Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu lơh bañ gơs rà dơ̆ bàr
8 1 Tam ală ngai hơ̆, geh tai mpồl làng-bol gal, mơ bol khai ờ geh chi lơi sa, gen Kơnràñ hòi bol jăt-dờn tus, mơ đơs mơ bol khai: 2 ‘‘Añ nđàc-sơngit mpồl làng-bol, tài bơh neh pe ngai rau, bol khai ơm sùm mơ Añ mơ ờ geh chi lơi sa; 3 dilah Añ lời bol khai jơgloh rê hìu, gen bol khai rơp huời tam gùng; tam bol khai geh ală cau tus bơh ngài.” 4 Bol jăt-dờn Kơnràñ dê hơ mơ Khai: ‘‘Tềng do, tam tiah ngềt-ngơt, mbơh mơ cau rơgơi ai bañ làng-bol in sa hờm taih ?” 5 Kơnràñ lùp bol jăt-dờn: ‘‘Bol kòn geh nđờ nơm bañ ?” Bol khai đơs: ‘‘Poh nơm.” 6 Kơnràñ sồr mpồl làng-bol nggui dơ ù, mơ Kơnràñ dờp poh nơm bañ, ưn ngài, pet gơ, ai bol jăt-dờn Khai dê in, làng bol khai yờ; mơ bol khai neh yờ mpồl làng-bol in. 7 Bol khai krung geh duêt ka dêt; mơ Kơnràñ krung yalniăm gơ mơ sồr yờ gơ tai. 8 Mpồl làng-bol neh sa mơ geh hờm; ai ală pet jơngkah, gen bol khai tơrgùm poh nơm bài dờng. 9 Mpồl làng-bol pơgăp poan rơbô nă. Mơ Kơnràñ ai bol khai in rê. 10 Tŭ hơ̆ mơ, Kơnràñ hào ahò bal mơ bol jăt-dờn Khai dê, tus hơ kơnhoàl Dalmanutha.
Kơnràñ Jesu lùp-jòi tềl bơh trồ
11 Bol Phariseo lòt tus mơ sơntờm tam pơndăng mơ Kơnràñ, lùp-jòi dơ Khai tềl bơh trồ làng tơlòng Khai. 12 Kơnràñ tă nhơm mơ đơs: ‘‘Ñchi bơh tài jơi-nòi do lùp-jòi tềl taih ? Di ngăn, Añ đơs mơ bol mê: Rơp ờ ai jơi-nòi do in tềl lơi.” 13 Mơ lời bol khai, Kơnràñ hào ahò tai, lòt đah bơtĭ ne.
Kañ bol Phariseo dê mơ kañ Herode dê
14 Bol jăt-dờn huĭ cèng bañ, mơ bol khai mìng geh dùl nơm bañ tam ahò lơm. 15 Kơnràñ sồr bol khai mơ đơs: ‘‘Sền ngăc tĕ, prăp-gàr să tĕ bơh kañ bol Phariseo mơ kañ Herode dê !” 16 Bol jăt-dờn tam bơyai bal lah tài bơh bol khai ờ geh bañ. 17 Git jơnau hơ̆, Kơnràñ đơs mơ bol khai: ‘‘Ñchi bơh tài bol kòn tam bơyai bal lah tài bơh bol kòn ờ geh bañ ? Bol kòn ờ hềt git mơ krung ờ wă ơ ? Nùs bol kòn găm kră-kơldăng ơ ? 18 Bol kòn geh măt mơ ờ gŏ, geh tồr mơ ờ kơno ơ ? Bol kòn krung ờ kah wơl ơ, 19 tŭ Añ pet prăm nơm bañ prăm rơbô nă cau in, bol kòn neh tơrgùm nđờ bài bềng pet bañ taih ?” Bol khai đơs mơ Kơnràñ: ‘‘Jơt bàr bài.” 20 ‘‘Tŭ Añ pet poh nơm bañ poan rơbô nă cau in, bol kòn neh tơrgùm nđờ bài dờng bềng pet bañ taih ?” Bol khai đơs mơ Kơnràñ: ‘‘Poh bài dờng.” 21 Kơnràñ đơs mơ bol khai : ‘‘Bol kòn ờ hềt wă ơ ?”
Kơnràñ Jesu tơmbời cau jơngo măt tam Bethsaida
22 Kơnràñ mơ bol jăt-dờn tus hơ Bethsaida. Cau lăm dùl nă cau jơngo măt tus hơ Kơnràñ mơ dăn Kơnràñ bư dơ khai. 23 Kơnràñ ăt dơ tê cau jơngo, tề khai lik hơ bơdìh bòn; Kơnràñ choh dà diau dơ măt khai, ơn tê dơ khai mơ lùp khai: ‘‘Mê gŏ chi lơi ờ ?” 24 Khai tơngờ sền mơ đơs: ‘‘Añ gŏ cau, mơya añ gŏ bol khai lòt gơlơh be chi-che.” 25 Gen Kơnràñ ơn tai tê hơđăng măt khai; khai sơntờm gŏ mơ geh bời, mơ khai gŏ loh jơh ală bơta. 26 Kơnràñ ai khai rê hìu mơ đơs: ‘‘Mê bañ mut tam bòn.”
Petro yal-tơlik bơta pindờn
* 27 Kơnràñ Jesu mơ bol jăt-dờn Khai dê lòt tus tam ală bòn Sesare Philippe dê; mơ tam gùng Kơnràñ lùp bol jăt-dờn Khai dê mơ đơs mơ bol khai: ‘‘Cau đơs Añ lah ñcau taih ?” 28 Bol khai hơ wơl mơ Kơnràñ mơ đơs: ‘‘Joan Baptista, cau bà đơs lah Elia, cau bà tai đơs lah dùl nă tam bol ala-bơr.” 29 Kơnràñ lùp bol khai: ‘‘Ai bol kòn đơs Añ lah ñcau taih ?” Hơ wơl, Petro đơs mơ Kơnràñ: ‘‘ Đi lah Kristo.” 30 Kơnràñ đơs kràñ-cê mơ bol khai bañ yal cau lơi in gơrềng bơh Khai.
Kơnràñ Jesu yal lài dơ̆ dùl bơta jê-yăn mơ bơta kis wơl Khai dê
31 Kơnràñ sơntờm bơto bol khai: ‘‘Kòn kòn-bơnus pal kong oă bơta, kong bol kuang kra, bol lơh-yàng dờng, bol gơnoar-cih săng-sơrbì, kong gơsơt, mơ tơnơ̆ mơ pe ngai kis wơl”; 32 Kơnràñ đơs loh-làng jơnau hơ̆. Petro hoài Kơnràñ tus hơ khai mơ sơntờm lah-pơrhơng Kơnràñ. 33 Kơnràñ wơlke, gŏ bol jăt-dờn Khai dê, mơ đơs kràñ-cê mơ Petro: ‘‘Ruc tĕ tơnơ̆ Añ, ơ Satan, tài bơh mê ờ kơlôi ală bơta Yàng dê, mơya ală bơta kòn-bơnus dê lơm.”
Ală bơta pal geh làng jăt Kơnràñ Jesu
34 Kơnràñ hòi mpồl làng-bol bal mơ bol jăt-dờn Khai dê tus, mơ đơs mơ bol khai: ‘‘Dilah cau lơi kờñ jăt Añ, gen pal săng-lời să tờm, tui chikal he dê mơ jăt Añ. 35 Kơyoa cau lơi kờñ tơngklàs bơta kis he dê, gen rơp roh gơ; ai cau lơi kong roh bơta kis he dê tài bơh Añ mơ Jơnau Yal Niăm, gen rơp tơngklàs gơ. 36 Kơyoa ñchi kuơ cau in, dilah geh jơh dunia mơ lơh roh bơta kis he dê ? 37 Kơyoa cau rơp ai chi lơi tamgơl mơ bơta kis he dê ? 38 Kơyoa tam jơi-nòi dri-bơrnàn mơ tìs-glài do, cau lơi bàssìl bơh Añ mơ ală jơnau đơs Añ dê, gen Kòn kòn-bơnus krung rơp bàssìl bơh cau hơ̆, tŭ Khai rơp tus tam bơta gơklŏ Bàp Khai dê bal mơ bol huềng-duh niăm-goh.”
