Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bol Jude lùp-jòi tềl bơh trồ
16 1 Bol Phariseo mơ bol Sadduseo tus mơ Kơnràñ Jesu, mơ làng tơlòng Kơnràñ, gen bol khai dăn Kơnràñ lơh bol khai in gŏ dùl nơm tềl bơh trồ. 2 Mơya hơ wơl, Kơnràñ đơs mơ bol khai: ‘‘Mho tus, bol mê đơs: ‘‘Gơrơp prăng, bơh trồ prơhê”; * 3 mơ àng drim, bol mê đơs: ‘‘Ngai do geh mìu càl, bơh trồ gơjŭ mbur”. Bol mê git đal rùp trồ dê, mơya ờ rơgơi git đal ală tềl sơnđio tŭ tơngai dê. 4 Jơi-nòi iơh-rơmơh mơ dri-bơrnàn lùp-jòi tềl, mơya rơp ờ ai bol khai in tềl lơi, mìng tềl Jona lơm.” Mơ lời bol khai, Kơnràñ lik-lòt.
Kañ bol Phariseo mơ bol Sadduseo
5 Tam tŭ tus đah bơtĭ ne, bol jăt-dờn huĭ cèng bañ. 6 Kơnràñ Jesu đơs mơ bol khai: ‘‘Rơcăng ngăc tĕ mơ prăp-gàr să tĕ bơh kañ bol Phariseo mơ bol Sadduseo dê.” 7 Bol khai tam kơlôi bal mơ đơs: ‘‘Tài bơh bol he ờ cèng bañ !” 8 Kơnràñ Jesu git be hơ̆ gen đơs: ‘‘Ơ bol ờ hoan pindờn, ñchi bơh tài bol kòn tam kơlôi bal lah tài bơh bol kòn ờ geh bañ taih ? 9 Bol kòn ờ hềt wă mơ krung ờ kah wơl prăm nơm bañ prăm rơbô nă cau in, mơ bol kòn neh tơrgùm nđờ bài taih ? 10 Mơ poh nơm bañ poan rơbô nă cau in, mơ bol kòn neh tơrgùm nđờ bài dờng taih ? 11 Mbe bol kòn ờ wă lah ờ di gơrềng bơh bañ mơ Añ neh đơs mơ bol kòn ờ ? Mơya prăp-gàr să tĕ bơh kañ bol Phariseo mơ bol Sadduseo dê.” 12 Tŭ hơ̆, bol khai wă lah Kơnràñ ờ đơs pal prăp-gàr să bơh kañ bañ dê, mơya bơh jơnau bơto bol Phariseo mơ bol Sadduseo dê.
Petro yal-tơlik Kơnràñ Jesu lah Kòn Yàng dê
13 Kơnràñ Jesu tus tam kơnhoàl Serarea Philippe dê, mơ lùp bol jăt-dờn Khai dê mơ đơs: ‘‘Cau đơs Kòn kòn-bơnus lah ñcau taih ?” 14 Bol khai đơs: ‘‘Cau bà đơs lah Joan Baptista, cau bà đơs lah Elia, cau bà tai đơs lah Jeremia, ngŏlah dùl nă tam bol ala-bơr.” 15 Kơnràñ đơs mơ bol khai: ‘‘Ai bol kòn đơs Añ lah ñcau taih ?” 16 Simon Petro hơ mơ đơs: ‘‘Đi lah Kristo, Kòn Yàng kis sùm dê.” 17 Kơnràñ Jesu hơ mơ đơs mơ khai: ‘‘Bơtoah kòn in, ơ Simon Barjona, kơyoa ờ di poăc mơ mhàm neh sơnđio-tơlik kòn in, mơya lah Bàp Añ, Bơtau ơm tam trồ. 18 Añ đơs mơ kòn: Kòn lah Petro, mơ hơđăng lŭ do, Añ rơp băc-bơtào Pơrjum-niăm Añ dê; mơ ală mpồng brah-tìng ờ jai-pha mơ gơ. * 19 Añ rơp ai kòn in ală kơrnal lơgar trồ; bơta lơi kòn kơt tam tiah, gen krung rơp geh kơt tam trồ, mơ bơta lơi kòn hồ tam tiah, gen krung rơp geh hồ tam trồ sơl.” 20 Tŭ hơ̆, Kơnràñ Jesu sồr bol jăt-dờn bañ yal cau lơi in git Kơnràñ lah Kristo.
Kơnràñ Jesu yal lài dơ̆ dùl bơta jê-yăn Khai dê
21 Bơh tŭ hơ̆, Kơnràñ Jesu sơntờm yal bol jăt-dờn Khai dê in git lah Khai pal lòt tus tam Jerusalem mơ kong oă bơta jê-yăn bơh bol kuang kra, bol ăt-bồ bol lơh-yàng dê, mơ bol gơnoar-cih, kong gơsơt mơ ngai pe kis wơl. 22 Petro hoài Kơnràñ tus mơ khai, sơntờm lah-pơrhơng Kơnràñ mơ đơs: ‘‘Đi ờ wai, ơ Kơnràñ; Đi rơp ờ gŏ be hơ̆.” 23 Kơnràñ wơlke đơs mơ Petro: ‘‘Ruc tĕ tơnơ̆ Añ, ơ Satan ! Mê lah kai gơtup tìs Añ in, bơh mê ờ kơlôi ală bơta Yàng dê, mơya ală bơta kòn-bơnus dê lơm !”
Bơta pal geh làng jăt Kơnràñ Jesu
24 Tŭ hơ̆, Kơnràñ Jesu đơs mơ bol jăt-dờn Khai dê: ‘‘Dilah cau lơi kờñ jăt Añ, gen pal săng-lời să tờm, tui chikal he dê mơ jăt Añ. 25 Kơyoa cau lơi kờñ tơngklàs bơta kis he dê, gen rơp roh gơ; mơya cau lơi kong roh bơta kis he dê tài bơh Añ, gen rơp bàn wơl gơ. 26 Kơyoa ñchi kuơ cau in, dilah geh jơh dunia, mơya kong roh bơta kis he dê ? Ngŏlah cau rơp ai chi lơi tamgơl mơ bơta kis he dê ? 27 Kơyoa Kòn kòn-bơnus rơp tus tam bơta gơklŏ Bàp Khai dê bal mơ ală huềng-duh Khai dê, mơ tŭ hơ̆, Khai rơp ai wơl kờp nă cau in jăt be ală broă bol khai dê. 28 Di ngăn, Añ đơs mơ bol kòn: Geh bol cau tam ală cau găm ntào tềng do, ờ tiăm bơta chơt, jơl tus tŭ gŏ Kòn kòn-bơnus tus tam lơgar Khai dê.”
