Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Tam pơndăng gơrềng bơh jơnau bơhiàn
15 1 Tŭ hơ̆, geh bol Phariseo mơ bol gơnoar-cih bơh Jerusalem tus hơ Kơnràñ Jesu mơ đơs: 2 ‘‘Ñchi gơlơh bol jăt-dờn Đi dê lơh tìs dơ jơnau bơhiàn ală cau yau dê taih ? Bơh bol khai ờ rào tê tŭ sào-sa.” 3 Hơ wơl, Kơnràñ đơs mơ bol khai: ‘‘Ai bol mê, ñchi gơlơh bol mê lơh tìs dơ jơnau sồr Yàng dê tài bơh jơnau bơhiàn bol mê dê taih ? 4 Kơyoa Yàng neh đơs: ‘‘Mê dờn-duh tĕ bàp mê mơ mè mê”, mơ: ‘‘Cau lơi yal-iơh bàp ngŏlah mè, gen pal kong chơt.” 5 Ai bol mê đơs: ‘‘Cau lơi đơs mơ bàp ngŏlah mè: Bơta lơi rơp dờp-geh bơh añ, gen lah phan pơdơng, 6 gen cau hơ̆ rơp ờ dờn-duh bàp tai”; be hơ̆, bol mê neh lơh jơnau Yàng dê gơlik be gời tài bơh jơnau bơhiàn bol mê dê. 7 Ơ bol blăc-să ! Isaia neh đơs ala-bơr di ngăn gơrềng bơh bol mê lah :
8 ‘‘Làng-bol do dờn-duh Añ mơ sơndồi bơr, mơya nùs bol khai ngài mơ Añ;
9 bol khai duh-khoai Añ lah ờ kuơ, bơh ală jơnau bol khai bơto mìng lah ală jơnau sồr-lăm kòn-bơnus dê.”‘‘
Chi lơi lơh bơ̆-bơl cau in ?
10 Gen Kơnràñ hòi mpồl làng-bol tus hơ Kơnràñ, mơ đơs mơ bol khai: ‘‘Iăt mơ wă tĕ: 11 Ờ di phan mut tam bơr lơh bơ̆-bơl cau in; mơya phan lik bơh dơ bơr, gơ hơ̆ lơh bơ̆-bơl cau in !”
12 Tŭ hơ̆, bol jăt-dờn tus đơs mơ Kơnràñ: ‘‘Đi git lah bol Phariseo kơno jơnau hơ̆ gen gơtup tìs sơl ờ ?” 13 Kơnràñ hơ mơ đơs: ‘‘Chi lơi mơ Bàp Añ tam trồ neh ờ tăm, gen rơp kong dus. 14 Lời dò tĕ bol khai: bol khai lah bol jơngo, gơs cau lăm gùng bol jơngo dê. Dilah cau jơngo lăm cau jơngo, gen jơh bàr rơp dùh tam tơrluh.” 15 Hơ wơl, Petro đơs mơ Kơnràñ: ‘‘Dăn Đi yal-mblàng jơnau pơniơu hơ̆ bol kòn in.” 16 Kơnràñ đơs: ‘‘Jơl tus tŭ do mơ bol kòn krung ờ git-wă sơl ơ ? 17 Bol kòn ờ wă lah phan lơi mut tam bơr, gen mù tam kơndul, mơ kong tơlik hơ bơdìh ơ ? 18 Mơya ală bơta lik bơh dơ bơr, gen lah gơlik bơh tam nùs, mơ ală bơta hơ̆ lơh bơ̆-bơl cau in. 19 Kơyoa bơh tam nùs gơlik ală bơta kơlôi iơh, gơsơt cau, dri-bơrnàn, tung-kơñau, lơh cơng blăc mơ tràl-sơrbil. 20 Hơ̆ lah ală bơta lơh bơ̆-bơl cau in; mơya sa mơ tê ờ rào ờ lơh bơ̆-bơl cau in.”
Kơnràñ Jesu tơmbời kòn ùr cau ùr Kanaan dê
21 Mơ lik bơh tềng hơ̆, Kơnràñ Jesu pleh lòt tam kơnhoàl Tyro mơ Sidon. 22 Mơ do, dùl nă cau ùr Kanaan lik bơh tiah hơ̆, hòi-nggà mơ đơs: ‘‘Dăn Đi nđàc-sơngit añ, ơ Kơnràñ, kòn Davit dê ! Kòn ùr añ kong cà lơh bòl-glar ngăn.” 23 Kơnràñ ờ hơ mơ khai dùl bơr lơi.
Bol jăt-dờn Kơnràñ dê tus dăn Kơnràñ mơ đơs: ‘‘Dăn Đi sồr khai rê, bơh khai hòi-nggà bơh tơnơ̆ bol he.” 24 Kơnràñ hơ mơ đơs: ‘‘Añ neh geh pơyoa tus mìng dơ ală belàt nrah gùng hìu Israel dê lơm.” 25 Mơya cau ùr tus cùn-khoai Kơnràñ mơ đơs: ‘‘Ơ Kơnràñ, dăn dong-kờl añ !” * 26 Kơnràñ hơ mơ đơs: ‘‘Ờ di ai bañ oh kòn dê mơ cơm ală so kòn in.” 27 Cau ùr đơs: ‘‘Ngăn, ơ Kơnràñ, bulah be hơ̆ ală so kòn krung geh sa ală pet pìng bơh cơnờng sào bol cau tờm gơ dê.” 28 Tŭ hơ̆, hơ wơl, Kơnràñ Jesu đơs mơ khai: ‘‘Ơ cau ùr, bơta pindờn ai dê dờng ngăn ! Gơs tĕ ai in be ai kờñ.” Mơ kòn ùr khai dê geh bời bơh dơ jiờ hơ̆.
Kơnràñ Jesu tơmbời rà cau kòp-jê dơ gah dà-lềng Galilea
29 Mơ bơh tiah hơ̆, Kơnràñ Jesu lòt tus dơ gah dà-lềng Galilea, guh hơđăng bơnơm mơ nggui tềng hơ̆. 30 Ală mpồl làng-bol gal tus hơ Kơnràñ, cèng bal mơ bol khai bol kuet-kơlte, bol jơngo, bol pă-le, bol kloat, mơ gal cau kòp-jê ndai, mơ lời bol khai dơ jơng Kơnràñ, mơ Kơnràñ tơmbời bol khai in, 31 tiăn tus mpồl làng-bol ai lơh krơi dơ̆ gŏ bol kloat đơs, bol pă-le bời, bol kuet-kơlte lòt, bol jơngo gŏ. Mơ bol khai jờngrơ Yàng Israel dê.
Kơnràñ Jesu lơh bañ gơs rà dơ̆ bàr
32 Kơnràñ Jesu hòi bol jăt-dờn Khai dê tus mơ đơs: ‘‘Añ nđàc-sơngit mpồl làng-bol, tài bơh neh pe ngai rau bol khai ơm sùm mơ Añ, mơ ờ geh chi lơi sa; Añ ờ kờñ lời bol khai rê jơgloh, ngòt bol khai huời tam gùng.” 33 Bol jăt-dờn đơs mơ Kơnràñ: ‘‘Tam tiah ngềt- ngơt, mbơh bol he geh tơl bañ làng siăm hờm mpồl làng-bol gal be hơ̆ taih ?” 34 Kơnràñ Jesu đơs mơ bol khai: ‘‘Bol kòn geh nđờ nơm bañ taih ?” Bol khai đơs mơ Kơnràñ: ‘‘Poh nơm bañ mơ dŭt ka dêt.” 35 Kơnràñ sồr mpồl làng-bol nggui dơ ù; 36 mơ Kơnràñ dờp poh nơm bañ mơ ka, ưn-ngài, pet gơ, ai bol jăt-dờn in, mơ bol jăt-dờn ai ală mpồl làng-bol in.” 37 Jơh tơl nă sa mơ hờm; ai ală pet jơngkah, gen bol khai tơrgùm bềng poh nơm bài dờng. 38 Cau sa lah poan rơbô nă, ờ kờp bol cau ùr mơ kơnòm. 39 Lồc ai ală mpồl làng-bol in rê, Kơnràñ hào ahò mơ tus hơ kơnhoàl Magađan.
