Jơnau Yalniam Marko-Pơnah 9

9 1 Kơnràñ đơs mơ bol khai: ‘‘Di ngăn, Añ đơs mơ bol mê: Geh bol cau tam ală cau ntào tềng do, rơp ờ lep bơta chơt, jơl tus tŭ gŏ lơgar Yàng tus tam pràn-gơnoar.”

Kơnràñ Jesu srơh să

2 Prau ngai tơnơ̆, Kơnràñ Jesu cèng Petro, Jakobe mơ Joan, mơ lăm mìng bol khai guh is hơđăng bơnơm jơnhoa. Kơnràñ srơh să dơđăp bol khai; 3 ào Kơnràñ gơs àng-gơcrà, bò ngăn, tiăn tus ờ geh cau lơi tam dunia rơgơi pìh bò be hơ̆. 4 Mơ geh Elia bal mơ Moise tơnggŏ măt mơ bol khai, mơ boh-bơr mơ Kơnràñ Jesu. 5 Hơ wơl, Petro đơs mơ Kơnràñ Jesu: ‘‘Ơ Rabbi, bol he ơm ndo gen niăm; bol kòn rơp lơh pe nơm sàl: dùl nơm Đi in, dùl nơm Moise in, mơ dùl nơm Elia in.” 6 Kơyoa khai ờ git đơs chi lơi; tài bơh bol khai nrơt-ngòt. 7 Geh mhoal gơgòm bol khai, mơ bơh mhoal gơtus săp: ‘‘Do lah Kòn kờñ-gơboh Añ dê; bol kòn iăt tĕ Khai.” 8 Tŭ hơ̆ mơ, bol khai sền gùt dar mơ ờ gŏ cau lơi tai, mìng dùl nă Kơnràñ Jesu lơm bal mơ bol khai.

Jơnau lùp gơrềng bơh Elia

9 Tam tŭ bol khai mù bơh bơnơm, Kơnràñ sồr bol khai bañ yal wơl cau lơi in ală bơta bol khai neh gŏ, mìng tŭ Kòn kòn-bơnus neh kis wơl bơh bol cau chơt. 10 Bol khai prăp jơnau sồr hơ̆, mơ tam lùp bal ñchi lah jơnau: ‘‘kis wơl bơh bol cau chơt.” 11 Bol khai lùp Kơnràñ mơ đơs: ‘‘Be hơ̆, ñchi bơh tài bol gơnoar-cih đơs lah Elia pal tus lài taih ?” 12 Kơnràñ đơs mơ bol khai: ‘‘Elia neh tus lài, bơtào wơl jơh ală bơta; mơya mbe lơh neh cih gơrềng bơh Kòn kòn-bơnus lah Khai pal kong oă bơta jê-yăn mơ kong sền ờ sơp taih ? 13 Mơya Añ đơs mơ bol mê: Elia neh tus rau; mơ bol khai neh lơh khai in ală bơta bol khai kờñ, be neh cih gơrềng bơh khai.”

Kơnràñ Jesu tơmbời cau kong huềng kloat lơh

14 Kơnràñ mơ pe nă cau jăt-dờn tus hơ bol jăt-dờn ndai, gŏ mpồl làng-bol gal gùt dar bol khai mơ bol gơnoar-cih tam pơndăng mơ bol khai. 15 Tŭ hơ̆ mơ, jơh làng-bol gŏ Kơnràñ gen ai lơh crih-crài, mơ ntoat tus đơs niăm-să Kơnràñ. 16 Kơnràñ lùp bol khai: ‘‘Ñchi bol mê tam pơndăng taih ?” 17 Dùl nă tam mpồl làng-bol hơ wơl mơ Kơnràñ: ‘‘Ơ Pôgru, añ neh cèng kòn klau añ tus mơ Đi, khai kong huềng kloat lơh; 18 mơ tềng lơi gơ mut lơh khai, gen gơ sơrglơm khai, mơ khai gơlik kơmbuh bơr, rơkiăt sề mơ ơm ro-ñro. Añ neh đơs mơ bol jăt-dờn Đi dê làng bol khai bơtrơh gơ, mơ bol khai ờ rơgơi.” 19 Kơnràñ hơ wơl mơ bol khai mơ đơs: ‘‘Ơ jơi ờ pindờn, Añ rơp ơm mơ bol mê jơl tus tŭ lơi taih ? Añ pal kong ơt-ơl bol mê jơl tus tŭ lơi taih ? Cèng tĕ khai Añ in.” 20 Bol khai cèng cau hơ̆ tus mơ Kơnràñ. Mơ tŭ Kơnràñ gŏ khai, gen tŭ hơ̆ mơ huềng-iơh lơh gơrơpơt khai; mơ khai gơplơ̆ dơ ù, gơpơrlă mơ gơlik kơmbuh bơr. 21 Kơnràñ lùp bàp khai: ‘‘Bơta hơ̆ gơlik tus khai in neh jŏ ờ ?” Cau bàp đơs: ‘‘Bơh tŭ găm dêt; 22 huềng-iơh krung jo cơm khai tam ồs mơ tam dà, làng tơnroh khai;  mơya dilah Đi rơgơi chi lơi, dăn Đi sơnđàc dong-kờl bol hi.” 23 Kơnràñ Jesu đơs mơ khai: ‘‘Dilah Đi rơgơi !” Jơh ală bơta rơgơi lơm cau pindờn in.” 24 Tŭ hơ̆ mơ, cau bàp kòn dêt dê nggà mơ đơs: ‘‘Añ pindờn; dăn Đi dong-kờl bơta ờ pindờn añ dê.” 25 Tŭ  Kơnràñ Jesu gŏ mpồl làng-bol ntoat tus, Khai lah-pơrhơng huềng bơ̆-bơl mơ đơs mơ gơ: ‘‘Ơ huềng kloat mơ tĭ, Añ sồr mê: Lik tĕ bơh cau do mơ bañ mut tam khai tai.” 26 Huềng bơ̆-bơl nggà, lơh rơpơt khai ngăn mơ lik; khai gơlơh be chơt, tiăn tus gal cau đơs: ‘‘Khai neh chơt rau !” 27 Kơnràñ Jesu ăt dơ tê khai, tơngguh khai, mơ khai guh.

28 Tŭ Kơnràñ mut tam hìu, bol jăt-dờn Khai dê lùp ờm Khai : ‘‘Ñchi bơh tài bol kòn ờ rơgơi bơtrơh gơ taih ?” 29 Kơnràñ đơs mơ bol khai: ‘‘Jơi hơ̆ mìng rơgơi lik bơh bơta răc dăn lơm.”

Kơnràñ Jesu yal lài dơ̆ bàr bơta jê-yăn mơ bơta kis wơl Khai dê

30 Kơnràñ mơ bol jăt-dờn lik bơh tềng hơ̆, lòt găn Galilea; mơ Kơnràñ ờ kờñ cau lơi in git. 31 Bơh Kơnràñ bơto bol jăt-dờn Khai dê mơ đơs mơ bol khai: ‘‘Kòn kòn-bơnus rơp kong jào tam tê cau, mơ bol khai rơp gơsơt Khai, mơ lồc kong chơt pe ngai, Khai rơp kis wơl.” 32 Bol jăt-dờn ờ wă jơnau hơ̆, mơ bol khai ngòt ờ khin lùp Kơnràñ.

 Ñcau dờng rơlau ?

33 Kơnràñ mơ bol jăt-dờn tus tam Kapharnaum. Tŭ neh ơm tam hìu, Kơnràñ lùp bol khai: ‘‘Tam gùng, ñchi bol kòn tam pơndăng taih ?” 34 Bol khai ơm ngềt. Kơyoa tam gùng, bol khai neh tam pơndăng ñcau dờng rơlau. 35 Kơnràñ nggui, hòi bol Jơt Bàr mơ đơs mơ bol khai: ‘‘Dilah cau lơi kờñ gơs cau lài jơh, gen rơp gơs cau lồi-dut jơh ală cau dê, mơ gơs cau duh-broă jơh ală cau dê.” 36 Kơnràñ ai dùl nă kơnòm dêt, ơn khai tam gùl bol jăt-dờn, kơnđu khai mơ đơs mơ bol khai: 37 ‘‘Cau lơi wă-rò dùl nă tam ală kơnòm dêt be do bơh sơnđăn Añ, hơ̆ lah wă-rò Añ, mơ cau lơi wă-rò Añ, gen ờ di lah wă-rò Añ, mơya lah wă-rò Bơtau neh pơyoa Añ.”

Cau lơi ờ tamdră mơ bol he, gen lah đah bol he

38 Joan đơs mơ Kơnràñ: ‘‘Ơ Pôgru, bol kòn neh gŏ cau ai sơnđăn Đi bơtrơh cà, mơ bol kòn neh kơryăn khai, bơh khai ờ jăt bol he.” 39 Kơnràñ Jesu đơs: ‘‘Bañ kơryăn khai. Kơyoa ờ geh cau lơi ai sơnđăn Añ lơh broă pràn-gơnoar mơ rơgơi đơs iơh Añ in; 40 kơyoa cau lơi ờ tamdră mơ bol he, gen lah đah bol he.

Bơta dong-nđàc cau jăt-dờn

41 Kơyoa cau lơi ai bol kòn in hùc dùl bơngàn dà bơh sơnđăn lah bol kòn gơrê mơ Kơnràñ Kristo, ngăn, Añ đơs mơ bol kòn: Cau hơ̆ rơp ờ roh phan-jờng khai dê.

Bañ lơh gơtup tìs cau ndai in

42 Cau lơi lơh gơtup tìs dùl nă in tam ală kơnòm dêt găm pindờn dơ Añ do, gen niăm rơlau cau hơ̆ in lah, khai kong wăn mơ mpal lŭ dờng dơ ngko mơ kong cơm tam dà-lềng.

* 43 Dilah tê kòn lơh kòn in gơtup tìs, gen koh tĕ gơ: niăm kòn in, lut tê mơ mut tam bơta kis, rơlau mơ geh bàr nơm tê mơ mut tam brah-tìng, tam ồs ờ rồc lồi.

45 Dilah jơng kòn lơh kòn in gơtup tìs, gen koh tĕ gơ: niăm kòn in, lut jơng mơ mut tam bơta kis, rơlau mơ geh bàr nơm jơng mơ kong cơm tam brah-tìng.

47 Dilah măt kòn lơh kòn in gơtup tìs, gen kơluĕ tĕ gơ: niăm kòn in, lè măt mơ mut tam lơgar Yàng, rơlau mơ geh bàr đah măt mơ kong cơm tam brah-tìng, 48 tềng hơ̆, kih rơhài gơ dê ờ chơt, mơ ồs ờ rồc lồi; * 49 kơyoa jơh tơl nă rơp geh pơnđồm mơ ồs. 50 Boh lah phan niăm; mơya dilah boh ờ hăng, gen bol kòn rơp ai chi lơi lơh hăng gơ taih ? Bol kòn pal geh boh tam bol kòn mơ pal geh bơta ring-lơngai tam gùl bol kòn.”