Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu srơh să
17 1 Prau ngai tơnơ̆, Kơnràñ Jesu cèng Petro, Jakobe mơ Joan oh khai, mơ lăm bol khai guh is hơđăng bơnơm jơnhoa. 2 Kơnràñ srơh să dơđăp bol khai; muh-măt Kơnràñ gơcrà be măt tơngai, ào Kơnràñ gơs bò be bơta àng. * 3 Mơ do, geh Moise mơ Elia tơnggŏ măt mơ bol khai, mơ boh-bơr mơ Kơnràñ. 4 Hơ wơl, Petro đơs mơ Kơnràñ Jesu: ‘‘Ơ Kơnràñ, bol he ơm ndo gen niăm. Dilah Đi kờñ, kòn rơp lơh tềng do pe nơm sàl: dùl nơm Đi in, dùl nơm Moise in, mơ dùl nơm Elia in.” 5 Tam tŭ khai găm đơs, gen do geh mhoal àng-gơcrà gơgòm bol khai; mơ do geh săp bơh mhoal đơs: ‘‘ Do lah Kòn kờñ-gơboh Añ dê, Añ chờ nùs ngăn dơ Khai; bol mê iăt tĕ Khai.” 6 Kơno be hơ̆, bol jăt-dờn gơplơ̆-gơblup mơ ngòt ngăn. 7 Kơnràñ Jesu tus rềp, bư dơ bol khai, mơ đơs mơ bol khai: ‘‘Ñă tĕ mơ bañ ngòt.” 8 Pờ măt, bol khai ờ gŏ cau lơi tai, mìng dùl nă Kơnràñ Jesu lơm.
Jơnau lùp gơrềng bơh Elia, cau ala-bơr
9 Tam tŭ bol khai mù bơh bơnơm, Kơnràñ Jesu sồr bol khai mơ đơs: ‘‘Bol kòn bañ yal cau lơi in git bơta gơtơnggŏ, jơl tus tŭ Kòn kòn-bơnus kis wơl bơh bol cau chơt.”
* 10 Bol jăt-dờn lùp Kơnràñ mơ đơs: ‘‘Be hơ̆, ñchi bơh tài bol gơnoar-cih đơs lah Elia pal tus lài taih ?” 11 Kơnràñ hơ mơ đơs: ‘‘Ngăn, Elia pal tus mơ bơtào wơl jơh ală bơta. 12 Mơya Añ đơs mơ bol kòn lah, Elia neh tus rau, mơ bol khai ờ git khai, mơya neh lơh khai in ală bơta bol khai kờñ. Kòn kòn-bơnus krung rơp kong jê-yăn bơh bol khai be hơ̆ sơl.” 13 Tŭ hơ̆, bol jăt-dờn git-wă lah Kơnràñ đơs mơ bol khai gơrềng bơh Joan Baptista.
Kơnràñ Jesu tơmbời kòn klau kroă-sơnrăng
14 Tŭ Kơnràñ mơ bol jăt-dờn tus hơ mpồl làng-bol, gen geh dùl nă cau tus mơ Kơnràñ, cùn kơltăng dơđăp Kơnràñ 15 mơ đơs: ‘‘Ơ Kơnràñ, dăn nđàc-sơngit kòn klau añ, bơh khai kòp kroă-sơnrăng, mơ kong jê-yăn oă ngăn; khai jo gơpừ tam ồs, mơ jo dùh tam dà. 16 Añ neh cèng khai tus mơ bol jăt-dờn Đi dê, mơya bol khai ờ rơgơi tơmbời khai.” 17 Hơ wơl, Kơnràñ Jesu đơs: ‘‘Ơ jơi-nòi ờ pindờn mơ sơlơ̆-dră, Añ rơp ơm mơ bol mê jơl tus tŭ lơi taih ? Añ pal kong ơt-ơl bol mê jơl tus tŭ lơi taih ? Cèng tĕ khai ndo Añ in.” 18 Kơnràñ Jesu lah-pơrhơng khai, mơ cà lik bơh khai, mơ kòn hơ̆ geh tơmbời bơh jiờ hơ̆. 19 Tŭ hơ̆, bol jăt-dờn tus ờm mơ Kơnràñ Jesu mơ đơs: ‘‘Ñchi bơh tài bol kòn ờ rơgơi bơtrơh cà hơ̆ taih ?” 20 Kơnràñ đơs mơ bol khai: ‘‘Tài bơh bol kòn ờ hoan pindờn. Bơh di ngăn, Añ đơs mơ bol kòn: Dilah bol kòn geh bơta pindờn be dùl nai gar sơbê, gen bol kòn rơp đơs mơ bơnơm do: ‘‘Tơrđeh tĕ bơh tềng do tus hơ ne !”, gen gơrơp tơrđeh, mơ ờ geh bơta lơi lah ờ rơgơi mơ bol kòn.”
Kơnràñ Jesu yal lài dơ̆ bàr bơta jê-yăn Khai dê
22 Tam tŭ găm ơm tam Galilea, Kơnràñ Jesu đơs mơ bol jăt-dờn: ‘‘Kòn kòn-bơnus pal kong jào tam tê cau, 23 mơ bol khai rơp gơsơt Khai, mơ ngai pe Khai rơp kis wơl.” Bol jăt-dờn moăt-jrùng ngăn.
Kơnràñ Jesu mơ Petro tă dia
24 Tam tŭ bol khai neh tus tam Kapharnaum, bol cau dar dia hìu duh-khoai in tus hơ Petro mơ đơs: ‘‘Pôgru bol mê ờ tă dia hìu duh-khoai in ơ ?” 25 Khai hơ: ‘‘Geh sơl.” Dơ̆ khai mut tam hìu, gen Kơnràñ Jesu lùp lài khai: ‘‘Ơ Simon, mbe kòn kơlôi taih ? Bol bơtau tam tiah dar dia phan ngŏlah dia să dơ ñcau taih ? Dơ bol kòn klau bol khai dê ngŏlah dơ bol bơdìh ?” 26 Petro đơs: ‘‘Dơ bol bơdìh.” Kơnràñ Jesu đơs: ‘‘Be hơ̆, bol kòn klau ờ tă. 27 Mơya làng bol kòn ờ lơh gơtup tìs bol khai in, gen lòt tĕ hơ dà-lềng, cơm ndàr; kup ka lơi gơkăp lài; mơ hà bơr gơ, gen kòn rơp gŏ đong priă. Kòn ai gơ, jào tĕ bol khai in, Añ dê mơ kòn dê.”
