Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
IV BƠTA NDƠP-NDƠR LƠGAR TRỒ
1. Bơnah cih-yal
Jơnau lăm-mut
11 1 Mơ gơlik gơs lah, tŭ Kơnràñ Jesu neh lồc bơto-sồr Jơt Bàr nă cau jăt-dờn Khai dê, gen bơh tềng hơ̆ Khai lik-lòt, làng bơto mơ yal-pơnrơ tam ală bòn dờng bol khai dê.
Jơnau lùp Joan Baptista dê mơ jơnau hơ wơl Kơnràñ Jesu dê
2 Joan ơm tam hìu jàm, tŭ kơno ală broă Kơnràñ Kristo dê, gen pơyoa bol jăt-dờn khai tus, 3 mơ đơs mơ Kơnràñ: ‘‘Đi lah Bơtau pal tus ờ, ngŏlah bol hi pal kơp cau ndai ?” 4 Hơ wơl, Kơnràñ Jesu đơs mơ bol khai: ‘‘Bol mê lòt yal tĕ Joan in ală bơta bol mê kơno mơ gŏ: 5 bol jơngo gŏ, bol pă lòt, bol lut-dun geh lơh goh, bol tĭ kơno, bol chơt kis wơl, bol rơbah geh yal Jơnau Yal Niăm; 6 mơ bơtoah cau ờ gơtup tìs tài bơh Añ.” 7 Dơ̆ bol khai neh lik-lòt, Kơnràñ Jesu sơntờm đơs mơ ală mpồl làng-bol gơrềng bơh Joan: ‘‘Ñchi bol mê neh lik-lòt sền tam blàng bràs taih ? Tờm proh kong càl lơh ơwañ ơ ? 8 Gen ñchi bol mê neh lik-lòt sền taih ? Cau soh ào biài lơbơn ơ ? Do, bol cau soh ào biài lơbơn, gen ơm tam hìu bol bơtau. 9 Gen ñchi bol mê neh lik-lòt sền taih ? Cau ala-bơr ơ ? Ngăn, Añ đơs mơ bol mê, rơlau mơ cau ala-bơr tai. 10 Do lah cau mơ gơrềng bơh khai neh geh cih:
‘‘Do Añ pơyoa huềng-duh Añ dê lòt dơđăp măt mê, khai rơp rơcăng gùng mê dê dơđăp mê.”
* 11 Di ngăn, Añ đơs mơ bol mê: Tam gùl bol cau deh bơh cau ùr, ờ geh cau lơi neh gơguh dờng rơlau mơ Joan Baptista; mơya cau dêt rơlau tam lơgar trồ, gen dờng rơlau mơ khai. 12 Bơh ală ngai Joan Baptista dê jơl tus tŭ do, lơgar trồ kong ơm hơđơm bơta pràn-kơldăng, mơ bol cau pràn-kơldăng sơmbrơt gơ. 13 Kơyoa jơh ală Cau ala-bơr mơ Gùng boh-lăm neh đơs ala-bơr jơl tus Joan; 14 mơ dilah bol mê kờñ dờn, gen tờm khai lah Elia, lah cau pal tus. 15 Cau lơi geh tồr, gen iăt tĕ !
Kơnràñ Jesu pơndrờm rơnàng Khai dê
* 16 Añ rơp pơndrờm jơi-nòi do mơ ñcau taih ?
Bol khai ndrờm be bol kơnòm nggui tam drà, hòi-nggà bol rơh-nrăng 17 mơ đơs: ‘‘Bol hi neh uh kơwào bol mê in, mơ bol mê ờ tamya; bol hi neh rơnđơh-rơnđềng, mơ bol mê ờ tur ntơh.”
18 Kơyoa Joan neh tus, ờ sào ờ ñô, gen bol khai đơs: ‘‘Khai kong cà lơh !”; 19 Kòn kòn-bơnus tus, sào sơl ñô sơl, gen bol khai đơs: ‘‘Do cau jròk sa jròk ñô, bơyô bol dar dia mơ bol tìs-glài dê !” Mơya bơta jăk-chài geh bơsong bơh ală broă gơ dê.”
Dồn-sa ală bòn dờng in neh gŏ ală broă pràn-gơnoar mơ ờ ềng-màl
20 Tŭ hơ̆, Kơnràñ sơntờm lah-pơrhơng ală bòn dờng, mơ tam hơ̆ Khai neh lơh rà ngăn broă pràn-gơnoar, tài bơh bol khai ờ ềng-màl: 21 ‘‘Dồn-sa mê in, ơ Korazin ! Dồn-sa mê in, ơ Bethsaida ! Kơyoa ală broă pràn-gơnoar neh lơh tam bol mê, dilah lơh tam Tyro mơ Sidon, gen jŏ rau, bol khai neh soh phan jơkiăt, bong mbuh mơ ềng-màl. 22 Be hơ̆, Añ đơs mơ bol mê: Tam ngai cah-rơña, Tyro mơ Sidon rơp kong nggờc rơlau mơ bol mê. 23 Ai mê, ơ Kapharnaum, mê rơp geh tơngguh tus hơ trồ ơ ? Mê rơp dùh tus tam brah-tìng ! Kơyoa dilah ală broă pràn-gơnoar neh lơh tam mê, dilah lơh tam Sodoma, gen gơ găm jơl tus ngai do. 24 Be hơ̆, Añ đơs mơ bol mê: Tam ngai cah-rơña, ù Sodoma rơp kong nggờc rơlau mơ mê.”
Yàng Bàp mơ cau Kòn
25 Tŭ hơ̆, hơ wơl, Kơnràñ Jesu đơs: ‘‘Kòn yal-jờng Đi, ơ Bàp, Kơnràñ trồ tiah dê, kơyoa Đi neh pồn ală bơta do mơ bol jăk-chài mơ bol ngăc-ngar, mơya neh yal-tơlik bol dêt-rơhền in. 26 Ngăn be hơ̆, ơ Bàp, kơyoa gen lah bơta niăm nùs Đi. * 27 Jơh ală bơta neh Bàp Añ jào Añ in; ờ geh cau lơi git Kòn, mìng Bàp lơm, krung ờ geh cau lơi git Bàp, mìng Kòn lơm, mơ cau lơi in Kòn yal-tơlik.
Tui tĕ yô Añ dê
28 Tus tĕ mơ Añ, ơ jơh ală bol mê kong bòl-glar mơ àñ kơnjơ̆, Añ rơp rơmal wơl bol mê in. * 29 Tui tĕ yô Añ dê, bơsrăm tĕ mơ Añ, kơyoa Añ niăm-lơnhơn mơ pơndêt-să, mơ bol mê rơp bàn bơta lơngai sồp-soàn bol mê in. 30 Kơyoa yô Añ dê lơnhơn, mơ phan àñ Añ dê nggờc.”
