Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơtau Herode mơ Kơnràñ Jesu
14 * 1 Tŭ hơ̆, bơtau Herode kơno tiơng-pơnrơ Kơnràñ Jesu dê, 2 gen đơs mơ bol dong-broă khai dê: ‘‘Do lah Joan Baptista ; khai neh kis wơl bơh bol cau chơt, gen tàng ală broă pràn-gơnoar lơh broă tam khai.”
Joan Baptista kong koh bồ
3 Kơyoa Herode neh kup Joan, kơt khai mơ tơmut tam hìu jàm, tài bơh Herodiade lah bao ùr Philippe dê, bi khai. 4 Bơh Joan neh đơs mơ khai: ‘‘Ồng ờ di bao mơ ùr hơ̆.” 5 Herode kờñ gơsơt Joan, mơya ngòt làng-bol, bơh làng-bol sền khai be cau ala-bơr. 6 Di tòm ngai deh Herode, kòn ùr Herodiade dê neh tamya tam gùl cau, mơ neh lơh chờ nùs Herode, 7 bơh hơ̆, Herode neh sơntơm să hơ ai khai in bơta lơi khai dăn. 8 Bơh mè khai sồr lài, gen khai đơs: ‘‘Dăn ồng ai añ in tềng do, bồ Joan Baptista ơn tam preng.” 9 Bơtau moăt-jrùng, mơya tài bơh jơnau sơntơm să, mơ bơh bol cau ñô-sa bal, gen khai sồr ai, 10 mơ sồr lòt koh bồ Joan tam hìu jàm; 11 cau ơn bồ Joan tam preng, cèng tus, mơ ai kòn ùr in, mơ khai cèng mè khai in. 12 Bol jăt-dờn Joan dê tus ai bồc mơ tơp, mơ lòt yal Kơnràñ Jesu in.
Kơnràñ Jesu lơh bañ gơs rà dơ̆ dùl
13 Tŭ Kơnràñ Jesu kơno jơnau hơ̆, gen Khai lời tiah hơ̆, hào ahò tus tam tiah ngềt-ngơt, is dùl bă; mơ tŭ ală mpồl làng-bol kơno, gen bơh tam ală bòn dờng, lòt jơng jăt Kơnràñ. 14 Kơnràñ lik bơh ahò, gŏ mpồl làng-bol gal, gen nđàc-sơngit bol khai mơ tơmbời ală cau kòp-jê bol khai dê. 15 Mho tus, bol jăt-dờn tus đơs mơ Kơnràñ: ‘‘Tiah do ngềt-ngơt mơ trồ neh mho rau; dăn Đi lời ală mpồl làng-bol rê, làng bol khai lòt tus tam ală bòn blơi phan sa bol khai in.” 16 Kơnràñ Jesu đơs mơ bol jăt-dờn: ‘‘Bol khai ờ duh lòt; bol kòn ai tĕ bol khai in sa.” 17 Bol jăt-dờn đơs mơ Kơnràñ: ‘‘Tam do, bol kòn mìng geh prăm nơm bañ mơ bàr nơm ka lơm.” 18 Kơnràñ đơs: ‘‘Cèng tĕ gơ gen Añ in ndo.” 19 Mơ tŭ neh sồr ală mpồl làng-bol nggui hơđăng ñhơt, Kơnràñ dờp prăm nơm bañ mơ bàr nơm ka, tơngờ hơ trồ, yalniăm, pet mơ ai bañ bol jăt-dờn in, mơ bol jăt-dờn ai ală mpồl làng-bol in. 20 Jơh tơl nă sa mơ hờm; mơ cau tơrgùm ală pet jơngkah bềng jơt bàr nơm bài. 21 Khà cau sa pơgăp prăm rơbô nă cau klau, ờ kờp cau ùr mơ kơnòm.
Kơnràñ Jesu lòt hơđăng dà
22 Tŭ hơ̆ mơ, Kơnràñ sồr bol jăt-dờn hào ahò, tiă lài đah bơtĭ ne, tam tŭ Kơnràñ ai ală mpồl làng-bol in rê. 23 Mơ neh ai ală mpồl làng-bol in rê rau, gen Kơnràñ guh is hơđăng bơnơm răc dăn. Mho tus, Kơnràñ ơm is tềng hơ̆.
24 Tŭ hơ̆, ahò neh lòt ngài bơh gah dà rà kơi-sồ, kong dà pồt lơnggăc, bơh càl khồm dră. 25 Tus dơ jiờ drơng măng dơ̆ poan, Kơnràñ lòt hơđăng dà-lềng tus mơ bol khai. 26 Dơ̆ bol jăt-dờn gŏ Kơnràñ lòt hơđăng dà-lềng, gen bol khai nrơt-nre mơ đơs: ‘‘Ne cà !”, mơ bơh rơngòt-rơngơt, bol khai nggà. 27 Tŭ hơ̆ mơ, Kơnràñ Jesu đơs mơ bol khai: ‘‘Kơ̆ tĕ nùs, Añ do, bañ ngòt !” 28 Hơ wơl, Petro đơs mơ Kơnràñ: ‘‘Ơ Kơnràñ, dilah ngăn lah Đi, dăn Đi sồr kòn lòt hơđăng dà tus mơ Đi.” 29 Kơnràñ đơs: ‘‘Lòt tĕ !” Petro mù bơh ahò, cơnđoà lòt hơđăng dà tus mơ Kơnràñ Jesu. 30 Mơya gŏ càl khồm pràn, khai ngòt, mơ tài bơh sơntờm gơkrăm, gen khai hòi-nggà mơ đơs: ‘‘Ơ Kơnràñ, dăn tơngklàs kòn !” 31 Tŭ hơ̆ mơ, Kơnràñ Jesu ai tê sơmbăt khai mơ đơs mơ khai: ‘‘Ơ cau ờ hoan pindờn, ñchi gơlơh mê pin wi-wơ ?” 32 Tŭ bol khai neh guh tam ahò, gen càl ơm dơh. 33 Ală cau tam ahò cùn-khoai Kơnràñ mơ đơs: ‘‘Ngăn, Đi lah Kòn Yàng dê !”
Kơnràñ Jesu tơmbời jơh ală cau kòp-jê tam Gennesaret
34 Tŭ neh tiă dà-lềng rau, gen bol khai tus tam tiah Gennesaret. 35 Mơ tŭ bol cau tiah hơ̆ đal-git Kơnràñ, gen bol khai sồr yal tam jơh kơnhoàl hơ̆, mơ cau cèng tus Kơnràñ in jơh ală cau kòp-jê, 36 dăn Kơnràñ ai bol khai in mìng bư dơ tiăng ào Kơnràñ dê lơm; mơ cau lơi neh bư gen geh tơmbời.
