Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
- Jơnau bơto
gơrềng bơh broă yal-pơnrơ gùng Yàng
Kơnràñ Jesu pơyoa
Jơt Bàr nă cau dờp-pơyoa lòt yal-bơto
10 1 Mơ hòi Jơt Bàr nă cau jăt-dờn Khai dê tus, Kơnràñ pà bol khai in gơnoar hơđăng ală huềng bơ̆-bơl, làng bol khai bơtrơh bol gơ mơ tơmbời jơh ală bơta kòp-jê mơ jơh ală bơta lơbơn-lơñơ.
* 2 Do lah sơnđăn Jơt Bàr nă cau dờp-pơyoa: lài jơh lah Simon hòi lah Petro, mơ Andrea oh khai, Jakobe kòn Zebede dê, mơ Joan oh khai, 3 Philippe mơ Bartolomeo, Toma, mơ Mattheo lah cau dar dia, Jakobe kòn Alphe dê, mơ Tadeo, 4 Simon cau Kanaan, mơ Juda Iskariot lah cau jào Kơnràñ.
5 Kơnràñ Jesu pơyoa bol Jơt Bàr do lòt mơ sồr bol khai lah: ‘‘Bol kòn bañ lòt tus hơ ală làng-bol bơdìh, mơ bañ mut tam ală bòn dờng cau Samaria; 6 mơya niăm rơlau lah bol kòn lòt tus tĕ mơ ală belàt nrah-nring hìu Israel dê. 7 Tam tŭ lòt, bol kòn yal-bơto tĕ mơ đơs: ‘‘Lơgar trồ neh tus rềp rau.” 8 Tơmbời tĕ bol kòp-jê, tơngkis wơl tĕ bol cau chơt, lơh goh tĕ bol lut-dun, bơtrơh tĕ ală cà; bol kòn neh dờp gời, gen pà tĕ gời. 9 Bañ cèng màh-biàng, ngŏlah priă-jền tam che but bol kòn dê, 10 krung ờ kơldung lòt gùng, ờ bàr blah ào, ờ khŏ-joă, ờ gai jra; kơyoa cau lơh broă di-pal geh phan sa.
11 Tŭ bol kòn mut tam bòn dờng ngŏlah bòn dêt lơi, gen lùp tĕ cau lơi tam hơ̆ di-pal; sòng ơm tềng hơ̆ jơl tus tŭ bol kòn lik-lòt. 12 Mut hìu lơi gen đơs tĕ niăm-să hìu hơ̆; 13 dilah hìu hơ̆ di-pal, gen bơta ring-lơngai bol kòn dê rơp tus hơđăng hìu hơ̆; mơya dilah hìu hơ̆ ờ di-pal, gen bơta ring-lơngai bol kòn dê rơp rê wơl mơ bol kòn. 14 Cau lơi ờ wă-rò bol kòn mơ ờ iăt jơnau bol kòn, gen tŭ lik hơ bơdìh hìu ngŏlah bòn dờng hơ̆, rơtuh tĕ thul ù bơh dơ jơng bol kòn. 15 Di ngăn, Añ đơs mơ bol kòn: Tam ngai cah-rơña, ù Sodoma mơ Gomorra rơp kong nggờc rơlau mơ bòn dờng hơ̆.
Kơnràñ Jesu yal lài ală bơta kup-kơryăn
16 Do Añ pơyoa bol kòn lòt be ală belàt tam gùl so rơhau; be hơ̆, bol kòn ngăc-ngar tĕ be bơs, mơ niăm-lơnhơn tĕ be ntờp. 17 Prăp-gàr să tĕ bơh ală cau; bơh bol khai rơp jào bol kòn dơ mpồl-pơrjum mơ rơp pù-lơh bol kòn tam ală hìu-pơrjum bol khai dê; 18 tài bơh Añ, bol kòn rơp kong cèng tus dơđăp bol gơnoar mơ bol bơtau, gơs cơng bol khai in mơ ală làng-bol bơdìh in. 19 Tŭ bol khai jào bol kòn, gen bol kòn bañ kơlôi pal đơs be lơi, ngŏlah chi lơi; bơh tam jiờ hơ̆, rơp ai bol kòn in jơnau bol kòn pal đơs. 20 Kơyoa ờ di bol kòn đơs, mơya Nhơm Bàp bol kòn dê đơs tam bol kòn.
21 Oh mơ mi rơp tam jào làng kong gơsơt, Bàp rơp jào kòn; oh kòn rơp tamdră mơ me bàp, mơ lơh me bàp in kong chơt. 22 Bol kòn rơp kong jơh ală cau ềng-gơjrañ tài bơh sơnđăn Añ; mơya cau lơi kơ̆ nùs jơl lồi-dut, gen cau hơ̆ rơp geh tơngklàs. 23 Tam tŭ bol khai kup-kơryăn bol kòn tam bòn dờng do, gen dô tĕ tam bòn dờng ne; bơh di ngăn, Añ đơs mơ bol kòn: Bol kòn ờ hềt lòt làm jơh ală bòn dờng Israel dê, gen Kòn kòn-bơnus neh tus rau.
24 Cau jăt-dờn ờ rơlau mơ cau pôgru, mơ cau duh-broă ờ rơlau mơ cau tờm. 25 Cau jăt-dờn gơs be cau pôgru khai dê, cau duh-broă gơs be cau tờm, gen tơl rau. Dilah bol khai neh hòi cau tờm hìu lah Beelzebul, gen mơ ală cau hìu khai dê, rơlau git nđờ !
Đơs tĕ tam bơta àng, bañ ngòt
26 Be hơ̆, bañ ngòt bol khai. Bơh ờ geh bơta lơi pồn-ndơp mơ rơp ờ geh pờ-tơlik, ờ geh bơta lơi ndơp mơ rơp cau ờ git. * 27 Jơnau Añ đơs mơ bol kòn tam klăm-jơngo, đơs tĕ tam bơta àng; mơ jơnau bol kòn kơno tam tồr, yal-bơto tĕ hơđăng rơkàng hìu. 28 Bañ ngòt bol cau gơsơt să-jăn mơ ờ rơgơi gơsơt sồp-soàn; mơya niăm rơlau lah ngòt tĕ Bơtau rơgơi tơnroh sồp-soàn mơ să-jăn tam brah-tìng. 29 Bàr nơm jik ờ di tăc dùl su ơ ? Mơya ờ dùl nơm lơi tam bol gơ rung tam ù mơ ờ bơh Bàp bol kòn.
30 Ală ñhe sŏ hơđăng bồ bol kòn krung neh geh kờp jơh rau. 31 Be hơ̆, bañ ngòt; bol kòn màng rơlau mơ oă jik.
32 Gen tàng, cau lơi rơp yal-tơlilk Añ dơđăp cau, gen Añ krung rơp yal-tơlik khai dơđăp Bàp Añ, Bơtau ơm tam trồ; 33 mơya cau lơi rơp pơndăng-săng Añ dơđăp cau, gen Añ krung rơp pơndăng-săng khai dơđăp Bàp Añ, Bơtau ơm tam trồ.
Kơnràñ Jesu tus làng cah is
34 Bañ kơlôi lah Añ tus cèng bơta ring-lơngai tus tam tiah; Añ ờ tus cèng bơta ring-lơngai, mơya lah đào. 35 Bơh Añ tus cah is cau sơlơ̆ mơ bàp he, kòn ùr sơlơ̆ mơ mè he, băn sơlơ̆ mơ po-me he:
* 36 mơ bol sò-tơm cau dê lah bol cau hìu he.
Săng-lời să tờm làng jăt Kơnràñ Jesu
* 37 Cau lơi gơboh mơ bàp ngŏlah mơ mè rơlau mơ Añ, gen ờ di-pal mơ Añõ; cau lơi gơboh mơ kòn klau ngŏlah kòn ùr rơlau mơ Añ, gen ờ di-pal mơ Añ; 38 mơ cau lơi ờ tui chikal he dê mơ jăt Añ, gen ờ di-pal mơ Añ. 39 Cau lơi jòi bơta kis he dê, gen rơp roh gơ; mơ cau lơi tài bơh Añ roh bơta kis he dê, gen rơp bàn wơl gơ.
Cau lơi wă-rò bol kòn lah wă-rò Añ
40 Cau lơi wă-rò bol kòn lah wă-rò Añ; mơ cau lơi wă-rò Añ lah wă-rò Bơtau neh pơyoa Añ. 41 Cau lơi wă-rò cau ala-bơr bơh sơnđăn lah cau ala-bơr, gen rơp dờp phan-jờng cau ala-bơr dê; cau lơi wă-rò cau song-dơpă bơh sơnđăn lah cau song-dơpă, gen rơp dờp phan-jờng cau song-dơpă dê. 42 Cau lơi ai dùl nă tam bol cau dêt-rơhền rơlau jơh do in hùc mìng dùl bơngàn dà ngềt lơm bơh sơnđăn lah cau jăt-dờn, gen di ngăn Añ đơs mơ bol kòn: Khai rơp ờ roh phan-jờng khai dê.”
