Jơnau Yalniam Mattheo-Pơnah 13

2. Jơnau bơto mơ jơnau pơniơu

Jơnau lăm-mut

13 1 Tam ngai hơ̆, Kơnràñ Jesu lik bơh hìu, lòt nggui dơ gah dà-lềng; 2 mơ ală mpồl làng-bol gal pơrjum bal tus mơ Khai, tiăn tus Khai pal hào nggui tam ahò, ai jơh mpồl làng-bol ntào dơ kềng dà. 3 Mơ Kơnràñ ai ală jơnau pơniơu đơs rà bơta mơ bol khai:

Jơnau pơniơu cau sih gar sơntìl

“‘Do, cau sih gar sơntìl lik-lòt sih. 4 Tam tŭ khai sih, gen geh ală gar rung dơ gah gùng, mơ ală sềm tus sa jơh. 5 Geh ală gar rung tam tiah lŭ, tềng hơ̆ ờ geh oă ù, gơ hòn mơ, bơh gơ ờ geh ù jrô; 6 mơya tŭ măt tơngai lik, gơ ñòp, mơ bơh ờ geh rias, gen gơ ro. 7 Geh ală gar rung tam lò, mơ lò gơhòn gơrềt gơ. 8 Ai ală gar rung tam ù niăm, gen gơlik plai:  gar bà dùl rơhiăng, gar bà prau jơt, gar bà pe jơt. 9 Cau lơi geh tồr, gen iăt tĕ !”

Ñchi bơh tài Kơnràñ Jesu ngui ală jơnau pơniơu làng đơs ?

10 Bol jăt-dờn tus đơs mơ Kơnràñ: ‘‘Ñchi bơh tài Đi ngui ală jơnau pơniơu đơs mơ bol khai taih ?” 11 Hơ wơl, Kơnràñ đơs mơ bol khai: ‘‘Neh ai bol kòn in git ală bơta ndơp-ndơr lơgar trồ dê, mơya ờ ai bol khai in. 12 Bơh cau lơi geh, gen rơp ai khai in tai, mơ khai rơp geh jơngkah-jơngkañ; mơya cau lơi ờ geh, gen bơta khai geh, krung rơp tă bơh dơ khai. 13 Gen tàng, Añ ngui ală jơnau pơniơu đơs mơ bol khai, kơyoa bol khai sền mơ ờ sền, bol khai iăt mơ ờ iăt, mơ krung ờ wă; 14 mơ gơlik di ngăn bol khai in jơnau ala-bơr Isaia dê đơs:

‘‘Bol mê iăt mơ iăt tai mơ ờ wă, bol mê sền mơ sền tai mơ ờ gŏ.

15 Bơh nùs làng-bol do neh kră-kơldăng, bol khai neh ñjơ̆ tồr mơ neh ñềm măt, mbài dơ̆ măt bol khai gŏ, tồr bol khai iăt, nùs bol khai wă, mơ bol khai rê wơl, mơ Añ tơmbời bol khai.”

16 Bơtoah măt bol kòn in bơh neh gŏ, tồr bol kòn in bơh neh iăt. 17 Di ngăn, Añ đơs mơ bol kòn: Gal cau ala-bơr mơ cau song-dơpă kờñ gŏ ală bơta bol kòn gŏ mơ neh ờ gŏ, iăt ală bơta bol kòn iăt mơ neh ờ iăt !

Mblàng jơnau pơniơu cau sih gar sơntìl

18 Gen bol kòn iăt tĕ jơnau pơniơu cau sih gar sơntìl. 19 Cau lơi iăt jơnau đơs lơgar dê mơ ờ wă, gen cà iơh tus pìt-phà bơta neh sih tam nùs khai; hơ̆ lah cau neh geh sih dơ gah gùng. 20 Cau neh geh sih hơđăng tiah lŭ, hơ̆ lah cau iăt jơnau đơs, gen chờhờp dờp mơ; 21 mơya khai ờ geh rias tam khai, mìng lah cau dùl thoa lơm; tàng tŭ gơlik bơta kòl-yăn ngŏlah bơta kup-kuăn tài bơh jơnau đơs, gen khai gơtup tìs mơ. 22 Cau neh geh sih tam lò, hơ̆ lah cau iăt jơnau đơs, mơya bơta kơlôi-kơnòl rài do dê mơ bơta pơrlồm bơta pas-sơm dê lơh gơrềt jơnau đơs, tàng lơh ờ gơlik plai. 23 Ai cau neh geh sih tam ù niăm, hơ̆ lah cau iăt jơnau đơs mơ wă, mơ lơh gơlik plai, lơh gơ gơs bà dùl rơhiăng, bà prau jơt, bà pe jơt.”

Jơnau pơniơu ñhơt cèo

24 Kơnràñ ai jơnau pơniơu ndai đơs mơ bol khai: ‘‘Lơgar trồ ndrờm be dùl nă cau sih gar niăm tam sre he dê. 25 Tam tŭ ală cau bic, gen cau sò-tơm khai dê tus sih ñhơt cèo hơđăng, tam gùl kòi mơ lik-lòt. 26 Tŭ kòi neh hòn mơ gơlik plai, gen tŭ hơ̆ krung gŏ gơlik ñhơt cèo. 27 Bol duh-broă cau tờm hìu dê tus đơs mơ khai: ‘‘Ơ ồng, ờ di ồng neh sih gar niăm tam sre ồng dê ơ ? Be hơ̆ mbơh geh ñhơt cèo taih ?” 28 Cau tờm đơs mơ bol khai: ‘‘Cau sò-tơm neh lơh bơta hơ̆.” Bol duh-broă đơs mơ khai : ‘‘Ồng kờñ bol hi lòt tơrgùm gơ ờ ?” 29 Khai đơs: ‘‘Ờ; ngòt dơ̆ tơrgùm ñhơt cèo, bol mê krung dus kòi bal mơ gơ, 30 lời tĕ jơh bàr dờng bal jơl tus kàl tơwès. Tam tŭ tơwès, añ rơp đơs mơ bol tơwès: Lài jơh tơrgùm tĕ ñhơt cèo, căp gơs ală tơrñăp làng chu gơ, ai kòi, gen tơrgùm prăp tĕ tam đăm añ dê.”‘‘

Jơnau pơniơu gar sơbê

31 Kơnràñ ai jơnau pơniơu ndai đơs mơ bol khai: ‘‘Lơgar trồ ndrờm be gar sơbê, cau ai sih tam sre he dê. 32 Gar do dêt-rơhền rơlau mơ jơh ală gar; mơya tŭ gơ neh hòn, gen gơ dờng rơlau mơ ală biăp, mơ gơs tờm chi, tiăn tus sềm tam trồ tus ơm tam ală ntê gơ dê.”

Jơnau pơniơu kañ tam kơmbuh phe

33 Kơnràñ đơs jơnau pơniơu ndai mơ bol khai: ‘‘Lơgar trồ ndrờm be kañ, cau ùr ne ai srŭ tam pe kơrnăc kơmbuh phe, jơl tus tŭ gơprồ làm jơh.”

Ñchi bơh tài Kơnràñ Jesu ngui ală jơnau pơniơu đơs ?

34 Jơh ală bơta hơ̆, Kơnràñ Jesu ngui ală jơnau pơniơu đơs mơ ală mpồl làng-bol; mơ Kơnràñ ờ đơs chi lơi mơ bol khai mơ ờ ngui ală jơnau pơniơu, 35 làng gơlik di ngăn jơnau cau ala-bơr neh đơs:

‘‘Añ rơp pờ bơr đơs ală jơnau pơniơu, yal-tơlik ală bơta pồn-ndơp bơh tŭ crơng-gơs dunia.”

Mblàng jơnau pơniơu ñhơt cèo

36 Tŭ hơ̆, lời ală mpồl làng-bol, Kơnràñ tus tam hìu, mơ bol jăt-dờn Kơnràñ dê tus đơs mơ Khai: ‘‘Dăn Đi yal-mblàng bol kòn in jơnau pơniơu ñhơt cèo tam sre.” 37 Kơnràñ hơ mơ đơs: ‘‘Cau sih gar niăm lah Kòn kòn-bơnus; 38 sre lah dunia; gar niăm lah oh kòn lơgar dê, ñhơt cèo lah oh kòn cà iơh dê; 39 Cau sò-tơm neh sih gơ lah cà; ai kàl tơwès lah ngai lồi-dut dunia; bol tơwès lah bol huềng-duh. 40 Gen tàng, be ñhơt cèo kong tơrgùm mơ chu tam ồs, gen krung be hơ̆ sơl tam ngai lồi-dut dunia: 41 Kòn kòn-bơnus rơp pơyoa bol huềng-duh Khai dê, mơ bol khai rơp tơrgùm mơ tơlik bơh lơgar Khai dê, jơh ală bơta lơh gơtup tìs mơ jơh ală cau lơh bơta iơh-rơmơh, 42 mơ sơrbì bol khai tam brong ồs; tềng hơ̆ rơp geh bơta ñìm-răc mơ rơkiăt sề. 43 Tŭ hơ̆, bol song-dơpă rơp àng-gơcrà be măt tơngai tam lơgar Bàp bol khai dê. Cau lơi geh tồr, gen iăt tĕ !

Jơnau pơniơu phan màng mơ lŭ màng

44 Lơgar trồ ndrờm be phan màng pồn tam sre; dùl nă cau bàn, gen pơndơp mơ hờn-chờ lòt tăc jơh tơl bơta khai geh, mơ blơi sre hơ̆.

45 Mơ tai, lơgar trồ ndrờm be cau kă-bro jòi ală lŭ màng niăm. 46 Neh bàn dùl nai lŭ màng ngăn, gen khai lik-lòt, tăc jơh ală bơta khai geh, mơ blơi gơ.

Jơnau pơniơu bơrtơng

47 Mơ tai, lơgar trồ ndrờm be bơrtơng dăng tam dà-lềng, mơ tơrgùm jơh tơl jơi ka; 48 dơ̆ bơrtơng neh bềng rau, cau hoài hơ gah dà, mơ nggui rơwah ală ka niăm ơn tam bài, ai ală ka iơh săng-sơrbì hơ bơdìh. 49 Krung be hơ̆ sơl, tam ngai lồi-dut dunia: bol huềng-duh rơp lik-lòt mơ cah is bol iơh-bơsăk bơh dơ gùl bol song-dơpă, 50 mơ sơrbì bol khai tam brong ồs, tềng hơ̆ rơp geh bơta ñìm-răc mơ rơkiăt sề.

Jơnau pơndut

51 Bol kòn wă jơh ală bơta hơ̆ ờ ?” Bol khai đơs mơ Kơnràñ: ‘‘Wă.” 52 Kơnràñ đơs mơ bol khai: ‘‘Gen tàng, jơh ală cau gơnoar-cih lơi neh geh bơsrăm gơrềng bơh lơgar trồ krung ndrờm be cau tờm hìu, tă-tơlik bơh tam đăm khai dê ală phan pa mơ ală phan yau.”

V. PƠRJUM-NIĂM, CƠNĐOÀ SƠNRỜP LƠGAR TRỒ DÊ

1. Bơnah cih-yal Kơnràñ Jesu tus tam Nazareth, bòn tờm Khai dê

53 Mơ gơlik gơs lah, tŭ Kơnràñ Jesu neh đơs ală jơnau pơniơu hơ̆ rau, gen Khai lik-lòt bơh tềng hơ̆. 54 Khai tus tam bòn tờm Khai dê, mơ yal-bơto bol khai tam hìu-pơrjum bol khai dê, tiăn tus bol khai ai lơh krơi mơ đơs: ‘‘Mbơh mơ cau do geh bơta jăk-chài mơ ală broă pràn-gơnoar taih ? 55 Cau do ờ di lah kòn cau chài lơh broă chi dê ơ ? Mè Khai ờ di sơnđăn lah Maria, mơ ală oh mi Khai dê ờ di lah Jakobe, Joseph, Simon mơ Juda ơ ? 56 Mơ ruh-lŏ Khai dê ờ di lah jơh ală cau tam gùl bol he sơl ơ ? Gen mbơh mơ cau do geh jơh ală bơta hơ̆ taih ?” 57 Mơ bol khai gơtup tìs bơh Kơnràñ. Mơya Kơnràñ Jesu đơs mơ bol khai: ‘‘Ờ geh cau ala-bơr lơi mơ ờ geh sền-màng, mìng tam bòn tờm mơ tam hìu khai dê lah ờ lơm.” 58 Mơ tềng hơ̆, Kơnràñ neh ờ lơh rà broă pràn-gơnoar, tài bơh bol khai ờ pindờn.