆ sơl ờ ?” * 22 Kơnràñ Jesu đơs mơ khai: ‘‘Añ ờ đơs mơ kòn jơl tus poh dơ̆, mơya jơl tus poh jơt dơ̆ poh dơ̆.”
Jơnau pơniơu cau kòl dồs ờ git nđàc-sơngit
23 Gen tàng, lơgar trồ ndrờm be cau bơtau ne, kờñ kờp khà mơ bol cau duh-broă khai dê. 24 Tam tŭ khai sơntờm kờp khà, gen cau cèng tus khai in dùl nă cau kòl dồs jơt rơbô talen priă. 25 Bơh khai ờ geh chi lơi làng tơm, gen cau tờm sồr tăc khai, mơ bao, mơ kòn, mơ jơh ală bơta khai geh, làng tơm dồs. 26 Gen tàng, cau duh-broă hơ̆ blup să khoai cau tờm mơ đơs: ‘‘Dăn ồng ơt-gơn añ, añ rơp tơm jơh ồng in.” 27 Cau tờm cau duh-broă hơ̆ nđàc-sơngit lời khai mơ săng dồs khai in. 28 Lik-lòt, cau duh-broă hơ̆ tìp dùl nă cau gơp lơh broă bal mơ khai, kòl dồs mơ khai dùl rơhiăng đong priă, gen khai kup mơ sơnăt ngko cau hơ̆ mơ đơs: ‘‘Tơm tĕ dồs añ in !” 29 Gen tàng, cau bơyô lơh broă bal mơ khai blup să dăn khai mơ đơs: ‘‘Dăn bi ơt-gơn añ, añ rơp tơm bi in.” 30 Mơya khai ờ bài, sơlơ lòt kup cau hơ̆ ơn tam hìu jàm jơl tus dơ tŭ cau hơ̆ tơm dồs.
31 Bol bơyô lơh broă bal mơ khai gŏ ală bơta gơlik gơs, gen moăt-jrùng ngăn, lòt yal cau tờm bol khai dê in jơh ală bơta neh gơlik gơs. 32 Tŭ hơ̆, cau tờm hòi cau duh-broă hơ̆, mơ đơs mơ khai: ‘‘Ơ cau duh-broă iơh-bơsăk ne, jơh dồs añ neh săng mê in, tài bơh mê neh dăn mơ añ; 33 ai mê ờ pal nđàc-sơngit cau bơyô lơh broă bal mơ mê, be añ neh nđàc-sơngit mê ơ ?” 34 Mơ cau tờm khai dê gơhào-gơjrañ, jào khai bol tơnyăn in, jơl tus dơ tŭ khai tơm jơh dồs. 35 Gen Bàp Añ tam trồ rơp lơh bol kòn in be hơ̆ sơl, dilah kờp nă tam bol kòn ờ jơh nùs hồ-lời oh mi he in.”
