Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bol jăt-dờn pet ală nting kòi làng sa tam ngai sabbat
12 1 Tŭ hơ̆, di ngai sabbat, Kơnràñ Jesu lòt găn sre kòi; bol jăt-dờn Khai dê jơgloh mơ sơntờm pet ală nting kòi làng sa. 2 Bol Phariseo gŏ be hơ̆ gen đơs mơ Khai: ‘‘Ne, bol jăt-dờn Đi dê lơh bơta ờ geh lơh tam ngai sabbat.” 3 Mơya Kơnràñ đơs mơ bol khai: ‘‘Bol mê neh ờ đal bơta Davit neh lơh tŭ khai jơgloh, khai mơ bol cau ơm bal mơ khai ơ ? 4 Mbe lơi khai neh mut tam hìu Yàng dê mơ neh sa bañ pơdơng, lah bañ khai ờ geh sa, mơ bol cau ơm bal mơ khai krung ờ geh sa sơl, mơya mìng bol lơh-yàng lơm ? 5 Ngŏlah bol mê neh ờ đal tam Gùng boh-lăm lah, ngai sabbat, bol lơh-yàng tam hìu duh-khoai gơtup dơ ngai sabbat, mơ ờ kòl tìs sơl ơ ? 6 Mơya Añ đơs mơ bol mê lah, tềng do geh Bơtau dờng rơlau mơ hìu duh-khoai tai. 7 Dilah bol mê wă-wờng ñchi lah jơnau do: ‘‘Añ kờñ bơta nđàc-sơngit, mơ ờ kờñ phan lơh-yàng”, gen ờ tŭ lơi bol mê yal-glài bol cau ờ geh tìs. 8 Kơyoa Kòn kòn-bơnus lah Kơnràñ ngai sabbat dê.”
Kơnràñ Jesu tơmbời cau lơng tê tam ngai sabbat
9 Bơh tềng hơ̆, Kơnràñ lik-lòt, tus tam hìu- pơrjum bol khai dê; 10 mơ do, geh dùl nă cau lơng tê. Mơ bol khai lùp Kơnràñ lah: ‘‘Geh tơmbời tam ngai sabbat sơl ờ ?”, làng yă Kơnràñ. 11 Kơnràñ đơs mơ bol khai : ‘‘Cau lơi tam bol mê geh dùl nơm belàt lơm, mơ dilah gơdùh tam tơrluh tam ngai sabbat, mơ ờ sơmbăt mơ tơngguh gơ sơl ơ ? 12 Be hơ̆, kòn-bơnus găm màng rơlau mơ belàt git nđờ ! Gen tàng, geh lơh bơta niăm tam ngai sabbat.” 13 Tŭ hơ̆, Kơnràñ đơs mơ cau hơ̆: ‘‘Tơlik tĕ tê mê !” Cau hơ̆ tơlik tê, mơ tê hơ̆ geh pràn wơl be tê ne. 14 Lik-lòt, bol Phariseo bơyai bal tamdră mơ Kơnràñ, mbe lơh làng tơnroh Khai.
Kơnràñ Jesu, cau duh-broă Yàng dê
15 Kơnràñ Jesu git bơta hơ̆, gen pleh bơh tềng hơ̆. Geh gal cau jăt Kơnràñ, mơ Kơnràñ tơmbời jơh ală bol khai, 16 mơ đơs kràñ-cê mơ bol khai, bañ lơh cau lơi in git Kơnràñ, 17 làng gơlik di ngăn jơnau Isaia, cau ala-bơr, neh đơs:
18 ‘‘Do cau duh-broă Añ dê, lah cau Añ neh rơwah, cau gơboh Añ dê, lah cau di ngăn nùs Añ; Añ rơp ơn Nhơm Añ dê hơđăng Khai, mơ Khai rơp yal-pơnrơ bơta cah-rơña song-ring ală làng-bol bơdìh in.
19 Khai rơp ờ tamlah, ờ tơnggà, ờ cau lơi rơp kơno săp Khai tam gùng-dà.
20 Tờm proh neh bơcah, Khai ờ dơrkă, mơ che đèng găm ñhŭ, Khai ờ gơsơt, jơl tus tŭ Khai lơh bơta cah-rơña song-ring tus pha-jai;
21 mơ ală làng-bol bơdìh rơp kơnờm dơ sơnđăn Khai.”
Kơnràñ Jesu mơ Beelzebul, bơtau ală cà
22 Tŭ hơ̆, cau cèng tus Kơnràñ in dùl nă cau cà lơh, jơngo mơ kloat, Kơnràñ tơmbời cau hơ̆, tiăn tus cau kloat hơ̆ đơs mơ gŏ. 23 Jơh ală mpồl làng-bol ai lơh crih-crài mơ đơs: ‘‘Cau do ờ di lah kòn Davit ơ ?” * 24 Bol Phariseo kơno gen đơs: ‘‘Cau do bơtrơh cà kơnờm dơ Beelzebul, bơtau ală cà.”
25 Git ală jơnau kơlôi bol khai dê, Kơnràñ đơs mơ bol khai: ‘‘Lơgar lơi tamcah tamdră gơ dê, gen rơp kong tơrlah-tơrling, mơ jơh bòn dờng lơi ngŏlah hìu lơi tamcah tamdră gơ dê, gen rơp ờ ntào kơ̆ tai. 26 Dilah Satan bơtrơh Satan, gen gơ tamcah tamdră gơ dê; mbe lơh lơgar gơ dê rơp ntào kơ̆ taih ? 27 Dilah Añ kơnờm dơ Beelzebul làng bơtrơh cà, gen oh kòn bol mê kơnờm dơ cau lơi làng bơtrơh cà taih ? Gen tàng, tờm bol hơ̆ rơp gơs bol cah-rơña bol mê. 28 Mơya dilah Añ kơnờm dơ Nhơm Yàng dê làng bơtrơh cà, gen lơgar Yàng neh tus tam bol mê. 29 Ngŏlah mbe lơh cau lơi rơgơi mut tam hìu cau pràn-kơldăng mơ pìt-phà phan-bơna khai dê, dilah lài ờ kơt căp cau pràn-kơldăng ? Tŭ hơ̆ sòng pìt-phà hìu khai dê. 30 Cau ờ bal mơ Añ lah tamdră mơ Añ, mơ cau ờ tơrgùm bal mơ Añ lah lơh gơprah-gơpring.
31 Gen tàng, Añ đơs mơ bol mê : Jơh jơnau tìs mơ jơnau tràl-sơrbil rơp geh hồ kòn-bơnus in, ai jơnau tràl-sơrbil dơ Nhơm gen rơp ờ geh hồ. 32 Cau lơi đơs jơnau tamdră mơ Kòn kòn-bơnus, gen jơnau hơ̆ rơp geh hồ cau hơ̆ in; ai cau lơi đơs tamdră mơ Yàng Nhơm, gen jơnau hơ̆ rơp ờ geh hồ cau hơ̆ in, ờ tam rài do mơ krung ờ tam rài tơnơ̆ sơl.
Bơh nùs bềng lìu, gen bơr đơs
33 Lơh tĕ tờm chi gơs niăm, gen plai gơ dê rơp niăm; ngŏlah lơh tĕ tờm chi gơs iơh, gen plai gơ dê rơp iơh: bơh plai gen git chi. 34 Ơ nòi bơs rai, mbe lơh bol mê rơgơi đơs ală jơnau niăm, tŭ bol mê iơh ? Kơyoa bơh nùs bềng lìu, gen bơr đơs. 35 Cau niăm, bơh đăm niăm, tơlik ală bơta niăm; mơ cau iơh, bơh đăm iơh, tơlik ală bơta iơh. 36 Añ đơs mơ bol mê: Jơh jơnau ờ kuơ mơ cau đơs, gen cau rơp pal hơ bơr gơrềng bơh jơnau hơ̆ tam ngai cah-rơña: 37 kơyoa bơh ală jơnau đơs mê dê, mê rơp geh kờp lah song-dơpă; mơ bơh ală jơnau đơs mê dê, mê rơp kong yal-glài.”
Tềl krơi Jona, cau ala-bơr
38 Tŭ hơ̆, geh bàr pe nă cau gơnoar-cih mơ cau Phariseo hơ mơ đơs mơ Kơnràñ: ‘‘Ơ Pôgru, bol hi kờñ gŏ Đi lơh dùl tềl krơi.” 39 Hơ wơl, Kơnràñ đơs mơ bol khai: ‘‘Jơi-nòi iơh-rơmơh mơ dri-bơrnàn lùp-jòi tềl krơi; mơya rơp ờ ai bol khai in tềl krơi lơi, mìng tềl krơi Jona, cau ala-bơr lơm. 40 Kơyoa be Jona neh ơm tam kơndul me-dòng pe ngai pe măng be lơi, gen Kòn kòn-bơnus krung rơp ơm tam kơnàng ù pe ngai pe măng be hơ̆ sơl. 41 Tam tŭ cah-rơña, bol Ninive rơp ñă-ntào mơ jơi-nòi do, mơ yal-glài bol khai, bơh bol hơ̆ neh ềng-màl tam tŭ Jona yal-bơto; mơya ndo, găm rơlau mơ Jona tai ! 42 Tam tŭ cah-rơña, ùr-bơtau đah jum rơp ñă-ntào mơ jơi-nòi do, mơ yal-glài bol khai, bơh khai neh bơh lồi-dut ù-tiah, tus iăt bơta jăk-chài Salomon dê; mơya ndo, găm rơlau mơ Salomon tai !
Huềng bơ̆-bơl rê wơl
43 Dơ̆ huềng bơ̆-bơl lik bơh dùl nă cau, gen gơ lòt làm ală tiah rañ-rơdàng, jòi anih rơlô bòl, mơya ờ bàn. 44 Tŭ hơ̆, gơ đơs: ‘‘Añ rơp rê wơl hơ hìu añ dê, mơ bơh nhơ̆ añ neh lik-lòt”; mơ dơ̆ tus, gơ gŏ hìu lời soh, neh pơs-wàs mơ rơndăp niăm. 45 Tŭ hơ̆, gơ lòt tai, cèng tus bal mơ gơ poh huềng-iơh ndai iơh rơlau mơ gơ, mơ bol gơ mut ơm tam hơ̆; mơ ală bơta lồi-dut cau hơ̆ dê gơs iơh rơlau mơ lài. Jơi-nòi bơ̆-bơl do krung rơp gơs be hơ̆ sơl.”
Ñcau lah mè mơ oh mi Kơnràñ Jesu dê ?
* 46 Kơnràñ găm đơs mơ ală mpồl làng-bol, gen do, mè mơ ală oh mi Khai ntào hơ bơdìh, jòi boh-bơr mơ Khai. 47 Geh cau yal mơ Khai: ‘‘Do, mè Đi mơ ală oh mi Đi ntào hơ bơdìh, jòi boh-bơr mơ Đi.” 48 Hơ wơl, Kơnràñ đơs mơ cau yal mơ Khai: ‘‘Ñcau lah mè Añ, mơ ñcau lah ală oh mi Añ taih ?” 49 Mơ ai tê sơnđio bol jăt-dờn Khai dê, Khai đơs: ‘‘Do lah mè Añ mơ ală oh mi Añ. 50 Kơyoa cau lơi lơh jăt nùs-kờñ Bàp Añ dê, Bơtau ơm tam trồ, gen cau hơ̆ lah oh mi, ruh-lŏ mơ mè Añ.”
